Rothschild-bankfamilie
Die Rothschild–bankfamie is 'n internasionale dinastie van Duits–Joodse oorsprong. Die familie is veral bekend vir werk in die bankwese. In Oostenryk, Frankryk en die Verenigde Koninkryk het baie lede van die familie adellike titels.
Oorsprong[wysig | wysig bron]
Mayer Amschel Rothschild (1744–1812) word gesien as die stamvader van die familie. Hy was die seun van Amschel Moses Rothschild, 'n geldwisselaar. Die familie het sy naam gekry van 'n embleem met 'n rooi skild op die huis van een van sy voorvaders. Mayer Amschel Rothschild is in die Frankfurt am Main-ghetto gebore, en het homself in die bankwêreld opgewerk. Sy bedrywighede het gou oor Europa versprei deur sy vyf seuns, wat deur hom na vyf groot Europese stede gestuur is. Hy het verseker dat beheer oor alle takke van sy maatskappy altyd in die hande van die familie bly. Hy het ook die rykdom in die familie behou deur huweliksbeleid. Sy oudste dogter het byvoorbeeld met Benedikt Moses Worms, 'n afstammeling van 'n ander bankfamilie, getrou.[1][2][3][4][5]
Sy seuns was:
- Amschel Mayer Rothschild (1773–1855), Frankfurt;
- Salomon Mayer Rothschild (1774–1855), Wene;
- Nathan Mayer Rothschild (1777–1836), Londen;
- Calmann Mayer Rothschild (1788–1855), Napels;
- Jakob Mayer Rothschild (1792–1868), Parys.
Die familie se wapen is 'n toe vuis omring deur vyf pyle, wat verwys na die vyf seuns van Mayer Amschel Rothschild. Die familieleuse is: Concordia, Integritas, Industria (Harmonie, Integriteit, Aktiwiteit).
In 1816 is vier van die broers deur die Oostenrykse keiser Francis I veredel. Hulle het almal die titel baron of freiherr gekry. In 1885 is aan Nathan Mayer Rothschild II, 'n lid van die Londense tak van die familie, die adellike titel Baron toegeken.
Die Rothschilds het die finansiers van die magtigste mense op aarde geword en onder meer Cecil Rhodes se Afrika-ryk en die bou van die Suezkanaal gefinansier. Hulle het De Beers se hoofaandeelhouer in Suid-Afrika geword. Die familie het ook in kuns-, eiendoms- en wynlandgoedere belê en liefdadigheid gedoen.
Die revolusionêre jaar van 1848, die krisis van die 1930's en Antisemitisme voor en tydens die Tweede Wêreldoorlog het 'n deel van die familie se fortuin laat verdwyn.
Sommige afstammelinge[wysig | wysig bron]
- Alphonse James de Rothschild (1827–1905), Franse bankier, wynboer en eienaar van Château Lafite Rothschild.
- Nathaniel Mayer Rothschild (1840 – 1915), Britse bankier en politikus.
- Charles Rothschild (1877–1923), Britse bankier en entomoloog.
- Eric de Rothschild (1940), Franse bankier.
- Henri de Rothschild (oorlede 1947), Franse bankier, dokter en skrywer.
- Guy de Rothschild (1909–2007), Franse bankier.
- Barones Hélène van Zuylen gebore Hélène de Rothschild (1863–1947), Franse sosiale figuur en skrywer.
- Jacob Rothschild (1936–2024), Britse bankier.
- Lionel Walter Rothschild (1868–1937), Britse bankier, politikus en dierkundige.[6][7]
Verwysings[wysig | wysig bron]
- ↑ Rubinstein, William D.; Jolles, Michael; Rubinstein, Hilary L. (2011). The Palgrave Dictionary of Anglo-Jewish History. Palgrave Macmillan. ISBN 9780230304666.
- ↑ Leeson, Robert (2014). Hayek: A Collaborative Biography: Part II, Austria, America and the Rise of Hitler, 1899-1933. Springer Publishing. p. 27. ISBN 9781137325099. Geargiveer vanaf die oorspronklike op 26 Maart 2023. Besoek op 26 Junie 2019.
- ↑ The House of Rothschild: Money's prophets, 1798–1848, Volume 1, Niall Ferguson, 1999, page 481-85
- ↑ "The Rothschild story: A golden era ends for a secretive dynasty". The Independent. Geargiveer vanaf die oorspronklike op 15 Januarie 2006.
- ↑ The Secret Life of the Jazz Baroness, from The Times 11 April 2009, Rosie Boycott
- ↑ People: Paris Orleans S.A. (PROR.PA) Geargiveer 25 September 2015 op Wayback Machine Reuters.
- ↑ "League tables". Rothschild.com. Geargiveer vanaf die oorspronklike op 23 Augustus 2002. Besoek op 8 Julie 2010.
