Perth

vanuit Wikipedia, die vrye ensiklopedie.

Spring na: navigasie, soek
Ligging van Perth in Australië

Perth is die hoofstad van Wes-Australië, een van die federale state in Australië. Dié stad het 'n inwonertal van 1,5 miljoen mense (2007) wat Perth dan ook die grootste stad in die staat Wes-Australië maak. Tot soveel as 'n driekwart van die staat se inwoners woon in Perth en omliggende streke. Die stad het ook die vierde meeste inwoners in Australië. Die bevolkingsgroei van Perth is konsekwent hoër as die nasionale gemiddeld in Australië.

Perth is aan die oewers van die Swanrivier geleë

Perth is in 1829 deur Kaptein James Stirling as die politieke sentrum van die vrye setlaars van die Swanrivier Kolonie gestig. Perth was sederdien die setel van die regering in Wes-Australië.

Dié metropolitaanse gebied is geleë in Suidwes-Australië in 'n gedeelte wat bekend staan as die Darling Range. Die sentrale besigheidsdistrik en die woongebiede van Perth is aan die oewer van die Swanrivier geleë. Perth is die vierde op die tydskrif, The Economist, se ranglys van die wêreld se mees leefbare stede.[1]

Inhoud

[wysig] Geskiedenis

[wysig] Prehistoriese tydperk

Rottnest-, Carnac- en Garden Eilande

Voor die eerste Europese nedersettings gestig is was die gebied deur die Wadjuk Noongar mense vir meer as 40 000 jaar lank bewoon volgens argeologiese fondse uit die boloop van die Swanrivier.[2] Hierdie inheemse Australiese bevolkingsgroep van die suidwestelike hoek van Wes-Australië was versamelaar-jagters. Die mere op die kusvlakte was veral vir hulle belangrik vanuit 'n fisiese asook geestelike oogpunt.

Rottnest-, Carnac- en Garden eilande het ook 'n belangrike rol by die Noongar gespeel. Ongeveer 5 000 jaar gelede was die seevlak laag genoeg dat mense daarheen kon loop.

Die gebied waar Perth tans staan is Boorloo genoem deur die Aborigines wat daar geleef het tydens die eerste kontak met Europeërs in 1827. Boorloo het deel gevorm van Mooro, die stamgebied van die Yellagonga, een van verskeie groepe wat rondom die Swanrivier gewoon het en gesamentlik as die Whadjuk bekend gestaan het. Die Whadjuk was deel van 'n groter groep van dertien of meer stamme wat die suidwestelike taalblok gevorm het wat as die Noongar bekend staan.

Op 19 September 2006 het die Federale hof van Australië 'n beslissing gemaak wat die eiendomsreg oor die metropolitaanse gebied van Perth herken.[3]

[wysig] Vroeëre Europese kennismaking

Goewermentshuis, Wes-Australië

Die eerste gedokumenteerde waarnemings van die gebied is deur die Hollandse Kaptein Willem de Vlamingh en sy bemanning op die 10de Januarie 1697 gemaak.[4] Daarna is die gebied verskeie kere besigtig deur ander Europeërs en is die gebied soos in die geval van Vlamingh elke keer as 'n ongeskikte gebied vir landbou wat nodig sou wees om 'n nedersetting te ondersteun.

Die Round House wat in 1830 gebou is, is die oudste gebou in Wes-Australië
The Foundation of Perth 1829 deur George Pitt Morison is 'n histories akkurate rekonstruksie van die amptelike stigtingsseremonie.

[wysig] Die Swanrivierkolonie

Alhoewel die Britse Leër in 1826 'n basis op King George Sound (Later bekend as Albany) gestig het op die suidelike kus van Wes-Australië in reaksie op gerugte dat die gebied deur Frankryk geannekseer sou word, was Perth egter die eerste volskaalse nedersetting deur Europeërs in die geweste. Die Britse kolonie was reeds amptelik as Wes-Australië in 1832 bekend maar het informeel as die Swanrivierkolonie bekend gestaan.

