Berlinale

in Wikipedia, die vrye ensiklopedie
Spring na: navigasie, soek
Die Berlinale Palast in Berlyn

Die Berlinale (Internationale Filmfestspiele) van Berlyn (Duitsland) is 'n A-kategorie-filmfees wat jaarliks gehou word en as een van die beduidendste kompetisies vir nuwe filmproduksies ter wêreld beskou word.[1] Met meer as 230 000 kaartjies wat jaarliks verkoop word en sowat 430 000 besoeke wat aan die deelnemende rolprentteaters afgelê word is die Berlinale die grootste internasionale filmfees wat oop staan vir die algemene publiek.[2]

Tydens die Berlinale word jaarliks sowat 400 nuwe rolprente in verskillende kategorieë vertoon. Die suksesvolle kandidate, wat deur 'n internasionale jurie benoem word, word met 'n Goldener Bär ("Goue Beer") of Silberner Bär ("Silwerbeer") bekroon.

Die Berlinale word jaarliks deur sowat 20 000 professionele besoekers uit 120 lande bygewoon. Sowat 4 200 joernaliste dek die gebeure op die filmfees vir media in meer as 100 lande.[3]

Die European Film Market (EFM), wat jaarliks saam met die Berlinale gehou word, is een van die beduidendste internasionale byeenkomste en handelskoue van die rolprentbedryf.[4]

Die Berlinale is vir die eerste keer in 1951 gehou. Dieter Kosslick fungeer sedert 2001 as direkteur van die filmfees. Die Berlinale is tans die belangrikste jaarlikse kulturele gebeurtenis van die Duitse hoofstad.[5] Die Berlinale word sedert 2002 deur die Kulturveranstaltungen des Bundes in Berlin GmbH, 'n federale Duitse onderneming, beheer en sowel deur die federale Duitse regering asook privaat borge befonds.[6] Die 62ste Berlinale word tussen 9 en 19 Februarie 2012 gehou.

Inhoud

Berlinale 2005 [wysig]

Die Goldener Bär ("Goue Beer")

Die Berlinale 2005 is die 55ste filmfees in Berlyn en die vierde onder die leiding van die Berlinale-direkteur Dieter Kosslick. 3 320 inskrywings is ontvang waarvan 400 produksies vir die kompetisie gekeur is. 21 rolprente is in die hoofkompetisie vertoon en het meegeding om een van die Goue en Silwerbere van die Berlinale te wen.

Buite die kompetisie is daar talle forums vir dokumentêre en ander films asook die jaarlikse Retrospektive. In 2005 behandel dit die ontwerp van produksies (Production Design + Film). Die Talentcampus gee jonger filmmakers 'n kans om hul rolprente aan die publiek en kritici bekend te stel.

Suid-Afrika se inskrywing U-Carmen e-Khayelitsha van die regisseur Mark Dornford-May is aangewys as die beste film en het die "Goldener Bär" (Goue Beer) gewen. Die rolprent bied George Bizet se opera "Carmen" in Xhosa aan, en ook die handeling is aangepas aan 'n Suid-Afrikaanse omgewing. Die hoofrol word gespeel deur die Suid-Afrikaanse operasangeres Pauline Malefane.

Pauline Malefane het tydens haar dankbetuiging in Xhosa gepraat en ook 'n a-cappella-liedjie vir die gehoor gesing.

Ook die Frans-Brits-Suid-Afrikaanse koproduksie Man to Man is in die kompetisie vertoon.

Die belangrikste ander pryswenners van 2005 is:

  • Silberner Bär (Silwerbeer): Peacock van Gu Changwei (Volksrepubliek van Sjina)
  • Beste aktrise (Silwerbeer): Julia Jentsch vir haar rol in Sophie Scholl - Die letzten Tage (Duitsland)
  • Beste akteur (Silwerbeer): Lou Taylor Pucci vir sy rol in Thumbsucker (VSA)
  • Beste regisseur (Silwerbeer): Marc Rothemund vir sy film Sophie Scholl - Die letzten Tage (Duitsland)
  • Beste filmmusiek (Silwerbeer): Alexandre Desplat (Frankryk)

Berlinale 2006 [wysig]

Ná 'n rolprentvertoning kry die gehoor dikwels die geleentheid om met die regisseur en produsent te diskuteer

Die 56ste filmfees is volgens die organisators ook 'n ekonomiese sukses - met sowat 150 000 kaartjies is 10 000 meer verkoop as in die voorjaar.

