Robert Goddard

in Wikipedia, die vrye ensiklopedie
Jump to navigation Jump to search
Robert Goddard
’n Beeld van die betrokke persoonlikheid.
Robert Goddard

Geboortenaam Robert Hutchings Goddard
Gebore 5 Oktober 1882
Worcester, Massachusetts, Verenigde State
Oorlede 10 Augustus 1945
Baltimore, Maryland, Verenigde State
Nasionaliteit Vlag van Verenigde State van Amerika Verenigde State
Beroep Vuurpyl ontwerper
Huweliksmaat Esther Christine Kisk

Robert Hutchings Goddard (Worcester, Massachusetts, 5 Oktober 1882 - Baltimore, Maryland, 10 Augustus 1945) was 'n Amerikaanse navorser en uitvinder. Hy was 'n pionier op die gebied van moderne vuurpyltegnologie en word beskou as een van die belangrikste grondleggers van die ruimtevaart. Hy word gekrediteer met die skep en bou van die wêreld se eerste vloeibare brandstof vuurpyl. [1]

Goddard is gebore in Worcester (volgens sommige bronne Roxbury), Massachusetts, Verenigde State. Sy pa was 'n reisende verkoopsman en uitvinder. Deur boeke soos Jules Verne se Journey to the Moon en H.G. Wells se War of the Worlds het hy het op 'n jong ouderdom in die ruimte- en ruimtereise begin belanggestel. Sy verbeelding en vindingrykheid is aangevuur deur sy vader, wat hom 'n teleskoop, mikroskoop en 'n intekening op Scientific American gegee het.

Lewensloop van Goddard[wysig | wysig bron]

Goddard behaal 'n baccalaureusgraad aan Worcester Polytechnic, en in 1911 behaal hy sy PhD-graad in Fisika aan die Clark Universiteit. Hy studeer daarna vir 'n jaar aan die Universiteit van Princeton en keer terug na die Clark-universiteit om as assistent-professor in fisika onderrig te gee.

In 1914 verkry hy patente vir die meerfase vuurpyl en die vloeibare brandstofvuurpyl. Van toe af het hy aan die ontwerp van vuurpyl-enjins gewerk en toetse met finansiële hulp van die Smithsonian Institusie gedoen.

In 1919, in sy artikel A Method of Reaching Extreme Altitudes, skryf Goddard oor die moontlikheid van ruimtevlugte na die maan, vyftig jaar voordat die eerste mense op die maan land.

Op 1 November 1923 het hy die eerste toetse met 'n vuurpylmotor uitgevoer wat met vloeibare brandstof werk.

Goddard het die eerste vuurpyl op 16 Maart 1926 in Auburn, Massachusetts, Verenigde State gelanseer. Die vuurpyl het 'n vlug van 2,5 sekondes uitgevoer, 'n hoogte van 12,5 meter bereik, 'n gemiddelde snelheid van 97 kilometer per uur gehad en 56 meter verder geland. Hierdie gebeurtenis word ook die Kitty Hawk van vuurpyltegnologie genoem, met verwysing na die vlug van die Wright-broers met die eerste gemotoriseerde vliegtuig.

In die daaropvolgende jare het Goddard met vuurpyle van verskillende groottes geëksperimenteer. In 1929 het hy sy vuurpyle vir die eerste keer toegerus met instrumente soos 'n termometer, barometer en 'n klein kamera.

Op 31 Mei 1935 bereik 'n Goddard-vuurpyl 'n hoogte van 2300 meter. Die vuurpyl was 4,6 meter lank en het 38 kilogram geweeg. Op 26 Maart 1937 bereik 'n ander vuurpyl 'n hoogte van 2750 meter, die hoogste afstand wat Goddard met een van sy vuurpyle behaal het.

Goddard is in die ouderdom van 62 in Baltimore dood aan die gevolge van keelkanker. Hy was met Esther Christine Kisk getroud.

Op 1 Mei 1959 word 'n belangrike ruimtelaboratorium van die NASA in Greenbelt, Maryland, Verenigde State gevestig, vernoem na Goddard: die Goddard-ruimtevaartsentrum (Goddard Space Flight Center).

Verwysings[wysig | wysig bron]

  1. Exhibition”.

Eksterne skakels[wysig | wysig bron]

Hierdie artikel is in sy geheel of gedeeltelik vanuit die Nederlandse Wikipedia vertaal.