Die stad se naam is deur James Sterling daaraan gegee.[5] Die enigste inligting oor die oorsprong van die naam kom uit Fremantle se dagboek inskrywing van 12 Augustus, waarin hy noem dat hulle die stad Perth genoem het soos versoek deur George Murray, 'n Britse offisier.[6] Murray is gebore in Perth, Skotland en was in 1829 die Staatsekretaris vir die Kolonies en 'n parlementslid van Pertshire in die Britse laerhuis. Dit word daarom dikwels gereken dat die stad sy naam ter ere van Murray gekry het.[7][8][9]

Vroeg in 1831 het die vyandighede tussen die Britse setlaars en die inboorlinge van die plaaslike Noongar stam beduidend vermeerder. Hierdie geweldadige periode van die streek se geskiedenis is op die spits gedryf deur 'n reeks gebeure waarin die Britte die inboorlinge oorkom het, insluitende die teregstelling van die Whadjuk stamhoof genaamd Midgegooroo, die dood van sy seun Yagan in 1833 en die Pinjarra menseslagting in 1834.

In 1843 toe die stamhoof Yellagonga gesterf het, het sy stam begin disintegreer nadat hulle grond rondom Perth van hulle ontneem is. Hulle het uitgewyk na die moerasse en mere noord van die nedersetting.[10]

In 1850 is Wes-Australië oopgestel vir veroordeeldes op versoek van die plaas- en sakegemeenskap wat op soek was na goedkoop arbeid.[11] Koningin Victoria het in 1856 stadstatus aan Perth verleen.[12]

[wysig] Federasie en daarna

St Georges Terrace in Perth, 1968

Na 'n referendum in 1900,[13] het Wes-Australië by die Federasie van Australië in 1901 aangesluit.[12] Dit was die laaste van die Australiaanse kolonies wat by die Federasie aangesluit het en ook eers nadat verskeie konsessies deur die ander kolonies toegestaan is, insluitende die bou van 'n transkontinentale spoorlyn tot in Perth (deur Kalgoorlie) vanaf die oostelike state.

In 1933 het Wes-Australië in 'n referendum gestem om die Australiese Federasie te verlaat en was daar 'n meerderheidstem van twee tot een ten gunste van afstigting.[13] 'n Verkiesing kort voor die referendum het egter die regerende pro-onafhanklikheidsparty uit die kussings gelig en is die regering vervang met 'n regering wat nie onafhanklikheid gesteun het nie. Die regering het egter die referendum eerbiedig deur 'n versoekskrif aan die Verenigde Koninkryk gerig, maar dié is eenvoudig geïgnoreer.[14]

Perth se groei en relatiewe welvaart, veral sedert die middel 1960's,[15] is die gevolg van sy rol as die hoof dienssentrum vir die staat se hulbronnywerhede, wat goud, ystererts, nikkel, aluminium, diamante en sandminerale, steenkool, olie en aardgas produseer.[16] Terwyl die meeste mineraal- en petroleumproduksie elders in die staat plaasvind, is die nie-basiese dienste verantwoordelik vir die meeste werkverskaffing en inkomste aan die inwoners van Perth.[17]

[wysig] Geografie

Perth is een van die mees geïsoleerde metropolitaanse gebiede op Aarde. Die naaste stad aan Perth met 'n bevolking van meer as 1 miljoen mense is Adelaide in Suid-Australië, wat 2104 km daarvandaan is. Perth is geografies nader aan Oos-Timor, Singapoer en Jakarta in Indonesië geleë as wat dit aan Sydney, Melbourne en Brisbane is.

