Zinfandel

in Wikipedia, die vrye ensiklopedie
Zinfandel-druiwe in 'n wingerd in Amador County, Kalifornië
Zinfandel-rooiwyn uit die Kaliforniese Amador County

Zinfandel (in Italië en Duitsland ook bekend as Primitivo, in Kroasië Crljenak Kaštelanski genoem) is 'n rooiwynkultivar wat sy oorsprong in die Kroatiese streek Dalmasië het, maar vandag veral met wyne uit Kalifornië verbind word waar dit danksy gunstige klimaattoestande met warm, sonnige weer en droë lug tot die belangrikste kultivar naas Cabernet Sauvignon en Merlot ontwikkel het en op sowat tien persent van die wingerde (of sowat 20 000 hektaar[1]) verbou word.

Zinfandel lewer aromatiese donker rooiwyne op met tipiese geure van kaneel, naeltjies, swart peper, vanielje, neutmuskaat, tabak, vygies en donker bosbessies.[2] Die kultivar is egter ook geskik vir rosé- of witwyne.

Zinfandel, wat in die eerste helfte van die 19de eeu in die Verenigde State ingevoer is en vanaf 1850 in Kalifornië gewild geraak het, het sy naam aan 'n verwarring te danke. So is daar oorspronklik aangeneem dat die kultivar geneties verwant sou wees met die Zierfandler, 'n wit kultivar uit Oostenryk. Later het wynboukundiges dit as geneties identies beskryf met die Suid-Italiaanse kultivar Primitivo di Gioia uit Apulië wat op sy beurt moontlik uit die Kroatiese Crljenak gekweek is.[3] Dit is daarnaas nou verwant met die Kroatiese kultivar Plavac Mali.

Buite Kalifornië word die Zinfandel-kultivar ook in die deelstate Arizona, Nieu-Meksiko, Oregon en Texas verbou. Belangrike oorsese produsente is Suid-Afrika en Australië.

In Suid-Afrika word Zinfandel-wyne hoofsaaklik in die omgewing van Stellenbosch gekelder. Die baanbreker vir Zinfandel was die wyngoed Blaauwklippen, gestig in 1692 as een van die oudste wynplase aan die Kaap en geleë aan die voet van die Stellenboschberge. Die kultivar word hier sedert 1978 verbou - tans op sowat 90 hektaar. Tans is daar drie Zinfandel-produkte: 'n klassieke rooiwyn, 'n laat oes en - sedert 2007 - Suid-Afrika se eerste Zinfandel-witwyn.

Verwysings[wysig | wysig bron]