Trouw
Trouw is 'n Nederlandse koerant. Dit is in 1943 tydens die Tweede Wêreldoorlog gestig as 'n ortodokse Protestantse ondergrondse koerant. Dit word sedert 2009 besit deur DPG Media [1] (tot 2019 bekend as De Persgroep). Die hoofkwartier is geleë in Jacob Bontiusplaats 9 [2]. Cees van der Laan is tans die hoofredakteur.[3]
In 2012 het dit die Europese Koerant-toekenning ontvang.[4][5]
Geskiedenis[wysig | wysig bron]
Die naam van die koerant is destyds gekies om getrouheid en lojaliteit aan God en land te weerspieël, ondanks die Duitsers se besetting van Nederland.
Trouw is tydens die Tweede Wêreldoorlog deur lede van die Nederlandse Protestantse weerstandsbeweging gestig. Honderde mense wat betrokke was by die vervaardiging en verspreiding van die koerant is tydens die oorlog in hegtenis geneem en van kant gemaak. Die koerant is tydens die oorlog weens 'n gebrek aan papier met ongereeldheid gepubliseer. In 1944 het die Duitse besettingsmagte probeer om die publikasie daarvan in die wiele te ry deur 23 van die koerant se koeriers gevange te neem. Hulle het 'n ultimatum aan die leiers van Trouw gerig; die redaksie het egter nie aan die Duitsers se eise toegegee nie, en gevolglik is al die gevanges tereggestel. Wim Speelman, die medestigter van Trou, was een van die persone wat tydens die oorlog sy lewe verloor het weens betrokkenheid by die koerant. [6]
Na die oorlog het die blad 'n dagblad geword. In 1967 het die hoofredakteur van die koerant dit duidelik gemaak dat Trouw nie slegs 'n koerant vir Christene moes wees nie; dit moes 'n koerant vir almal wees. Met verloop van tyd het die persentasie lesers van Trouw wat tot die Gereformeerde kerke behoort aansienlik gekrimp: in 1965 het 69% van die lesers tot een van die kerke behoort, maar teen 1979 het dit gedaal tot 48% en teen 1999 tot 28%. Die sirkulasie aan die einde van die 20ste eeu was bietjie meer as 133,000. [7]
Op 3 Februarie 2005 het Trouw sy formaat van breëblad na kompak verander. [8] Die koerant het in 2005 in sy eie woorde gesê dat dit hul voorneme is om " 'n koerant te bly wat gewortel is in 'n Christelike tradisie, en om 'n bron van nadenke en inspirasie te wees vir almal, kerkgangers of nie, wat die behoefte het aan morele en geestelike onderskraging." [9]
Vandag is Trouw deel van De Persgroep Nederland, welke naam aan die voormalige PCM-groep gegee is nadat die Belgiese uitgewery De Persgroep in die somer van 2009 'n meerderheidsbelang in PCM gekoop het. NRC Handelsblad, Het AD, Het Parool en de Volkskrant behoort ook aan De Persgroep Nederland.
Verwysings[wysig | wysig bron]
- ↑ Trouw (in Nederlands), DPG Media. Opgespoor op 12 Januarie 2020.
- ↑ Contact (in Nederlands), Trouw. Opgespoor op 12 Januarie 2020.
- ↑ Loes Reijmer, "Cees van der Laan nieuwe hoofdredacteur Trouw" (in Nederlands), de Volkskrant, 13 Desember 2013. Opgespoor op 1 November 2017.
- ↑ "Case Study "Trouw": The new profundity in the newspaper – with daily supplements". European Newspaper Congress. 2013. Geargiveer vanaf die oorspronklike op 2 Januarie 2015.
- ↑ "European Newspaper of the Year - Category Nationwide Newspaper - Trouw, the Netherlands". Editorial Design. 2012. Geargiveer vanaf die oorspronklike op 6 Desember 2012. Besoek op 4 Maart 2014.
- ↑ "The illegal press". Dutch Resistance Museum. 2014. Geargiveer vanaf die oorspronklike op 26 Januarie 2021. Besoek op 4 Maart 2014.
- ↑ Jan de Bas (2003). Een mijter zonder kruis: Sint-Nicolaas in de protestantse pers 1945-2000. Verloren. p. 29. ISBN 9789065507709.
- ↑ "Netherlands: National daily Trouw to go compact". Editors Weblog. 30 November 2004. Besoek op 5 Februarie 2015.
- ↑ "Trouw - nieuws, verdieping en gids". De Persgroep Nederland. 18 Augustus 2005. Besoek op 4 Maart 2014.
Eksterne skakels[wysig | wysig bron]
 |
Wikimedia Commons bevat media in verband met Trouw. |
- Amptelike webwerf (in Nederlands)
- Illegale Trouw (in Nederlands), ondergrondse uitgawes wat tussen 1943 en 1945 uitgegee is