[wysig] Sentrale sakekern

Die sentrale sakekern van Perth is begrens deur die Swanrivier aan die suide en ooste met Kings Park aan die westekant met die spoorweglyne wat die noordelike grens vorm. St Georges Terrace is 'n prominente straat in die gebied met 1,3 miljoen vierkante meter se kantoorruimte in die sentrale sakegebied.[18] Hay Street en Murray Street het die meeste kleinhandel en vermaaklikheidsentrums. Die grootste gebou in die stad is Central Park, wat ook die sesde hoogste gebou in Australië is,[19] alhoewel dit deur die BHP Tower in 2012 verbygesteek gaan word.[20] Met die huidige hulpbrongebaseerde snelle vooruitgang sal die stadshorison dramaties verander met ten minste elf nuwe geboue van hoër as 100 m wat tans in aanbou of binnekort gebou gaan word.[21]

Perth se stadshorison vanaf Kings Park in die namiddag afgeneem.

Die woonbuurte aan die kus trek voordeel uit Perth se ligging langs die see en sy skoon strande. In die ooste word die stad begrens deur 'n lae bergreeks wat as die Darling Range bekend staan. Perth is op plat, uitgestrekte aarde geleë - hoofsaaklik vanweë die sanderige grond en rotsbed wat baie diep lê.

[wysig] Geologie

Satellietbeeld van Perth

Perth is geleë aan die oewer van die Swanrivier, wat vernoem is na die inheemse swart swane deur Willem de Vlamingh, die kaptein van 'n Hollandse ekspedisie.[22] Die stadskern en die meeste woonbuurte is geleë op die sanderige en relatiewe plat Swan-kusvlakte, wat tussen die Darling Range en die Indiese Oseaan geleë is. Die grond in die gebied is redelik onvrugbaar. Die metropolitaanse gebied strek tot by Yanchep in die noorde en Mandurah in die suide, 'n totale afstand van ongeveer 125 kilometer per pad. Vanaf die kus in die weste tot Mundaring in die ooste strek die stad vir 50 kilometer per pad uit. Dit beteken dat Perth 'n oppervlakte van 6 100 km2 beslaan.

[wysig] Klimaat

Perth het 'n sterk seisoenale gemiddelde reënval. Die somers is gewoonlik warm en droog en duur vanaf laat Desember tot laat Maart, met Februarie wat oor die algemeen die warmste maand van die jaar is, wat Perth 'n klassieke voorbeeld maak van 'n mediterreense klimaat. Die somer is nie heeltemal sonder reën nie en daar kom sporadiese neerslae voor in die vorm van kortstondige donderstorms voor, koue fronte is matig en op seldsame geleenthede kom daar tropiese siklone voor wat beduidende reënval tot gevolg kan hê.

Die warmste aangetekende temperatuur in Perth was 46.2 °C op die 23 ste Februarie 1991. Winters is relatief koel en nogal vogtig, maar die eens betroubare reënval het die afgelope paar jaar geleidelik verminder. Die koudste temperatuur ooit aangeteken was -0,7 °C op 17 Junie 2006 wat dan ook die enigste aangetekende temperatuur wat ooit onder vriespunt gedaal het. Selfs in die middel van die winter daal die maksimum dagtemperatuur selde onder 16 °C. Alhoewel die meeste reënval in die winter voorkom, het die natste dag ooit aangeteken op die 9deFebruarie 1992 voorgekom toe 121 millimeter reën geval het. Op die meeste somermiddae waai 'n suidwestelike briesie van die see se kant af in wat alombekend is as die Fremantle Doctor wat die stad dan na so 15 °C afkoel.

