Seweweekspoort

Seweweekspoort
Die noordingang tot die poort in die Klein-Swartberge
Seweweekspoort
Koördinate: 33°24′49″S 21°24′25″O
Ligging	Tussen Laingsburg en Calitzdorp
Maksimumhelling	1:14
Hoogte	1 018 m
Lengte	17 km
Oppervlak	gruis
Begin in	1850’s
Voltooi in	1862
Pad	R323, verbind N1 met R62

Seweweekspoort lê op die R323-streeksroete, ’n verbindingspad tussen die N1 by Laingsburg in die Koup en die R62-provinsiale roete naby Calitzdorp en Ladismith in die Klein-Karoo.

Roete

Die pad gaan by die voormalige sendingstasie Amaliënstein noordwaarts deur ’n poort van 17 km wat deur die Seweweekspoortrivier (ook Huisrivier genoem) in die Klein-Swartberge gevorm is. Op 1 018 m bereik die poort sy hoogste punt. Die maksimumhelling is 1:14. Die pad steek die loop van hierdie westelike tak van die Gamkarivier 30 keer oor. Daarom is die poort tydens en na reën dikwels onbegaanbaar. Toerisme vorm die grootste verkeer op die roete weens die besondere ongerepte natuurskoon.

Naam

'n Bergfiets-uitdaagrit in die poort

Verskeie teorieë bestaan oor die oorsprong van die naam vir die poort. Die aanneemlikste is dat dit na eerw. Louis Zerwick van die Berlynse Sendinggenootskap vernoem is. Hy was waarskynlik werksaam by Amaliënstein en Zoar. In die volksmond het Zerwickspoort deur die jare heen Seweweekspoort geword, want die bevolking was reeds met die seweweeksvaring bekend.

Geskiedenis

In die 1850's is daar met behulp van gevangene-arbeid begin om die pad langs die rivierloop te bou. Na weinig vordering is die taak in 1860 aan A.G. de Smidt, swaer van Thomas Bain opgedra. Die pad is in November 1862 voltooi en is steeds in gebruik.

Trivia

Seweweekspoortpiek (2325 m), 24 km van Ladismith, is die hoogste piek in die Wes-Kaap.

Sien ook

• Lys van bergpasse in Suid-Afrika

Bibliografie

• Die Burger, 11 Mei 1973
• Erasmus, B.P.J.: Op Pad in Suid-Afrika. Jeppestown: Ball, 2010. ISBN 978-1-86842-149-7
• Ross, Graham: The romance of Cape mountain passes. Kaapstad: Sunbird, 2011. ISBN 978-1-920289-51-5
• Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X