Richard Goldstone

in Wikipedia, die vrye ensiklopedie
Jump to navigation Jump to search
Richard Goldstone
’n Beeld van die betrokke persoonlikheid.
Richard Goldstone in Februarie 2007

Gebore 26 Oktober 1938
Boksburg
Nasionaliteit Suid-Afrika
Beroep Regter
Bekend vir Goldstone-kommissie
Internasionale strafhof in Den Haag
Feitesending na Gasa
Religie Jood
Huweliksmaat Noleen Goldstone
Kind(ers) 2

Richard Joseph Goldstone (gebore 26 Oktober 1938) is 'n voormalige Suid-Afrikaanse regter. Nadat hy vir 17 jaar as 'n kommersiële prokureur gewerk het, het die Suid-Afrikaanse regering hom tot die Transvaalse Hooggeregshof aangestel, waar hy van 1980 tot 1989 gedien het. Daarna het hy van 1990 tot 1994 by die appèlafdeling van die Hooggeregshof van Suid-Afrika gewerk.

Goldstone is as 'n liberale regter beskou wat verskeie beslissings geneem het om die gevolge van apartheid te verlig of te omseil. As voorbeeld het hy uitsettings ingevolge die groepsgebiedewet beperk. As 'n resultaat is die wet geneutraliseer en is vervolgings in terme van die wet feitlik gestaak. Sy kritici het egter opgemerk dat hy ten spyte van sy liberale posisie twee swart Suid-Afrikaners ter dood veroordeel het, terwyl hy die doodstraf van meer as 20 ander swart Suid-Afrikaners gehandhaaf het.[1][2]

Tydens die oorgang van apartheid na 'n veelrassige demokrasie was hy van 1991 tot 1994 die hoof van die invloedryke Goldstone-kommissie, wat politieke geweld in Suid-Afrika ondersoek het. Die kommissie het verseker dat veelparty-onderhandelinge, ten spyte van herhaalde uitbrake van geweld, op koers kon bly. Sy bereidwilligheid om albei kante te kritiseer het vertroue ingeboesem. Hy het 'n bekende openbare figuur in Suid-Afrika geword en het wydverspreide internasionale ondersteuning en belangstelling gewek.

Goldstone het daarna van 1994 tot 1996 as 'n hoof-aanklaer van die Verenigde Nasies se Internasionale Kriminele Tribunaal gedien, waar hy menseregteskendings in Joego-Slawië en Rwanda ondersoek het. Hy het 'n aantal oorlogsmisdadigers vervolg, waaronder die Bosnies-Serwiese politieke en militêre leiers, Radovan Karadzic en Ratko Mladic.[3]

Ná sy terugkeer na Suid-Afrika is hy deur president Nelson Mandela tot die nuutgestigte Konstitusionele Hof van Suid-Afrika benoem. Hy tree egter in 2003 af om meer tyd aan ander belangstellings, soos opleiding en skryf te bestee.

In 2009 stuur die VN se Menseregteraad hom op 'n feitesending na Gaza. Hy kom tot die gevolgtrekking dat beide Israel en Hamas oorlogsmisdade teen die mensdom gepleeg het. Die verslag het groot ontevredenheid in Israel en verdeeldheid in die Joodse gemeenskap in Suid-Afrika en elders veroorsaak.

Verwysings[wysig | wysig bron]

  1. Judge Goldstone's dark past Tehiya Barak, Ynet, 05.06.10
  2. Eldar, Akiva (6 Mei 2010). "Richard Goldstone: I have no regrets about the Gaza war report Israel News". Haaretz. Besoek op 6 Augustus 2014.
  3. "Richard J. Goldstone Appointed to Lead Human Rights Council Fact-finding mission on Gaza Conflict". Office of the United Nations High Commissioner for Human Rights. 3 April 2009.