SKA

in Wikipedia, die vrye ensiklopedie
Jump to navigation Jump to search
SKA
SKA overview.jpg
Ander naam  Square Kilometre Array
Tipe  Gefaseerde reeks
Gebou  2019-2030
Webtuiste  www.skatelescope.org
Ligging
Plek  Suidelike Halfrond
Koördinate  30°43′16″S 21°24′40″O / 30.72111°S 21.41111°O / -30.72111; 21.41111
Portaal  Portaalicoon   Sterrekunde

Die Square Kilometre Array (SKA) is ’n groot, veelvuldige radioteleskoopprojek wat na verwagting in Suid-Afrika en Australië gebou gaan word. Dit sal by voltooiing uit meer as 3 000 radioteleskope sal bestaan. Twee derdes van die radioteleskope sal in Suid-Afrika gebou word en die ander in Australië.

Dit sal ’n totale versamelingsgebied van sowat een vierkante kilometer hê.[1][2] Dit sal oor ’n groot omvang frekwensies werk en vanweë sy grootte sal dit 50 keer sensitiewer wees as enige ander radio-instrument. Dit behoort die hemelruim meer as 10 000 keer vinniger as tevore te verken.

Met ontvangerstasies wat van ’n sentrale punt af oor minstens 3 000 km strek, sal dit radiosterrekunde se vermoë benut om die beelde met die hoogste resolusie op alle terreine van sterrekunde te verskaf. Die SKA sal in die Suidelike Halfrond gebou word, in Afrika suid van die Sahara met kernpunte in Suid-Afrika en Australië, waar die uitsig op die Melkweg die beste en radioversteurings die minste is.[3]

Bouwerk sal na verwagting in 2019 begin en aanvanklike waarnemings word teen 2022 beplan, maar die begroting is nog nie gefinaliseer nie. Die SKA sal in twee fases gebou word, met fase 1 wat sowat 10% van die hele teleskoop se vermoë verteenwoordig.[4][5] Fase 1 se koste is in 2013 op €650 miljoen vasgestel, terwyl fase 2 se koste nog nie bepaal is nie.[6]

Werkingsbeginsel[wysig | wysig bron]

Hemelliggame straal elektromagnetiese straling uit wat opgevang of bespeur kan word met die regte toerusting soos 'n radioteleskoop. 'n Radioteleskoop bestaan uit skottelantennes en stralingsvlakantennes wat die hele spektrum dek. Al die radioteleskope word met 'n sentrale beheer-en-verwerkingskantoor verbind deur kabels van optiese vesel. Die inligting word hier met rekenaars verwerk om ’n beeld te skep wat vir die mens duidelik is. Die spektrum van die radioteleskoop is baie wyer as wat deur ’n optiese teleskoop gesien kan word. Optiese vesel word verkies bo koper omdat dit bestand is teen elektromagnetiese straling, soos weerlig.

Liggings[wysig | wysig bron]

Kaart van deelnemende lande.

Die SKA-hoofkwartier sal in Cheshire, Engeland, wees[7] terwyl die teleskope hoofsaaklik in Suid-Afrika en Australië opgerig sal word.[8] Die sentrale rekenaar sal 'n verwerkingsvermoë van 100 miljoen persoonlike rekenaars hê en sal 1018 opdragte per sekonde kan verwerk.

Australië[wysig | wysig bron]

'n Klomp klein, laefrekwensie-stralingsvlakantennes sal in Australië opgerig word tydens Fase 1. Die tipe antenne is sowat 1,5 m hoog. Daar sal ook sestig hoëfrekwensieskottelantennes in Australië opgerig word as deel van Fase 1. Dié antennes is sowat 15 m hoog.

Terwyl Nieu-Seeland lid van die SKA-organisasie bly, lyk dit of geen antennas daar opgerig sal word nie.[9]

Suid-Afrika[wysig | wysig bron]

Tydens Fase 1 sal ongeveer 190 antennas opgerig word. Tydens Fase 2 sal 3 000 skottelantennes in Suid-Afrika opgerig word. Al die antennes sal in die Noord-Kaap wees, in die gebied suid van die N14, wes van Upington, suidwes van die N10 tussen Upington en waar die N10 die N12 kruis, wes van die N12 en Victoria-Wes en weswaarts van Brandvlei en Williston. Hierdie gebied is spesifiek gekies omdat daar min magnetiese versteurings is soos in stedelike gebiede ondervind word. Suid-Afrika se aandeel in die SKA is verreweg die grootste.

Ander stasies in Afrika suid van die Sahara sal in Botswana, Ghana, Kenia, Madagaskar, Mauritius, Mosambiek, Namibië en Zambië opgerig word.

Verwysings[wysig | wysig bron]

  1. "Facts and figures". SKA Organisation. Besoek op 26 Mei 2012. 
  2. (2014) “Philip Diamond plenary: The Square Kilometre Array: A Physics Machine for the 21st Century”. SPIE Newsroom. doi:10.1117/2.3201407.12.
  3. Amos, Jonathan (25 Mei 2012). "Africa and Australasia to share Square Kilometre Array". BBC. 
  4. "The project timeline". SKA Organisation. Geargiveer vanaf die oorspronklike op 17 September 2012. Besoek op 28 October 2014. 
  5. "SKA site bid outcome". SKA Africa. Geargiveer vanaf die oorspronklike op 26 Junie 2014. Besoek op 28 Oktober 2014. 
  6. "SKA Project". SKA Organisation. Besoek op 28 Oktober 2014. 
  7. "Construction starts on SKA Organisation headquarters". SKA Organisation. 18 April 2012. Besoek op 26 May 2012. 
  8. Co-hosting the SKA. SKA
  9. "Australia - SKA Telescope". SKA. 2014. Besoek op 22 Mei 2014. 

Ander bronne[wysig | wysig bron]

  • Beeld. Grootste deel van SKA-projek hier gevestig. SA, jou ster! 26 Mei 2012
  • Rapport. SKA-besluit 'beste skikking'. 27 Mei 2012
  • Quest. Africa celebrates SKA bid outcome Vol 8. Number 2. ISSN 1729-830X

Eksterne skakels[wysig | wysig bron]