Huisgenoot
| Huisgenoot | |
|---|---|
 |
|
| Redakteur | Izelle Venter (hoofredakteur), Julia Viljoen |
| Redaksielede | Wicus Pretorius, Nadia Sadovsky, André Brink, Inge Kühne, Marida Fitzpatrick, Lucia Swart-Walters, Burgert Behr, Elna van der Merwe, Elretha Louw, Carmen Niehaus, Hugo Loubser e.a. |
| Kategorieë | Algemene belang; gesinstydskrif |
| Frekwensie | Weekliks |
| Uitgewer | Media24 |
| Jaar gestig | 1916 |
| Eerste uitgawe | 20 Mei 1916 |
| Land | Suid-Afrika |
| Taal | Afrikaans |
| Webwerf | http://www.huisgenoot.com/ |
Huisgenoot is 'n weeklikse Afrikaanse gesinstydskrif. Dit het die hoogste sirkulasiesyfers van alle Suid-Afrikaanse tydskrifte, gevolg deur sy sustertydskrif YOU, die Engelstalige weergawe. Nog 'n sustertydskrif, Drum, is op die swart mark gerig. Izelle Venter is sedert 1 Julie 2011 hoofredakteur van al drie publikasies, wat saam 'n sirkulasie van byna een miljoen eksemplare per week het. Izelle het Esmaré Weideman opgevolg wat aangestel is as uitvoerende hoof van Media24.
Daar word geskat dat meer as twee miljoen mense weekliks Huisgenoot lees. Daar is ook verskeie handelsmerkuitbreidings. Die grootste is Huisgenoot-Tempo, wat op Afrikaanse musiek fokus. Verder word 'n gewilde konsert, Skouspel, jaarliks aangebied waar van die land se vooraanstaande Afrikaanse kunstenaars optree. Dit word gewoonlik oor twee naweke by Sun City gehou. By dié geleentheid word die gewildste kunstenaars van die jaar vereer met 'n toekenning, Tempo.
Huisgenoot word deur Media24, 'n filiaalmaatskappy van Naspers, uitgegee en die inhoud bestaan uit 'n mengsel van ware drama, glansonderwerpe, mode en verbruikersake sowel as resepte, blokkiesraaisels, tuisprojekte, motornuus en sport. Dit het ook 'n kinderafdeling en elke week minstens een kortverhaal.
[wysig] Geskiedenis
Die tydskrif is in 1916 as die maandelikse tydskrif De Huisgenoot gestig (die eerste uitgawe het op 20 Mei daardie jaar verskyn) om 'n inkomstestroom vir Die Burger te verskaf en om die Afrikanerbevolking te voorsien van inspirasie, inligting en vermaak. [1] Die Huisgenoot was in die beginjare 'n belangrike bron van kennis oor geskiedenisonderwerpe, nie net Suid-Afrikaanse onderwerpe nie, maar ook gebeure uit die internasionale geskiedenis en kon dit as "die volk se universiteit" gesien word.[2] Eugène Marais het byvoorbeeld vier artikels oor miere vir Die Huisgenoot geskryf.[3]
Die tydskrif is in sy beginjare sterk geassosieer met die ontluikende Afrikaner-Nasionalisme. Historiese figure is gereeld op die voorblad gebruik. Die eerste uitgawe het 'n foto van president Paul Kruger vertoon en die opvolgende uitgawe het president J. H. Brand (Julie 1916) op die voorblad vertoon. Ander figure wat op die voorblad gepryk het, het generaal Piet Joubert (Augustus 1916); Jan F.E. Celliers (September 1916); Karel Trichardt (Oktober 1916); president. F.W. Reitz (November 1916) en ds. J.D. Kestel (Desember 1916) ingesluit.[1]
Huisgenoot het egter geleidelik al hoe meer markgerig geraak en die inhoud is ter wille van populêre smaak aangepas. Reeds in Oktober 1923 het Die Huisgenoot aangekondig dat dit in 'n weekblad sou verander. In dié uitgawe skryf die redakteur, prof. J.J. Smith, dat hoewel die "ernstige sy van die lewe" nie verwaarloos sal word nie, daar ook gepoog sal word om "iets vir die smaak van elke leser aan te bied" en "meer in voeling met die behoeftes en wense van die aangroeiende leserskring te bly".[1] Teen die laat 1940's het die tydskrif in baie van sy doelwitte geslaag, naamlik om in die middelpunt van die Afrikaanse kultuurlewe te staan, te help om Afrikaans as skryftaal te vestig, 'n leesgewoonte onder Afrikaners te kweek en om 'n platform te bied vir Afrikaanse skrywers en digters.[4]
Teen die 1950's en 1960's het die voorblad filmsterre soos Audrey Hepburn (2 September 1960) en Ava Gardner (2 Desember 1960) eerder as landskappe of historiese figure vertoon. Gebeurtenisse soos republiekwording in 1961 en die sluipmoord op dr. H.F. Verwoerd het egter heelwat publisiteit gekry. Die Nederlandserige titel De Huisgenoot is na die meer Afrikaanse Die Huisgenoot aangepas en in 1977 is die naam verder verkort na Huisgenoot.[1]
Teen die laat 1970's was die tydskrif besig om uit voeling te raak met die veranderende kulturele norme van die Afrikanerbevolking en, ook weens die invoer van televisie-uitsendings in 1976, het lesertalle drasties gedaal. Teen 1978 was die tydskrif in ernstige moeilikheid en 'n nuwe redakteur, Niel Hammann, is aangestel. Hy het Huisgenoot in 'n meer populistiese en winsgedrewe rigting gestuur en die gewildheid en verkope het die hoogte in geskiet - van 140 000 tot 500 000 kopieë per week. Hammann het hom veral op vroue, wat die primêre aankoper van tydskrifte is, se belangstellings toegespits. Die voorblaaie het sedertdien bekendes soos TV- en rolprentsterre, skoonheidspersoonlikhede soos Anneline Kriel en later Diana, prinses van Wallis, vertoon. [1]
Die gewildheid van Huisgenoot het sedertdien onverpoosd voortgeduur en saam met sy Engelse sustertydskrif YOU is dit een van die suksesvolste tydskrifte in Suid-Afrika.
[wysig] Eksterne skakels
[wysig] Verwysings
- ^ 1,0 1,1 1,2 1,3 1,4 Prof. J. D. Froneman, Skool van Kommunikasie Studies, Potchefstroom Universiteit, Dominante motiewe in die transformasie van Huisgenoot, 1916-2003, Voorgedra by die Media in Africa conference, Stellenbosch, 11-12 September 2003. Afgelaai op 18 November 2007
- ^ Die Burger, US-databasis bewaar, Besoek op 18 November 2007
- ^ Universiteit van Johannesburg, Library & Information Centre - H.G. VILJOEN-DOKUMENTE, Besoek op 18 November 2007
- ^ Stella Viljoen, Imagined Community': 1950s kiekies of the volk, Afgelaai op 18 November 2007