Die pryswenners van die jaar 2006 maak duidelik dat die Berlinale ook 'n onmiskenbare politieke ondertoon het. Die Goue Beer vir die beste film is toegeken aan Jasmila Zbanic se rolprent Grbavica, wat die storie van 'n jong vrou uit Bosnië-Herzegowina vertel. Sy is een van die slagoffers van die massaverkragtings tydens die Balkaanoorlog en baar later 'n meisie wat eers as 'n tiener die waarheid oor haar vader hoor.

Michael Winterbottom en Mat Whitecross uit die Verenigde Koninkryk het die Silwerbeer vir hulle dokumentêre drama The Road to Guantánamo gewen. Dit handel oor 'n groep Europeërs van Arabiese afkoms, wat in Afghanistan daarvan verdink word om lede van die terroristegroep Al Kaïda te wees. Amerikaners ïnterneer en folter die verdagtes.

Ander belangrike pryswenners is:

  • Silberner Bär (Großer Preis der Jury): En Soap (Denemarke) en Offside (Iran)
  • Silberner Bär (Beste aktrise): Sandra Hüller in Requiem (Duitsland)
  • Silberner Bär (Beste akteur): Moritz Bleibtreu in Elementarteilchen (Duitsland)
  • Silberner Bär (Beste prestasie): Jürgen Vogel in Der freie Wille (Duitsland)
  • Silberner Bär (Beste filmmusiek): Peter Kam se Isabella (Volksrepubliek van Sjina)

Berlinale 2007 [wysig]

Wenner van die Goue Beer as beste film: Tuyas Hochzeit

Ander pryswenners (Silwerbere):

  • Groot prys van die jurie: El Otro
  • Beste regisseur: Joseph Cedar vir Beaufort
  • Beste aktrise: Nina Hoss vir Yella
  • Beste akteur: Julio Chávez vir El Otro
  • Buitengewone prestasie as kunstenaar: Die akteurs van Der gute Hirte
  • Beste filmmusiek: Hallam Foe - This Is My Story
  • Alfred-Bauer-prys: Park Chan-wook vir I'm a Cyborg, But That's OK
  • FIPRESCI-prys: Jiří Menzel vir Obsluhoval jsem anglického krále ("Ek het die Engelse koning bedien")
  • Prys van die Ekumeniese Jurie: Tuyas Ehe
  • Prys van die Gilde van Duitse Filmkunsteaters: Hallam Foe

Berlinale 2008 [wysig]

Die Goue Beer is aan die Brasiliaanse film Tropa de Elite van die regisseur José Padilha toegeken.

Die ander pryswenners (Silwerbere) was:

  • Beste regisseur: Paul Thomas Anderson vir sy rolprent There Will Be Blood
  • Groot prys van die jurie: Errol Morris vir S.O.P. Standard Operating Procedure
  • Beste akteur: Reza Najie vir Avaze Gonjeshk-ha
  • Beste aktrise: Sally Hawkins vir Happy-Go-Lucky
  • Beste draaiboek: Wang Xiaoshuai vir Zuo you
  • Buitengewone prestasie as kunstenaar: Jonny Greenwood vir There Will Be Blood
  • Alfred-Bauer-prys: Lake Tahoe van Fernando Eimbcke

Berlinale 2009 [wysig]

Program [wysig]

Tilda Swinton (hier tydens die Edinburgh Film Fesival van 2007) is as voorsitter van die beoordelaarspaneel aangewys

Vir die Berlinale 2009 is die Skotse aktrise Tilda Swinton as voorsitter van die beoordelaarspaneel aangewys.

Met die Duitse sterregisseur Tom Tykwer se nuwe film The International, wat buite die kompetisie vertoon word, is 'n wêreldpremière as openingsrolprent van die 59ste Berlinale-filmfees aangebied. In hierdie aksieriller met Clive Owen, Naomi Watts en Armin Mueller-Stahl in die hoofrolle probeer 'n Interpol-agent en 'n vroulike advokaat die kriminele bedrywighede van 'n magtige bankmaatskappy te ontmasker. Die rolprent het waarderende applous van sowat 1 600 toeskouers ontlok.

Ander Duitse rolprente, wat aan die kompetisie deelgeneem het, het die regisseuse Hermine Huntgeburth se verfilming van die Theodor Fontane-roman Effi Briest met Julia Jentsch in die hoofrol en Hans-Christian Schmid se Sturm, wat die spoor van wasgoed uit Berlynse hotelle na Poolse wasserye volg, ingesluit.

