Darwin

in Wikipedia, die vrye ensiklopedie
Spring na: navigasie, soek
Darwin
Darwin, met die Cullen Bay-jaghawe in die voorgrond
Darwin, met die Cullen Bay-jaghawe in die voorgrond
Wapen van Darwin
Wapen
Leuse: Progrediamur
("Laat ons vorentoe gaan")
Darwin se ligging in Australië
Darwin se ligging in Australië
Land Australië
Gebied Noordelike Gebied
Distrik Palmerston County
Gevestig 1869
Regering
 - Burgemeester Graeme Sawyer
Oppervlakte
 - Totaal 112,01 km² (43,2 myl²)
Bevolking (2006)
 - Totaal 120 900
 - Digtheid 926/km² (2 398,3/myl²)
Tydsone Australiese Sentraal Standaardtyd (UTG+9:30)
Webwerf: www.darcity.nt.gov.au

Darwin is die hoofstaden grootste stad van die Noordelike Gebied (Northern Territory) van Australië. Dit is aan die See van Timor geleë en het 'n bevolking van 120 900, wat dit by verre die stad met die grootste bevolking in die yl bevolkte Noordelike Gebied maak, maar ook die yl bevolkste van Australië se hoofstede. Dit is die kleinste en mees noordelike van Australië se hoofstede en is die middelpunt van die Top End (bopunt) streek.

Darwin het gegroei van 'n pionierspos en klein hawe na een van Australië se mees moderne en multikulturele stede. Sy nabyheid aan Asië maak dit 'n belangrike toegangspunt na lande soos Indonesië en Oos-Timor. Die Stuart Highway begin in Darwin en eindig in Port Augusta in Suid-Australië.

Die stad self is op 'n laerige heuwel gebou wat oor die hawe uitkyk. Die woonbuurtes strek oor 'n groot gebied uit en begin by Lee Point in die noorde tot by Berrimah in die ooste – anderkant Berrimah gaan die Stuart Highway tot by Darwin se satellietstad, Palmerston en sy woonbuurte.

Die streek soos die res van die bopunt het 'n tropiese klimaat, met 'n nat seisoen en 'n droë seisoen. Die reënval is baie swaar tydens die nat seisoen en is welbekend vanweë sy skouspelagtige weerlig.[1]

Die oorspronklike bewoners van die groter Darwin gebied is die Larrakia mense. Op 9 September 1839 het die HMS Beagle by Darwin se hawe ingeseil toe die gebied verken is. John Clements Wickham het die streek "Port Darwin" genoem ter ere van sy voormalige skeepsmaat, die beroemde wetenskaplike Charles Darwin.

Die stad is twee keer bykans van voor af herbou, die eerste keer as gevolg van die bombardement deur die Japannese tydens die Tweede Wêreldoorlog en daarna weer toe Sikloon Tracy die stad in 1974 vernietig het. Om hierdie rede is Darwin een van Australië se mees moderne hoofstede.

Geskiedenis[wysig]

Die inboorlinge van die Larrakia taalgroep was die eerste bewoners van die groter Darwin gebied gewees.[2] Hulle het handelsroetes bedryf tot in Suidoos-Asië en het goedere ingevoer van so ver weg as Suid-Australië.

Die Hollanders het Australië se noordelike kuslyn in die 1600's besoek en die eerste Europese kaarte van die gebied geteken. Dit verduidelik ook van die Hollandse name in die gebied, soos Arnhem Land en Groote Eylandt.

Die eerste Brit wat Darwin hawe besigtig het wil voorkom asof dit Luitenant John Lort Stokes van die HMS Beagle was op die 9de September 1839. Die skeep se kaptein Kommandeur John Clements Wickham het die hawe na Charles Darwin vernoem, die Britse natuurkundige wat saam met hom 'n vroeëre vaart meegemaak het.

In die vroeë 1870's het Darwin ook die impak van die Australiese goudstormloop te Pine Creek ervaar toe werknemers van die Australian Overland Telegraph Line goud ontdek het terwyl hulle gate vir die telegraafpale gegrou het.

Vroeg in 1875 het Darwin se Europese bevolking tot ongeveer 300 gegroei as gevolg van die goudstormloop. Op 17 Februarie 1875 het die SS Gothenburg vanaf Darwin na Adelaide vertrek en het onderweg op die Groot Koraalrif skipbreuk gely. Tussen 98 en 112 mense het omgekom en omdat baie van die drenkelinge inwoners van Darwin was het die gebeurtenis 'n groot impak op die klein gemeenskap in Darwin gehad, en het dit die gemeenskap 'n lang tyd geneem om weer te herstel.[3]

Die Noordelike gebied is aanvanklik beset en geadministreer deur Suid-Australië totdat dit aan die Australiese Gemenebes in 1911 oorgedra is. Op 5 Februarie 1869 het George Goyder die Landmeter-generaal van Suid-Australië 'n klein nedersetting van 135 mense by Darwin hawe gevestig. Goyder het die nedersetting Palmerston genoem ter ere van die Britse Eerste Minister, Lord Palmerston. In 1890 is die eerste pale vir die Overland Telegraph telegraaflyn opgerig en is Australië sodoende met die res van die wêreld per telegraaf verbind. Die ontdekking van goud by Pine Creek in die 1880's het die jong kolonie se ontwikkeling verder gestimuleer. Met die oorname van die gebied se regering deur die Australiese Gemenebes het Darwin die stad se amptelike naam geword.

