Spitalfields

in Wikipedia, die vrye ensiklopedie
Spitalfields
Buurt
Christ Church, Spitalfields
Christ Church, Spitalfields
Spitalfields is in Groter Londen
Spitalfields
Spitalfields
Koördinate: 51°30′59″N 0°04′30″W / 51.51639°N 0.07500°W / 51.51639; -0.07500
LandVlag van Verenigde Koninkryk Verenigde Koninkryk
Land Engeland
GraafskapGroter Londen
BoroughTower Hamlets
TydsoneUTC±00:00 (MGT)
 • SomertydUTC+01:00 (BST)
Poskode
E1
Skakelkodes020
The Ten Bells in Commercial Street. Hier het die laat-Victoriaanse reeksmoordenaar Jack the Ripper na bewering kennis gemaak met sy latere slagoffers

Spitalfields [ˈspɪtəl'fiːldz] is 'n voormalige parogie in die Londense administratiewe distrik Tower Hamlets (London Borough of Tower Hamlets) wat gedeeltelik in Sentraal-Londen en gedeeltelik in die East End van Londen naby Liverpool-stasie en Brick Lane geleë is.

Die buurt is aan weerskante van Commercial Street geleë en huisves verskeie markte, waaronder die historiese Old Spitalfields Market, Brick Lane Market en Cheshire Street. Petticoat Lane Market is langs die buurt se suidwestelike grens geleë. Vir die meeste moderne Londenaars word Spitalfields in die weste deur Bishopsgate, Bethnal Green Road in die noorde en Wentworth Street en Old Montague Street in die suide begrens, met vloeiende grense in die weste waar dit - in die klein straatjies en oop ruimtes tussen Brick Lane en Vallance Road - geleidelik oorgaan na Bethnal Green en Whitechapel.[1]

Ondanks die oprigting van moderne monolitiese kantoorgeboue uit glas en staal as deel van 'n proses waardeur Londen tradisionele finansiële distrik vanuit die City of London na aangrensende buurte begin uitbrei het, het die atmosfeer en karakter van Victoriaanse Spitalfields op plekke bewaar gebly. Een van Spitalfields se historiese kroeë, The Ten Bells, word met die geheimsinnige reeksmoordenaar Jack the Ripper verbind. Die huis waar een van sy slagoffers, Annie Chapman, vermoor is, was hier geleë. Baie van die polisieondersoeke met betrekking tot die Ripper-moorde is in Spitalfields deurgevoer.[2]

Spitalfields het sy naam aan St. Mary's Spittel te danke - 'n hospitaal en klooster wat in 1197 gestig is. In 'n veld vlakby die klooster is die beroemde Spitalfields Market vir die eerste keer in die 13de eeu gehou. In die moderne tyd bekend as vrugte- en groentemark, wat deur die City of London Corporation bestuur word, is dit in 1991 as New Spitalfields Market na Leyton verskuif nadat die historiese markterrein te klein geraak het.

Spitalfields staan bekend vir die gemeenskapsgees wat sy bewoners ontwikkel het.[3] In 1976 het een van die Verenigde Koninkryk se bekendste en mees gewaardeerde historici, Dan Cruickshank, wat 'n vroeg-18de eeuse Georgiaanse stadhuis in Spitalfields se Elder Street gekoop het en dit met sy gesin bewoon, met vriende saamgespan om die Spitalfields Historic Buildings Trust te vestig om die buurt se argitektoniese erfenis te bewaar. Ironies genoeg is Spitalfields, hoe aantrekliker die buurt danksy die Trust se inisiatiewe geword het, hoe meer blootgestel aan gentrifikasie.

Bekende boorlinge[wysig | wysig bron]

Verwysings[wysig | wysig bron]

  1. Dan Cruickshank: Spitalfields. The History of a Nation in a Handful of Streets. London: Windmill Books 2017, bl. xv
  2. The Jack the Ripper Tour: Victorian Spitalfields. Besoek op 25 Augustus 2019
  3. www.spitalfields.co.uk: Spitalfields History. Besoek op 13 Januarie 2016