Die internasionale rolprente, wat deur die feesdirekteur Dieter Kosslick en sy span saamgestel is, is as "Dokumente der Lebensbedingungen in unserer globalisierten Welt" ("Dokumente van die lewensomstandighede in ons geglobaliseerde wêreld"), aldus Kosslick, beskryf.[7]

Vir baie filmliefhebbers wat langs die rooi tapyte vergader was bekende Amerikaanse filmsterre weer een van die hooftrekpleisters. Vir die wêreldpremière van Mitchell Lichtenstein se familiegeskiedenis Happy Tears het Demi Moore en Ellen Barkin 'n besoek aan die Berlinale 2009 afgelê, terwyl Tommy Lee Jones en John Goodman, wat die hoofrolle in die Franse regisseur Bertrand Tavernier se rolprent In the Electric Mist vertolk, ook vir die wêreldpremière van hul rolprent na Berlyn gekom het.

Volgens die Berlinale-direksie is in 2009 sowat 270 000 kaartjies verkoop en 383 rolprente tydens 1 238 opvoerings vertoon.

Beoordelaarspaneel [wysig]

  • Voorsitter: Tilda Swinton (aktrise, Skotland, Verenigde Koninkryk)
  • Beoordelaars: Isabel Coixet (regisseuse en skryweres, Spanje), Gaston Kaboré (draaiboekskrywer, regisseur en produsent, Burkina Faso), Henning Mankell (skrywer, Swede), Christoph Schlingensief (rolprent-, teater- en operaregisseur, radiospel-regisseur en kunstenaar, Duitsland), Wayne Wang (regisseur en produsent, Hong Kong/VSA) en Alice Waters (voedselaktivis, meestersjef en skryweres, VSA)

Wenners [wysig]

Die Goue Beer is aan die Spaans-Peruviaanse koproduksie La teta asustada ("The Milk of Sorrow") van die regisseur Claudio Llosa toegeken.

Die ander pryswenners (Silwerbere) was:

  • Beste regisseur: Asghar Farhadi vir sy rolprent Darbareye Elly ("Alles oor Elly", Iran)
  • Groot prys van die jurie: Maren Ade (Duitsland) vir Alle anderen ("Everyone Else") en Adrián Biniez vir Gigante (Uruguay/Duitsland/Argentinië/Nederland)
  • Beste akteur: Sotigui Kouyate in Rachid Bouchareb se London River (Algerië/Frankryk/Verenigde Koninkryk)
  • Beste aktrise: Birgit Minichmayr in Alle anderen
  • Beste draaiboek: Oren Moverman en Alessandro Camon vir The Messenger (VSA)
  • Buitengewone prestasie as kunstenaar: Gábor Erdély en Tamás Székely vir die klankontwerp van Peter Strickland se rolprent Katalin Varga (Roemenië/Verenigde Koninkryk/Hongarye)
  • Alfred-Bauer-prys: Gigante van Adrián Biniez en Tatarak ("Sweet Rush", "Der Kalmus"; Pole) van Andrzej Wajda

Berlinale 2010 [wysig]

Program [wysig]

Die 60ste Berlinale-filmfees is met die wêreldpremière van Wang Quan'an se nuwe rolprent Tuan Yuan (Engelse titel: Apart Together) geopen. Wang Quan'an, 'n jong regisseur uit die VR van Sjina, het reeds in 2007 'n Goue Beer met sy fliek Tuyas Hochzeit gewen.

Tuan Yuan, 'n liefdesverhaal, handel oor Liu Yansheng, 'n oud-soldaat wat in 1949 uit Sjanghai na Taiwan vlug om aan Mao Zedong se troepe te ontsnap. Hy is egter genoodsaak om sy minnares agter te laat. Toe die twee ná dekades weer ontmoet, maak dit ou gevoelens wakker. Die hoofrolle in Tuan Yuan word deur Lu Yan, Ling Feng, Xu Cai Gen en Mo Xiaoqi vertolk.

Beoordelaarspaneel [wysig]

  • Voorsitter: Werner Herzog (regisseur, Duitsland)
  • Beoordelaars: Renée Zellweger (aktrise, rolprentvervaardiger en Oscar-pryswenner, VSA), Francesca Comencini (regisseur en skryfster, Italië), Nuruddin Farah (skrywer, Somalië), Cornelia Froboess (aktrise, Duitsland), José Maria Morales (rolprentvervaardiger, Spanje) en Yu Nan (aktrise, VR van Sjina).