Klimaattabel
Jan Feb Mar Apr Mei Jun Jul Aug Sep Okt Nov Des Jaar
Gemiddelde daaglikse maksimum temperatuur 29,7 °C 30,0 °C 28,0 °C 24,6 °C 20,9 °C 18,3 °C 17,4 °C 18,0 °C 19,5 °C 21,4 °C 24,6 °C 27,4 °C 23,3 °C
Gemiddelde daaglikse minimum temperatuur 17,9 °C 18,1 °C 16,8 °C 14,3 °C 11,7 °C 10,1 °C 9,0 °C 9,2 °C 10,3 °C 11,7 °C 14,0 °C 16,3 °C 13,3 °C
Gemiddelde totale reënval 8,6 mm 13,3 mm 19,3 mm 45,5 mm 122,7 mm 182,4 mm 172,9 mm 134,6 mm 79,9 mm 54,5 mm 21,7 mm 13,9 mm 869,4 mm
Gemiddelde aantal reëndae 2,9 2,7 4,3 7,6 13,8 17,2 18,2 17,2 14,0 11,1 6,5 4,2 119,6
Bron: Australiese Buro van Meteorologie

[wysig] Regering

Parlementshuis, Perth.

Perth is die setel van die Parlement van Wes-Australië en die Goewerneur van Wes-Australië. Onder die nuwe een stem, een waarde wette is bepaal dat setels in die stedelike en landelike gebiede gelyke bevolkingsgroottes sal hê, wat meebring dat 42 van die Wetgewende vergadering se 59 setels in Perth gebaseer sal wees met die volgende staatsverkiesing. Perth word verteenwoordig deur 11 setels in die Federale Huis van Verteenwoordigers, alhoewel sommige van die setels tot buite die Metropolitaanse gebied strek. Die metropolitaanse gebied is verdeel in meer as 30 plaaslike regeringsliggame. City of Perth is die naam van die plaaslike regeringsowerheid verantwoordelik vir die Sentrale Sakekern wat egter 'n baie klein deel van die Perth woongebied verteenwoordig.

Die staat se hoogste hof, die Hooggeregshof van Wes-Australië, is ook in Perth geleë,[23] saam met die Distrikshof van Wes-Australië[24] en die Gesinshof van Wes-Australië[25]. Die Landdroshof van Wes-Australië het ses metropolitaanse kantore.[26] Die Federale Hof van Australië en die Federale Landdroshof se kantore is in die Commonwealth Hofgebou in Victoria laan, Perth, [27] wat ook die setel is vir die jaarlikse sittings van Australiese Hoër hof.[28]

Die Metropolitaanse Streeksskema is die wetlike stadsbeplanningskema vir grondbenutting in die Perth metropolitaanse gebied en is al sedert 1963 in werking.[29]

[wysig] Ekonomie

Perth het 'n snelgroeiende ekonomie, hoofsaaklik as gevolg van die stygende aanvraag vir minerale uit ontluikende ekonomieë, veral uit Sjina. Dit het gelei tot 'n ontploffing in die mynwese wat nie net 'n groot impak op Perth alleen het nie maar ook die hele Wes-Australië in sy geheel. Vanaf 2006-2007, was mynbou verantwoordelik vir 'n volle 30% van die staat se totale uitset.[30] en 50% van die staat se totale uitvoere. Perth is verder so belangrik vir mynbou- en energie projekte dat dit ongeveer 80% of ten minste $A 11,7 miljard van Australië se totale projekte beheer. Dit is dan ook so dat 25% van die wêreld se grootste mynboumaatskappye kantore in Perth het onder andere Rio Tinto, Woodside Petroleum en BHP Billiton om maar 'n paar te noem. Die ekonomiese groeitempo in 2006 was hoër as dié van Sjina wat reeds 'n verbysterende 10% was.[31]

Met 'n hoogs geskoolde werkerskorps, besige kleinhandelsbedryf en 'n uitstekende infrastruktuur word daar verwag dat die ekonomiese groei vir 'n wyle gaan voortduur.

Perth wat aan die kern van Wes-Australië se kultuur, sakebedrywighede, toerismebedryf en kleinhandelsbedrywe staan, is werkloosheidsvlakke bestendig onder 4%. Die stad verskaf ook duisende werk aan mense wat betrokke is by die verskaf van verblyf vir die baie mense wat na die stadskern terugkeer.

