Napier

in Wikipedia, die vrye ensiklopedie
Hierdie artikel handel oor die dorp in die Wes-Kaap. Vir die stad in Nieu-Seeland, sien Napier, Nieu-Seeland.
Napier
Die NG Kerk in die hoofstraat van Napier
Die NG Kerk in die hoofstraat van Napier
Napier is in Wes-Kaap
Napier
Napier
 Napier se ligging in Wes-Kaap
Koördinate: 34°28′S 19°54′O / 34.467°S 19.900°O / -34.467; 19.900Koördinate: 34°28′S 19°54′O / 34.467°S 19.900°O / -34.467; 19.900
LandVlag van Suid-Afrika Suid-Afrika
ProvinsieWes-Kaap
DistrikOverberg
MunisipaliteitKaap Agulhas
Stigting1838[1]
Oppervlak
 • Totaal23,04 km2 (8,90 vk. myl)
Bevolking
 (2011)[2]
 • Totaal4 214
 • Digtheid183/km2 (470/vk. myl)
Rasverdeling (2011)
 • Wit mense21.8*
 • Indiërs/Asiërs0.5%
 • Bruin mense66.6%
 • Swart mense10.6%
 • Ander0.6%
Taal (2011)
 • Afrikaans 80.4%
 • Engels 11.0%
 • Xhosa 5.9%
 • Ander 2.7%
Poskode (strate)
7270
Skakelkode028

Napier is ’n dorpie in Kaap Agulhas Munisipaliteit, binne die Overberg Distriksmunisipaliteit, Wes-Kaap, Suid-Afrika. Dit is sowat 16 km wes van Bredasdorp en 58 km suidoos van Caledon geleë en is ongeveer 111 meter bo seevlak. Dit het ongeveer 4 200 inwoners. Die dorp wat langs die Soetmuisberg geleë is word omring deur golwende koring- en garslande. Die R316-streeksroete gaan deur die dorp.

Geskiedenis[wysig | wysig bron]

NG kerk Napier, ontwerp deur Wynand Louw.

In 1833 besluit die Nederduitse Gereformeerde Kerk in Swellendam om ’n nuwe kerk op te rig om in die behoeftes van die gemeentelede aan die suide te voorsien.

Oor die ligging van die gemeenskapskerk was daar ’n geskil tussen twee bure, Michiel van Breda en Pieter Voltelyn van der Byl, ontlok. Die een party mense het hul geskaar by Van Breda, dat die kerk op die plaas Langefontein opgerig moet word, terwyl die ander hul tot Van der Byl se voorgestelde plaas, Klipdrift, gewend het. Geen vergelyk kon bereik word nie; dit lei toe daartoe dat twee kerke opgerig is in twee verskillende dorpe, Napier en Bredasdorp, slegs 16 km uitmekaar. Napier is amptelik in 1838 gestig.

Langefontein is vir £850 gekoop en die eerste erwe is op 16 Mei 1838 verkoop. Die plaas Klipdrift is vir £1 000 gekoop en die eerste erwe is op 12 April 1838 verkoop. Napier is vernoem na die destydse goewerneur van die Kaapkolonie (1837–1844), Sir George Thomas Napier.

Aan die begin van die 20ste eeu het gouddelwers op die plaas Hansiesrivier geprospekteer en is die Napier Gold Mining Company gevestig. Hoewel aandele uitgereik is, het dit slegs 'n kortstondige bestaan gehad.

Die bevolking het sedert 1875 se 448 inwoners geleidelik gegroei: 539 in 1891, 761 in 1904, tot 2 554 inwoners in 2006. Vroeërjare was die dorp se ambagsmanne hoofsaaklik grofsmede gewees. Die Wes-Kaapse onderwysdepartement het egter die Hoërskool Napier amptelik gesluit op 31 Desember 2010.[3]

Besienswaardighede[wysig | wysig bron]

  • Die Nederduitse Gereformeerde Kerk is in die vorm van ’n Griekse kruis gebou, met ’n gesogte kiaathout binne-afwerking.
  • Die Feeshuis is een van die oudste geboue in Napier en is tussen 1810 tot 1920 as ’n slawekwartier gebruik, alvorens dit in ’n wynkelder omskep is. Dit is in 1988 gerestoureer om die dorp se 150ste bestaansjaar te herdenk.
  • Die Ossewamonument is in 1988 opgerig ter herinnering aan die Groot Trek in 1838.
  • Die grootste sonnewyser in die Kaapse streek is in 1965 deur Danie du Toit gemaak. Dit is naby die dorp se munisipale kantore te sien.
  • By Rose Boats & Toys Museum kan handgemaakte blikspeelgoed besigtig word.
  • Behalwe vir die NG Kerk is daar ook heelwat winkels en ander besighede, wat ’n paar restaurante en kafees insluit. Die aangename mengsel van eeue oue huisies en meer moderne huise en die landelike atmosfeer het daartoe gelei dat die dorpie ’n gewilde naweekbestemming vir stadsinwoners geword het.
  • Jaarlikse feestelike geleenthede sluit die Patatfees in Juniemaand in, sowel as die Lente Ponieskou in September, Die Voet van Afrika Marathon in Oktober en die Napier Kabaretfees.

Sien ook[wysig | wysig bron]

Verwysings[wysig | wysig bron]

  1. (en) "Chronological order of town establishment in South Africa based on Floyd (1960:20-26)" (PDF). pp. xlv–lii. Geargiveer (PDF) vanaf die oorspronklike op 13 Julie 2019. Besoek op 21 April 2016.
  2. 2,0 2,1 2,2 2,3 "Hoofplek Napier". Sensus 2011.
  3. "Wes-Kaapse Provinsiale Koerant" (PDF). Geargiveer vanaf die oorspronklike (PDF) op 2 September 2011. Besoek op 5 Augustus 2011.

Eksterne skakels[wysig | wysig bron]