Vuurpyl

in Wikipedia, die vrye ensiklopedie
Spring na: navigasie, soek
Hierdie artikel handel om die voertuig. Vir die plant, sien Vuurpyl (plant).
'n Redstonevuurpyl, deel van die Mercuryprogram.

'n Vuurpyl is 'n voertuig, missiel of vliegtuig wat aangedryf word deur die uitspuiting van snelbewegende uitlaatgasse van die binnekant van 'n vuurpylenjin. Die uitlaatgas kom van 'n dryfmiddel.

Daar is baie verskillende tipes vuurpyle. Die vuurpyle verskil in grootte – dit kan wissel van 'n modelvuurpyl vir kinders tot die enorme Saturn V wat vir die Apollo-program gebruik is.

Die meeste vuurpyle word chemies aangedryf deur middel van 'n binnebrandenjin. Die dryfmiddel kan 'n vaste stof, vloeistof, of 'n mengsel van die twee wees. Sommige vuurpyle verkry hulle aandrywingsenergie van ander bronne as chemies, byvoorbeeld stoomvuurpyle wat superverhitte water in snelbewegende stoom omskep en die vuurpyl voortdryf. Sulke vuurpyle maak gebruik van buitebrandenjins.

Geskiedenis[wysig]

Oorsprong van die vuurpyl[wysig]

Siemenowicz se meerstukvuurpyl, uit sy Artis Magnae Artilleriae pars prima

Die Sjinese van weleer het buskruit ontdek, en soos wat hulle dit in verskeie wapens begin gebruik het, soos bomme en kanonne, het die vuurpyl natuurlik begin ontwikkel. Aanvanklik is dit gebruik as 'n manier om die toentertydse Sjinese gode te aanbid, maar dit het daarna as vuurwerke ontwikkel. Vuurpyltegnologie het Europa getref na die inval van die Mongole.

Die Pools-Litauer, Kazimierz Siemienowicz, se werk, Artis Magnae Artilleriae pars prima (Die groot kuns van artillerie, die eerste gedeelte, ook bekend as Die volledige kuns van artillerie), wat vir meer as tweehonderd jaar die standaardhandleiding was vir artillerie in Europa, het ook die bron vir die basiese ontwerp van vuurpyle geword.

Vroeë vuurpyle was baie onakkuraat, en lang stokke moes aan die vuurpylstert gevoeg word om dit meer op koers te hou.

Moderne vuurpyle[wysig]

In 1903, in Rusland, het 'n hoërskoolwiskundeonderwyser genaamd Konstantin Tsiolkovsky (1857-1935) die werk Исследование мировых пространств реактивными приборами (Die verkenning van die kosmiese ruimte met behulp van reaksietoestelle), die eerste ernstige belangrike werk oor ruimtevaart gepubliseer.

Robert Goddard en sy eerste vloeibare brandstofaangedrewe vuurpyl

Aanvanklik was die moderne vuurpyle nie ekonomies nie, weens die groot mate van hitte-energie wat nie in kinetiese energie omgeskakel kon word nie. Dié probleem is in 1917 opgelos deur Robert Goddard, toe hy 'n supersoniese spuitstuk aangevoeg het aan die vuurpyl se binnebrandkamer.

Ontwikkelingswerk het gedurende die 1920's in verskeie lande plaasgevind, insluitende Amerika, Brittanje, Duitsland, Frankryk, Italië, Oostenryk, Rusland en Tjeggoslowakye. Duitse wetenskaplikes het veral sukses behaal met vloeibare aandrywingsmiddels. In die vroeë 1930's het die meeste ontwikkeling plaasgevind in Leningrad. Wernher von Braun, destyds 'n jong vuurpylwetenskaplike, is deur die Duitse owerhede gevra om by die weermag aan te sluit, en onder sy leiding het Duitsland langafstandwapens ontwikkel wat deur Nazi-Duitsland in die Tweede Wêreldoorlog gebruik is. Die V-2 vuurpyl wat deur sy span ontwerp is in 1943 kon 300 km ver vlieg en 'n 1000 kg plofkop dra. Aan die einde van daardie oorlog, het Rusland, Brittanje, maar veral Amerika, vele opgeleide wetenskaplikes van die Duitse vuurpylprogram onderskep en vir hulle laat werk, insluitende von Braun.

Ná die oorlog is vuurpyle gebruik om onder meer die eerste satelliet, die eerste man in die ruimte, die eerste maanlanding, en die eerste interplanetêre verkenningstuig te lanseer. Hierdie gebeure was van groot belang vir politici, en het die finansies bekom wat vandag steeds verdere navorsing borg.

Vanuit 'n militêre oogpunt het vuurpyle geweldig belangrik geword in die gebruik daarvan as interkontinentale ballistiese missiele, aangesien 'n kernplofkop gedra deur so 'n vuurpyl nie afgeskiet kon word nie.

Ongelukke[wysig]

Die enorme hoeveelheid chemiese energie in vuurpylbrandstof lei maklik tot 'n ongeluk. Sien die lys van ruimterampe.

Eksterne skakels[wysig]

Bron[wysig]

Kortweg vertaal van die artikel Rocket op die Engelse Wikipedia.