Die stad verdien miljoene uit die meer as 2 miljoen interstaat en internasionale besoekers deur die hotel en kleinhandelsdienste.

[wysig] Infrastruktuur

Die Northbridge Tonnel op die Graham Farmer Snelweg
Perth spoorwegstasie
Perth Ondergrondse spoorwegstasie
Lugfoto van Fremantle met Perth verder weg in die ooste

[wysig] Vervoer

Perth word deur Perth Lughawe in die ooste van die stad bedien vir plaaslike en internasionale vlugte en Jandakot Lughawe in die stad se suidelike voorstede word gebruik vir algemene- en huurvlugte.

Perth het 'n padnetwerk met drie snelweë en nege metropolitaanse hoofweë.

Die Northbridge tonnel wat deel is van die Graham Farmer Snelweg is die enigste groot tonnel in Perth.

Perth se metropolitaanse publieke vervoer wat treine, busse en veerbote insluit word deur Transperth verskaf en die skakelings na landelike gebiede deur Transwa. Daar is 59 spoorwegstasies in Perth en 15 busterminale in die metropolitaanse gebied. Die spoorwegstelsel is onlangs beduidend opgeknap met 'n nuwe spoorlyn wat tussen Perth en Mandurah gebou is en sodoende die lengte van Perth se spoorlyne verdubbel het. Die spoorlyn is 'n jaar later as die oorspronklike teikendatum op die 23 ste Desember 2007 geopen.


Onlangse verbeteringe sluit in die geleidelike vervanging van die busvloot en die SmartRider kontaklose knapkaart (smartcard) kaartjiestelsels. Perth verskaf ook gratis bus- en treinritte rondom die stadskern (die sogenaamde Free Transit Zone), wat drie hoë frekwensie CAT busroetes insluit. Verder is die spoornetwerk in die noordelike- en suidelike woonbuurtes uitgebrei as deel van die New MetroRail projek.

Die Indian Pacific passasierstreindiens verbind Perth met Adelaide en Sydney deur Kalgoorlie. Die Transwa Prospector passasierstreindiens verbind Perth met Kalgoorlie deur verskeie dorpe in die sogenaamde Wheatbelt, terwyl die Transwa Australind met Bunbury verbind is en die Transwa Avonlink met Northam verbind is.

Spoorvrag eindig by Kewdale Spoorwegterminaal, sowat 15 kolometer suid-oos van die stadskern.

Perth se hoof vraghouer- en passasiershawe is in Fremantle, sowat 19 kolometer suidwes van die mond van die Swanrivier.[32] 'n Tweede hawekompleks is in ontwikkeling te Cockburn Sound en is hoofsaaklik bedoel vir die massa-uitvoer van goedere.

[wysig] Energievoorsiening

Die verkoop en aansluiting van elektrisiteitstoevoer in Perth word hanteer deur Synergy, 'n maatskappy wat deur die Wes-Australiese regering besit word. Perth se elektrisiteitsvoorsieningsnetwerk vorm deel van die South West Interconnected System (SWIS) wat strek vanaf Kalbarri in die noorde tot by Albany in die suide en tot by Kalgoorlie in die ooste.[33] Kragverspreiding word beheer deur Western Power wat hoofsaaklik krag van kragstasies wat deur Verve Energy bedryf word na Perth en omstreke versprei. Verskeie van Verve Energy se kragstasies is in of naby aan Perth geleë[34].

Perth het ook 'n goed ontwikkelde aardgasverspreidingsnetwerk wat deur Alinta bestuur word. Die gas word hoofsaaklik in die Perth-kom en die Pilbara-streek ontgin. 'n Pyplyn bekend as die DBNGP (Dampier Bunbury Natural Gas Pipeline) word gebruik om die gas vanaf Pilbara na Perth te vervoer[35].