Tussen 1911 en 1919 het Darwin baie politieke onrus beleef, veral as gevolg van konflik met die vakbonde, wat op 17 Desember 1918 op die spits gedryf toe 'n groep gelei deur Harold Nelson van 'n 1000 betogers na Government House opgeruk het en die Administrateur van die Noordelike Gebied se bedanking geëis het. Die insident staan steeds as die 'Darwin Rebellie' bekend. Die werkers se griewe was hoofsaaklik teen die Vestey Groep en die Gemenebes van Australië gemik. Beide Gilruth en die Vestey maatskappy het Darwin kort daarna verlaat.

Gedenkteken ter nagedagtenis van die 1942 bombardement van die stad.

Ongeveer 10 000 Geallieerde troepe het vroeg in 1940 in Darwin aangekom met die uitbreek van die Tweede Wêreldoorlog met die doel om Australië se noordelike kuslyn te verdedig. Op 19 Februarie 1942 om 09:57 het 188 Japannese vegvliegtuie Darwin in twee sarsies aangeval. Dit was dieselfde vloot wat Pearl Harbor in die V.S.A bombardeer het, alhoewel daar 'n groter hoeveelheid bomme op Darwin laat val is. Die aanval was verantwoordelik vir die dood van 243 mense en is onberekenbare skade aan die dorp aangerig. Hierdie was die ernstigste aanval op Australië in oorlogstyd ooit. Hierdie was die eerste van vele lugaanvalle tussen 1942 en 1943 op Darwin.

Ten spyte van hierdie groot aanval, is Darwin se ontwikkeling baie deur die oorlog bevorder en is teerpaaie gebou om die streek met Alice Springs in die suide en Mount Isa in die suidooste te verbind en is Manton Dam in die suide gebou om die stad van water te voorsien. Op Australiëdag (26 Januarie) van 1959 het Darwin stadstatus verkry.[4]

Die oorblyfsels van die Palmerston Stadsaal, wat deur Sikloon Tracy vernietig is.

Op 25 Desember 1974 is Darwin deur Sikloon Tracy getref. 71 Mense het omgekom en 70% van die dorp se geboue is vernietig, insluitende baie van die ou klipgeboue soos Palmerston Stadsaal, wat nie die laterale kragte wat die sterk winde veroorsaak het kon weerstaan nie. Na die ramp is 30 000 mense (meer as die helfte van die stad se bevolking) per lug uit die gebied ontruim. Die stad is daarna weer in die 1970's herbou met nuwer materiale en tegnieke deur die Darwin Kommissie vir Rekonstruksie onder leiding van die voormalige burgemeester van Brisbane, Lord Mayor Clem Jones. 'n Satellietstad genaamd Palmerston is sowat 20 km suid van Darwin ontwikkel in die vroeë 1980's.

Op 17 September 2003 is die spoorlyn tussen Adelaide en Darwin voltooi.

Geografie[wysig]

Darwin stadshorison

Darwin is in die Noordelike Gebied aan die See van Timor geleë. Die stad self is op 'n heuwel gebou wat oor Darwin hawe uitkyk en word begrens deur Frances Bay aan die ooste en Cullen Bay in die weste. Die res van die stad is op plat laagliggende grond gebou en die kusgebiede is die tuiste van verskeie ontspanningsgeriewe, uitgestrekte strande wat uiters geskik is vir visvang.

Darwin is nader aan die hoofstede van vyf ander lande geleë as die hoofstad van Australië: Darwin is 3144 km vanaf Canberra. Dili in Oos-Timor is 2735 km vanaf Darwin, Bandar Seri Begawan (Brunei) is 2607 km ver, Port Moresby (Papua Nieu-Guinee) is 1818 km ver, Jakarta (Indonesië) is 2735 km ver, Melekok (Palau) is 3206 km ver. Manilla in die Filippyne is net 'n bietjie verder weg naamlik 3206 km asook Singapoer (3360 km) en Honiarara (Solomon-eilande) is 3198 km ver.

Buiten vir sy belangrikheid as 'n toegangsroete na Asië is Darwin ook 'n belangrike afspringpunt vir besoeke aan die Kakadu Nasionale Park, Arnhem Land en die noordelike eilande soos Groote Eyland en die Tiwi-eilande. Die stad is die grootste in die gebied en verskaf dienste aan die afgeleë nedersettings.

Die stad en sy woonbuurte[wysig]

Darwin se buitewyke

Darwin en sy woonbuurte is rofweg in 'n driehoekige vorm uitgelê met die ouer suidwestelike woonbuurte - en die stad self - in die een hoek, die nuwer noordelike woonbuurte in die ander hoek en die oostelike woonbuurt wat uitstrek in Palmerston se rigting, die derde hoek.

