Napier

NG Kerk Napier

Napier se hoofstraat, Sarel Cilliersstraat.

Napier, is 'n klein dorpie in die Overberg in die Wes-Kaap, Suid-Afrika. Die dorp wat langs die Soetmuisberg geleë is word omring deur golwende koring- en garslande.

Die dorp is in 1838 gestig na aanleiding van 'n dispuut tussen twee bure, Michiel van Breda en Pieter Voltelyn van der Byl, oor die ligging van die gemeenskapskerk. Dit het daartoe gelei dat twee kerke opgerig is in twee verskillende dorpe, Napier, en Bredasdorp. Napier is vernoem na die destydse goewerneur van die Kaapkolonie, Sir George Thomas Napier. Aan die begin van die 20ste eeu het gouddelwers op die plaas Hansiesrivier geprospekteer en is die Napier Gold Mining Company gevestig. Hoewel aandele uitgereik is het dit slegs 'n kortstondige bestaan gehad.

Die dorp het tans ongeveer 2 500 inwoners. Behalwe vir die Nederduitse Gereformeerde Kerk is daar ook heelwat winkels en ander besighede insluitend 'n paar restaurante en kafees. Die aangename mengsel van eeue oue huisies en meer moderne huise en die landelike atmosfeer het daartoe gelei dat die dorpie 'n gewilde naweekbestemming vir stadsinwoners geword het.

Eksterne skakels

• Napier op View Overberg