[wysig] Watervoorsiening

Die kenmerkende Wes-Australiese Seevaartmuseum te Victoria Kaai

Die verminderde reënval die afgelope paar jaar in die streek het die invloei na reservoirs met twee derdes laat verminder oor die afgelope 30 jaar en ook grondwatervlakke negatief beïnvloed. Gekoppel aan die stad se relatiewe hoë groeikoers het dit gelei tot kommer dat Perth se watervoorsiening in die afsienbare toekoms kan opdroog.[36] Die Wes-Australiese regering het daarop gereageer deur beperkinge te plaas op huishoudelike besproeiing in die stad. In November 2006 is 'n ontsoutingsaanleg in Kwinana (sien Kwinana ontsoutingsaanleg) oopgemaak wat meer as 45 gigaliter drinkwater per jaar kan voorsien;[37][38] die kragbehoeftes van die aanleg is voorsien deur die Emu Downs windplaas naby Cervantes.[39] Daar is ook oorweging daaraan geskenk om water vanaf die Kimberley-streek met 'n pypleiding daarheen te pomp maar die idee is in Mei 2006 laat vaar vanweë die hoë koste wat dit sou behels.[40] Ander voorstelle wat oorweeg word sluit in die omstrede onttrekking van 'n verdere 45 gigaliter jaarliks vanuit die Yarragadee grondwaterbron in die suidweste van die staat. Die staatsregering het egter in Mei 2007 aangekondig dat 'n tweede ontsoutingsaanleg te Binningup, aan die kus tussen Mandurah en Bunbury, gebou gaan word.[41]

[wysig] Besienswaardighede in Perth

Die Swanrivier se oewer met sy dubbeldoel fiets-en-voetgangerpaadjie is 'n baie gewilde bestemming en by Barrack street kaai kan die Swan Bells gesien word net oorkant die vasmeerplek waarvandaan verskeie veerbootdienste op riviertoere vertrek. Daar is ook 'n veerbootdiens hiervandaan na Rottnest-eiland.

