NG gemeente Paarl
Die NG gemeente Paarl is die derde oudste gemeente van die Nederduitse Gereformeerde Kerk in Suid-Afrika. Die gemeente het vroeër as Drakenstein bekend gestaan en staan ook soms as Strooidakkerk bekend na aanleiding van sy kerkgebou.
Die gemeente se ontstaan is 'n voortvloeisel van die koms van die Franse Hugenote na Suid-Afrika in 1688. Hulle het aanvanklik geressorteer onder die NG gemeente Stellenbosch, maar in 1691 is hulle tot 'n afsonderlike gemeente, destyds Drakenstein, gevorm.
Die eerste plek van samekoms was iewers in die buurt van Simondium geleë in 'n geboutjie van hout en klei wat sommige beskryf het as 'n "vuile hokje" of "'n gevaarte". Hier het ds. Pierre Simond, wat saam met die Hugenote Kaap toe gekom het, in keurige Frans gepreek, tot hy in April 1702 sy laaste preek aan die Kaap gehou en na Europa teruggekeer het.
Onder leiding van ds. Petrus van Aken is in 1717 tot die oprigting van 'n behoorlike kerkgebou oorgegaan, gedeeltelik met behulp van 'n legaat van die bekende Henning Huising. Dit het waarskynlik aan die noordelike kant van die teenswoordige kerkgebou, waar die graf van ds. R.N. Alting (predikant van 1784 tot 1800) is, gestaan. In 1805 is die huidige kerkgebou in ou Kaaps-Hollandse styl opgetrek, wat vandag nog as die Strooidakkerk bekend staan en die oudste kerkgebou in Suid-Afrika is wat steeds as sulks gebruik word.
Die Pinksterbidure, wat vandag 'n gebruik in die hele NG Kerk is, het ontstaan uit 'n gebedsweek tussen Hemelvaartdag en Pinkstersondag in 1861 toe ds. G.W.A. van der Lingen 'n besondere geestelike ervaring beleef het. Hy was predikant van die Paarlse gemeente van 1831 tot 1869 en mede-verantwoordelik vir die stigting van die Paarl Gimnasium.
[wysig] Enkele leraars
- Tobias Johannes de Clerq, 1956 - 1962
- Dawid Willem de Villiers, 1953 - 1960
- Willem Johannes Louw, 6 Desember 1963 - 23 November 1969
- Johannes Albertus Hurter, 1970 - 1973
[wysig] Bronne
- Olivier, ds. P.L. (samesteller), 1952. Ons gemeentelike feesalbum. Kaapstad en Pretoria: N.G. Kerk-uitgewers.
