Adolf Galland

in Wikipedia, die vrye ensiklopedie
Jump to navigation Jump to search
Bundesarchiv Bild 146-2006-0123, Adolf Galland.jpg

Adolf Josef Ferdinand Galland (19 Maart 1912 - 9 Februarie 1996) was 'n Duitse Luftwaffe-generaal en vlieënier wat regdeur die Tweede Wêreldoorlog in Europa gedien het. Hy het 705 sendings gevlieg en op die Westelike Front en in die Verdediging van die Ryk geveg. By vier geleenthede het hy oorleef nadat sy vliegtuig neergeskiet is. Hy word daarmee gekrediteer dat hy 104 vyandige vliegtuie (almal deel van die Westerse bondgenote) neergeskiet het.

Galland, wat in Westerholt gebore is, het in 1929 'n sweefvlieënier geword voordat hy by Lufthansa aangesluit het. In 1932 studeer hy as vlieënier aan die Deutsche Verkehrsfliegerschule (Duitse kommersiële vliegskool) in Braunschweig voordat hy later die jaar by die Reichswehr van die Weimar-republiek aansluit. Galland se aansoek is goedgekeur, maar hy het nooit die aanbod aanvaar nie. In Februarie 1934 is hy na die Luftwaffe oorgeplaas. In 1937, tydens die Spaanse burgeroorlog, het hy op vrywillige grondslag vir die Condor Legion geveg en grondaanvaloperasies gevlieg ter ondersteuning van die Nasionaliste onder Francisco Franco. Nadat hy sy toer in 1938 voltooi het, was Galland werksaam gewees in die ministerie van lugdienste en het hy tegniese handleidings geskryf oor sy ervarings as vlieënier. Gedurende hierdie periode het Galland as instrukteur vir grondaanval-eenhede gedien. Tydens die Duitse inval in Pole in September 1939 het hy weer grondaanvaloperasies gevlieg. Vroeg in 1940 het Galland daarin geslaag om sy meerderes te oorreed om hom toe te laat om 'n vegvlieënier te word.

Galland het Messerschmitt Bf 109's tydens die Slag om Frankryk en die Slag om Brittanje gevlieg. Aan die einde van 1940 het sy telling van oorwinnings oor vyandige vliegtuie 57 bereik. In 1941 het Galland in Frankryk gebly en teen die Royal Air Force (RAF) oor die Engelse kanaal en Noord-Frankryk geveg. Teen November 1941 het sy aantal oorwinnings oor vyandige vliegtuie tot 96 toegeneem, en teen daardie tyd het hy die Ridderkruis van die Ysterkruis met eikeblare en swaarde verdien. In November 1941 is Werner Mölders, wat die Duitse vegvliegmag as generaal der Jagdflieger aangevoer het, in 'n vliegongeluk dood en het Galland hom opgevolg, in welke pos hy tot Januarie 1945 sou bly.

Aan die einde van Januarie en begin Februarie 1942 het Galland eers die Luftwaffe se lugbedekking beplan en bevel geneem van die Kriegsmarine-operasie Cerberus, wat 'n groot sukses was. Dit het aan hom die Ridderkruis van die Ysterkruis besorg. Tydens die daaropvolgende jare het Galland se meningsverskille met die Reichsmarschall Hermann Göring oor die effektiefste wyse om die bombardering van die geallieerde lugmagte op Duitsland te bestry hul verhouding versleg. Die Luftwaffe-vegmag was teen 1944 onder geweldige druk, en Göring het Galland die skuld gegee vir die versuim om Geallieerde strategiese daglig-bomaanvalle te voorkom. Die verhouding het vroeg in Januarie 1945 heeltemal in duie gestort toe Galland van sy bevel onthef is weens sy voortdurende kritiek op die Luftwaffe-leierskap. Galland is toe onder huisarres geplaas na die sogenaamde Vegvlieënier-opstand, waarin senior vegvlieëniers Göring gekonfronteer het oor die uitvoering van die lugoorlog.

In Maart 1945 het Galland weer teruggekeer na operasionele vlugte en is hy toegelaat om 'n vliegtuig-eenheid te vorm wat hy Jagdverband 44 genoem het. Hy het tot aan die einde van die oorlog in Mei 1945 perasies oor Duitsland van stapel gestuur. Na die oorlog was Galland in diens van die regering van Argentinië gewees en het hy as konsultant vir die Argentynse lugmag opgetree. Later het hy na Duitsland teruggekeer en sy eie onderneming bestuur. Galland het ook bevriend geraak met baie voormalige vyande, soos die RAF vlieëniers Robert Stanford Tuck en Douglas Bader. Adolf Galland is op 9 Februarie 1996 oorlede.

Eksterne skakels[wysig | wysig bron]