[wysig] Verwysings

  1. ^ "Urban idylls", Economist.com.
  2. ^ Sandra Bowdler. "The Pleistocene Pacific." Published in ‘Human settlement’, in D. Denoon (ed) The Cambridge History of the Pacific Islanders. pp.41-50. Cambridge University Press, Cambridge. University of Western Australia. URL besoek op 2008-02-26.
  3. ^ "Bennell v State of Western Australia 2006 FCA 1243." Federal Court of Australia Decisions. Australasia Legal Information Institute. URL besoek op 2007-04-14.
  4. ^ Major, Richard Henry (1859). "Early Voyages to Terra Australis, now called Australia." Project Gutenberg of Australia. URL besoek op 2008-02-26.
  5. ^ (18 June 1829). "Proclamation". wikisource.
  6. ^ Fremantle, John (1928). Diary & Letters of Admiral Sir C. H. Fremantle, G.C.B. Relating the Founding of the Colony of Western Australia 1829. London: Hazell, Watson & Viey. 
  7. ^ Uren, Malcolm J. L. (1948). Land Looking West. London: Oxford University Press. 
  8. ^ Crowley, Francis K. (1960). Australia's Western Third. London: Macmillan & Co. 
  9. ^ Statham, Pamela (1981). “Swan River Colony”, Stannage, Tom: A New History of Western Australia. Nedlands: University of Western Australia Press. ISBN 0-85564-181-9. 
  10. ^ "Town of Vincent - History." Adapted from 'History of the Town of Vincent', from Town of Vincent 2001 Annual Report, p.52 (possibly based on J. Gentili and others). Town of Vincent. URL besoek op 2008-02-26.
  11. ^ ":: REGIONAL WA:: Western Australia: History." Regional Web Australia: 2003-12-23. URL besoek op 2008-02-26.
  12. ^ 12,0 12,1 "History of the City of Perth." (PDF) City of Perth: 2005-03-23. URL besoek op 2008-02-26.
  13. ^ 13,0 13,1 "Collections in Perth: 4. Colonial Administration." Collections in Perth. National Archives of Australia: 2007-08-23. URL besoek op 2008-02-26.
  14. ^ "Deputy Premier 2nd Collier Government 1933-1935." John Curtin Prime Ministerial Library: 2005-05-11. URL besoek op 2008-02-26.
  15. ^ "WA Statistical Indicators June 2002." Australian Bureau of Statistics: 11 July 2002. URL besoek op 2008-10-05.
  16. ^ "Australia's identified mineral resources, 2002." (PDF) Geoscience Australia: 2002-10-31. URL besoek op 2008-02-26.
  17. ^ "Discussion Paper: Greater Perth Economy And Employment." Department for Planning and Infrastructure: 25 August 2003. URL besoek op 2008-10-05.
  18. ^ "Perth, commercial area information." Emporis.com. URL besoek op 2008-02-26.
  19. ^ "World's tallest skyscrapers by country." Emporis.com. URL besoek op 2008-02-26.
  20. ^ "BHP Square, Perth." Emporis.com. URL besoek op 2008-02-26.
  21. ^ "Tallest skyscrapers." Emporis.com. URL besoek op 2008-02-26.
  22. ^ "175th Anniversary of Western Australia - Heritage Icons: January - The Swan River." Department of the Premier and Cabinet (Western Australia): 2004-12-31. URL besoek op 2007-04-14.
  23. ^ "Jurisdiction." Supreme Court of WA: 16 October 2008. URL besoek op 2008-10-16.
  24. ^ "About the District Court." District Court of WA: 16 October 2008. URL besoek op 2008-10-16.
  25. ^ "About the Family Court." Family Court of WA: 16 October 2008. URL besoek op 2008-10-16.
  26. ^ "Magistrate Court Locations." Department of Justice: 16 October 2008. URL besoek op 2008-10-16.
  27. ^ "WA Registry." Federal Court of Australia: 2 August 2008. URL besoek op 2008-10-16.
  28. ^ "2007 Annual Report." High Court of Australia: 18 March 2008. URL besoek op 2008-10-16.
  29. ^ "Regional Planning Schemes." WA Planning Commission. URL besoek op 2008-10-16.
  30. ^ (2008-05-26) Western Australian Economic Summary, 2008 No. 1. Department of Treasury and Finance, Government of Western Australia, 107. 
  31. ^ "Business - Economic Profile." City of Perth. URL besoek op 2007-06-15.
  32. ^ "Port Information." Fremantle Ports. URL besoek op 2007-04-14.
  33. ^ "Synergy Service Area." Synergy. URL besoek op 2008-11-10.
  34. ^ "Verve Energy is WA's leading energy producer." Verve Energy. URL besoek op 2008-11-10.
  35. ^ "Dampier Bunbury Pipeline." DBP. URL besoek op 2008-11-10.
  36. ^ Dortch, Eloise, "Plan for a second desalination plant", The West Australian, West Australian Newspapers Ltd, 2005-05-07, p. 1. URL besoek op 2007-04-14.
  37. ^ "Premier opens Australia's first major desalination plant." Water Corporation: 2006-11-19. URL besoek op 2007-04-14.
  38. ^ "Kwinana desalination plant open in months", ABC News Online, Australian Broadcasting Corporation, 2006-09-26. URL besoek op 2007-04-14.
  39. ^ "Water Technology - Perth Seawater Desalination Plant, Seawater Reverse Osmosis (SWRO), Kwinana." Water Corporation: 2007-11-15. URL besoek op 2008-02-27.
  40. ^ "Kimberley Water Source Project." (PDF) Department of Water: 2006-04-28. URL besoek op 2008-02-27.
  41. ^ http://www.watercorporation.com.au/D/desalination_plant2.cfm - Inligting oor die tweede ontsoutingsaanleg
Ontsluit van "http://af.wikipedia.org/wiki/Perth"
Persoonlike gereedskap