Wenners [wysig]

Die Goue Beer is aan die Turkse rolprent Bal ("Heuning") van die regisseur Semih Kaplanoğlu toegeken.

Die ander pryswenners (Silwerbere) was:

  • Beste regisseur: Roman Polański (Pole/Frankryk) vir sy rolprent Ghostwriter (Frankryk, Duitsland, Verenigde Koninkryk))
  • Groot prys van die jurie: Florin Şerban (Roemenië) vir Eu când vreau să fluier, fluier
  • Beste akteur: Grigori Dobrygin en Sergei Puskepalis in Aleksei Popogrebski se Как я провёл этим летом (Kak ja prowjol etim letom/How I Ended This Summer, Russiese Federasie)
  • Beste aktrise: Shinobu Terajima in Caterpillar
  • Beste draaiboek: Wang Quan'an en Na Jin vir Tuan Yuan (VR van Sjina)
  • Buitengewone prestasie as kunstenaar: Dmitri Katchanow vir Как я провёл этим летом (Kak ja prowjol etim letom/How I Ended This Summer, Russiese Federasie)
  • Alfred-Bauer-prys: Eu când vreau să fluier, fluier van Florin Şerban
  • Prys vir die beste debuut: Sebbe van Babak Najafi

Berlinale 2011 [wysig]

Beoordelaarspaneel [wysig]

Asghar Farhadi, wenner van die Goue Beer in 2011
  • Voorsitter: Isabella Rosselin (Italiaanse aktrise)
  • Beoordelaars: Jan Chapman (Australiese rolprentvervaardiger), Nina Hoss (Duitse aktrise), Aamir Khan (Indiese akteur en regisseur), Guy Maddin (Kanadese regisseur en draaiboekskrywer), Jafar Panahi (Iranse regisseur); alhoewel hy intussen 'n tronkstraf en beroepsverbod opgelê is, is sy nominasie uit solidariteit bevestig, en Sandy Powell (Britse kostuummaker)

Wenners [wysig]

Die Goue Beer is aan die Iranse rolprent Nader and Simin, A Separation van die regisseur Asghar Farhadi toegeken.

Die ander pryswenners (Silwerbere) was:

  • Beste regisseur: Ulrich Köhler (Duitsland) vir sy rolprent Schlafkrankheit
  • Groot prys van die jurie: Belá Tarr (Hongarye) vir A Torinói Ló
  • Beste akteur: Peyman Moadi, Babak Karimi en Ali-Asghar Shahbazi (Nader and Simin, A Separation)
  • Beste aktrise: Leila Hatami, Sareh Bayat, Sarina Farhadi en Kimia Hosseini (Nader and Simin, A Separation)
  • Beste draaiboek: Joshua Marston en Andamion Murataj (VSA) vir The Forgiveness of Blood
  • Buitengewone prestasie as kunstenaar: Wojciech Staron (kamera) en Barbara Enriquez (produksie-ontwerp) vir die Mexikaanse film El Premio
  • Alfred-Bauer-prys: Andreas Veiel (Duitsland) vir Wer wenn nicht wir
  • Prys vir die beste debuut: On the Ice van Andrew Okpeaha MacLean (VSA)

Fotogalery [wysig]

  • Berlinale Palast 2007

  • Kino International

  • Cubix Kino

  • Delphi Filmpalast

  • Wim Wenders

  • Sharon Stone

  • Denzel Washington

  • Cate Blanchett

Verwysings [wysig]

  1. ↑ 2007 CALENDAR OF FIAPF ACCREDITED* FESTIVALS, FIAPF, 18 Februarie 2008
  2. ↑ Berlinale 2007 - Zahlen und Fakten, 13 Februarie 2008
  3. ↑ Kosslick zieht positive Berlinale-Bilanz , PR-inside.com, 16 Februarie 2008
  4. ↑ Berlin Film Festival a market force, Variety, 13 Februarie 2008
  5. ↑ Das war die Berlinale, 20 Februarie 2008
  6. ↑ Kulturveranstaltungen des Bundes in Berlin GmbH, 13 Februarie 2008
  7. ↑ Menschen, Filme, Sensationen. In: Stadtkind. Das Berlin-Magazin, nommer 28, Februarie 2009, bl. 10 Aanlyn: stadtkind.de

Eksterne skakels [wysig]

Commons
Wikimedia Commons het meer media verwant aan:
Berlinale (bladsy)
Ontsluit van "http://af.wikipedia.org/w/index.php?title=Berlinale&oldid=1109400"