Martin Watt
Martin Watt | |
|---|---|
| Gebore | 27 Januarie 1970 Standerton |
| Beroep(e) | komponis, koordirigent, skilder |
Martin Watt (gebore op 27 Januarie 1970 in Standerton) is 'n Suid-Afrikaanse komponis. Hy het die grade Baccalaureus Musicae (1991) en Honneurs Baccalaureus Musicae (1992) (beide cum laude) aan die Potchefstroomse Universiteit verwerf. Daarna het hy sy studies in komposisie voortgesit onder die internasionaal geprese komponis, prof. Peter Klatzow aan die Universiteit van Kaapstad voortgesit waar hy die graad Magister Musicae (cum laude) verwerf het. Talle nasionale en internasionale beurse het hom in staat gestel om van 1994 tot 1995 sy studies voort te sit onder die Britse komponis Paul Petterson aan die Royal Academy of Music in Londen te studeer. Hier het hy die Diploma van Gevorderde Studies in Komposisie verwerf en ook die gesogte Charles Lucas-prys gekry.
Met sy terugkeer na Suid-Afrika het hy 'n deeltydse lektor in die Departement van Musiek aan die Universiteit van Pretoria geword waar hy in musiekteorie gedoseer het. Hier het hy in 1996 'n doktorsgraad verwerf. Van 1998 tot 2000 was hy 'n post-doktorale navorsingsvennoot aan dieselfde universiteit waar hy in historiese musikologie nagevors het. Hy was ook mede-redakteur van 'n voorgestelde Bloemlesing van Suid-Afrikaanse Kunsmusiek.
Van 2000 tot 2003 was hy 'n dosent in die Musiek-afdeling van die Skool vir Kunste aan die Universiteit van die Witwatersrand in Johannesburg waar hy in musiekteorie en -ontleding, die geskiedenis van musiek en algemene musiekkennis gedoseer het. In 2004 het hy 'n senior dosent aan die Noordwes-Universiteit in Potchefstroom geword waar hy in musiekteorie, komposisie en musiektegnologie gedoseer het. In 2004 was hy ook die enigste Suid-Afrikaanse lid van 'n pan-Afrikaanse paneel van kundiges wat 'n nuwe lied vir die Afrika-unie in Addis Abeba moes kies. In Mei 2007 was hy 'n gasdosent aan die Utrecht Conservatoire in Nederland. Sedert 2008 is hy 'n senior dosent in musiekteorie aan die Suid-Afrikaanse Kollege vir Musiek aan die Universiteit van Kaapstad.