Mitchell Street in Darwin se sentrale sakegebied

Die ouer deel van Darwin is van die nuwer noordelike woonbuurte geskei deur Darwin Internasionale Lughawe en die Royal Australian Lugmagbasis. Palmerston is 'n satellietstad sowat 20 kilometer ter suide van Darwin wat in die 1980's ontwikkel is en is een van die snelgroeiendste munisipaliteite in Australië.[5] Die plattelandse gebiede rondom Darwin wat Howard Springs, Humpty Doo en Derry Springs insluit ervaar ook sterk groei.[6]

Darwin se sentrale sakegebied word begrens deur Daly Street in die noordweste, McMinn Street in die noordooste, Mitchell Street in die suidweste en Bennett Street in die suidooste. Die sentrale sakegebied was onlangs die fokus van groot uitbreidingsprojekte, insluitende die herontwikkeling van Stokes Hill waterfront gebied van meer as 'n miljard dollar wat 'n konferensiesentrum insluit met sitplek vir meer as 1500 mense en ongveer 4000 m2 se uitstalruimte. Die ontwikkeling sal ook hotelle, woonstelblokke en openbare geriewe insluit.[7] Die stad se hoof nywerheidsgebiede is langs die Stuart Highway geleë in Palmerston se rigting. Die grootste buurt vir winkelsentrums is Casuarina Square. Die duurste woongebiede is langs die kus geleë in woonbuurte soos Larrakeyah en Brinkin,[8] ondanks die risiko wat hierdie laagliggende buurte in die gesig staar tydens siklone en hooggetye.[9] Die oostelike woonbuurte soos Malak en Karama is waar mense in die laer inkomste groepe woon.[10]

Klimaat[wysig]

'n Nagtelike storm tydens die nat seisoen

Darwin het 'n tropiese savanne klimaat (Köppen Aw)[11] met duidelik onderskeibare nat- en droë seisoene en die gemiddelde maksimum temperature is regdeur die jaar min of meer dieselfde. Die droë seisoen duur vanaf April/Mei tot Oktober (die suidelike halfrond se winter) wanneer byna elke dag warm en sonnig is met voggehaltes in die middae van om en by 30%. Daar is baie min reënval tussen Mei en September. Junie en Julie is die koelste maande met daaglikse minimum temperature wat so laag as 14 °C kan daal, maar dit daal bitter selfde laer en ryp is nog nooit aangeteken nie.

Die nat seisoen word gekenmerk deur tropiese siklone en monsoen reëns.[12] Die meerderheid reën val tussen Desember en Maart (die suidelike halfrond se somer). In hierdie tyd is donderstorms algemeen en styg die voggehalte van die lug smiddae tot meer as 70% in die natste maande. Dit reën nie elke dag tydens die nat seisoen nie maar die meeste dae is warm tot baie warm en bewolk; In Januarie is daar minder as 6 dae se helder sonskyn bedags. Die warmste maand is November net voor die reënseisoen 'n aanvang neem. As gevolg van sy lang droë seisoen ervaar Darwin die hoogste gemiddelde daaglikse sonskyn ure (8,4) van enige van die Australiese hoofstede met die meeste sonskyn wat tussen April en November voorkom.

Darwin se klimaat stem baie meer ooreen met dié van Singapoer as dié van Sydney aangesien dit diep binne in die tropiese sone val.

Darwin is in een van die gebiede wat die meeste weerlig ter wêreld kry. In 2002 het 'n enkele donderstorm 1 634 weerligstrale in Darwin in die bestek van 'n paar uur opgelewer, wat ooreenstem met die totale weerlig wat Perth in 'n jaar ontvang.[1]

Verwysings[wysig]

  1. 1,0 1,1 Lightning Storms in the Top End”. Australian Broadcasting Corporation. Scribbly Gum: 2002-12-10. URL besoek op 2008-07-27.
  2. Our People and History”. Larrakia Nation Aboriginal Corporation.
  3. Previous cyclones in Darwin”. Cyclone Tracy. Northern Territory Library: 1998-04-21. URL besoek op 2008-01-07.
  4. Australia Day (Darwin)
  5. Palmerston Growth”. Palmerston City Council.
  6. Darwin to Palmerston Transport Corridor”. Regering van die Noordelike Gebied.
  7. >Major Projects”. Northern Territory Government.
  8. Community Atlas - High Income Households”. Darwin City Council.
  9. The Qualitative Rapid Environmental Risk Assessment”. Darwin City Council.
  10. Community Atlas - Low Income Households”. Darwin City Council.
  11. CHAPTER 7: Introduction to the Atmosphere”. physicalgeography.net. URL besoek op 2008-07-15.
  12. Information about Darwin”. Charles Darwin University. URL besoek op 2008-07-15.


Vlag van Australië Hoofstede van Australië Wapen van Australië
Hoofstede AdelaideBrisbaneCanberraDarwinHobartMelbournePerthSydney