Safari (ekspedisie)

in Wikipedia, die vrye ensiklopedie
Wildbesigtiging in die Sabi Sabi-wildreservaat, Mpumalanga, Suid-Afrika
'n Safaririt in die Tsavo-Oos Nasionale Park, Kenia

'n Safari is 'n jag-, foto- of filmekspedisie. Die woord kom van Swahili, waar dit lang reis beteken. Dit is uiteindelik weer van die Arabiese woord سفر (safar) ontleen, wat reis beteken.

Tydens 'n jagsafari reis die jagter, alleen of deur helpers vergesel, 'n aantal dae of weke deur die bos of woud om grootwild te jag. Die diere wat geskiet word se koppe word opgestop of julle velle gebrei en as trofeë geneem (sien taksidermie).

Deesdae word die term "safari" algemeen gebruik om na ritte in Afrika se wildparke te verwys. Tydens hierdie ritte besigtig die toeriste die diere in hul natuurlike habitat. Sulke safari's word gewoonlik deur 'n veldwagter gelei, wat die besoekers oor die veld en natuurlewe vertel. Die meeste diere word gewoonlik teen sonop of laatmiddag voor sononder gesien. Tydens hierdie ritte kan die diere met 'n kamera of video-opnemer afgeneem word.

Die term word ook gebruik om ander ekspedisies aan te dui, soos 'n safari na die Noordpool.