Walter Röhrl

in Wikipedia, die vrye ensiklopedie
Jump to navigation Jump to search
Walter Röhrl
’n Beeld van die betrokke persoonlikheid.
Röhrl by die Retro Classics in Stuttgart, Duitsland 2012-03-23

Gebore 7 Maart 1947
Regensburg
Nasionaliteit Vlag van Duitsland Duitsland
Beroep Motorrenjaer
Bekend vir 1980 en 1982 Wêreldtydrenbestuurderskampioen

Walter Röhrl (gebore 7 Maart 1947 in Regensburg) is 'n voormalige Duitse tydren- en motorrenkampioen, met oorwinnings vir Fiat, Opel, Lancia en Audi asook Porsche, Ford en BMW.

Röhrl was 'n gunsteling in die wêreldtydrenkampioenskap dwarsdeur die 1970s en 1980s, en wen die Monte Carlo-tydren vierkeer met vier verskillende motorfabrikate. Sy medebestuurder vir etlike jare was Christian Geistdörfer. Sy Fiat 131 Abarth het hom getrou gevoer na die 1980-titel, en hy beklink die kampioenskap met 'n oorwinning in daardie jaar se San Remo-tydren.

Dit was egter sy klinkende sukses in 1982 wat die meeste aanhangers van die sport met Röhrl beïndruk gelaat het. Hy het eiehandig 'n reuse aanslag van die vierwieldryfopposisie, gelei deur Audi se opkomende Michèle Mouton, afgeweer. Hy het die titel bloot verower op grond van sy konsekwentheid, en dit in sy toenemend verouderde Opel Ascona 400.

Dit was ook gedurende hierdie tyd dat hy die Afrika-tydrenkampioenskap gewen het, in 1982. Maar kort ná hy die kampioenskap gewen het, is hy deur spanbestuurder Tony Fall afgedank uit die span as gevolg van die feit dat hy 'n hekel ontwikkel het om in die RAC-tydren te jaag (hy het weinig sukses in die RAC-tydrenne gehad). Röhrl het toe reeds hewige rusies met Fall gehad oor publisiteitaktiwiteite vir die span se borg, die Rothmans tabakmaatskappy. Röhrl, synde 'n streng nie-roker, het botweg geweier om enige verfilming vir Rothmans se publisiteitskote te doen. Hy beweer dat hy gehuur is as 'n bestuurder en nie 'n akteur nie, en dat hy nie die sin kon sien in tabakbemarking as 'n nie-roker nie.