Airlink Vlug 8911

in Wikipedia, die vrye ensiklopedie
Spring na: navigasie, soek
Airlink Vlug 8911
Datum: 24 September 2009
Oorsaak: Word nog ondersoek
Plek van ramp: Durban, Suid-Afrika
Sterftes: 1
Beserings: 3
Vliegtuig Tipe: BAe Jetstream 41
Vliegtuig Stertnommer: ZS-NRM
Oorsprong: Durban Internasionale Lughawe
Bestemming: Pietermaritzburg Lughawe
Passasiers: Geen
Bemanning: 3
Oorlewendes: 3 (2 bemanningslede en 1 persoon op die grond)

Airlink Vlug 8911 was 'n posisioneringsvlug vanaf Durban Internasionale Lughawe na Pietermaritzburg Lughawe wat op 24 September 2009, kort nadat dit opgestyg het, op die terrein van die Merebank Sekondêre Skool neergestort het. Drie insittendes en een persoon op die grond het beserings opgedoen. Die kaptein van die vlug het egter op 7 Oktober 2009 aan sy wonde beswyk.

Vlug[wysig | wysig bron]

Die vlug was 'n posisioneringsvlug vanaf Durban na Pietermaritzburg. Daar was geen passasiers ten tyde van die ongeluk aan boord nie. Die drie bemanningslede wat aan boord was, is die kaptein, Alistair Freeman, die mede-vlieënier, Sonja Bierman en die lugwaardin, Rodelle Oosthuizen.

Die vliegtuig, 'n BAe Jetstream 41 met registrasie ZS-NRM, het slegs 50 uur gevlieg sedert sy laaste diens. Die vliegtuig is die vorige aand weens slegte weer na Durban herlei.

Ongeluk[wysig | wysig bron]

Omstreeks 07:55[1] plaaslike tyd op 24 September 2009, het die vlug vanaf Durban Internasionale Lughawe opgestyg. Kort daarna het die bemanning enjinprobleme en rook uit die agterkant van die vliegtuig gerapporteer en 'n noodtoestand verklaar.[2] Ooggetuies het gemeld dat die vliegtuig kort voor die ongeluk buitengewoon laag gevlieg het. Die vliegtuig het op die sportgronde van die Merebank Sekondêre Skool neergestort en sodoende residensiële eiendomme rakelings gemis. Die skool was gelukkig gesluit as gevolg van 'n openbare vakansiedag, Erfenisdag. Die vliegtuig het tydens impak in drie dele gebreek.

Reddingsoperasie[wysig | wysig bron]

Reddingswerkers het kort ná die ongeluk op die toneel opgedaag en die drie bemanningslede is uit die wrak met behulp van hidrouliese gereedskap gevry. Die kaptein is om 11:00 in 'n kritieke toestand per helikopter na die St. Augustine-hospitaal vervoer terwyl die krities-beseerde mede-vlieënier en ernstig-beseerde lugwaardin na nabygeleë hospitale geneem is. 'n Straatskoonmaker in die omtrek van die skool, Abraham Mthethwa [3] is deur die vliegtuig getref en is ook na die hospitaal geneem. Die kaptein het egter op 7 Oktober 2009 aan sy beserings beswyk.

Ondersoek[wysig | wysig bron]

Ondersoekbeamptes van die Suid-Afrikaanse Burgerlugvaartowerheid (BLO) was na die ongelukstoneel ontbied. Die BLO het die moontlike oorsaak van die ongeluk ondersoek. Die vlugdata-opnemer en die kajuitstemopnemer is opgespoor en gebruik in die ondersoek. British Aerospace, die vervaardiger van die vliegtuig, het 'n span tegniese kundiges gestuur om te help met die ondersoek, soos deur die BLO vereis.

Op 9 Oktober 2009 het die BLO 'n persverklaring uitgereik en die publiek se hulp gevra met die vind van 'n laerdeksel van een van die enjins. Die deksel het moontlik losgekom van die enjin tydens die opstyging en kon nie by die ongelukstoneel of die lughawe gevind word nie.

Op 23 Desember 2009 het die BLO die volgende persverklaring uitgereik:

"In die geval van die Merebank-ongeluk blyk die aanvanklike oorsaak te wees dat 'n enjin gestaak het tydens opstyging, wat uiteindelik gelei het tot 'n ongeluk nadat menslike betrokkenheid veroorsaak het dat die verkeerde enjin afgeskakel is. Hierdie tipe enjinprobleme het reeds voorheen op die BAe Jetstream 41 voorgekom en die oorsaak daarvan is aan die vervaardiger bekend."

Verwysings[wysig | wysig bron]

  1. Airlink flight SA 8911”. URL besoek op 2010-03-04.
  2. SA Airlink Plane Crash”. URL besoek op 2010-03-04.
  3. SA Airlink Accident – Update”. URL besoek op 2010-03-04.

Eksterne skakels[wysig | wysig bron]

Koördinate: 29°57′18″S 30°58′14″O / 29.95500°S 30.97056°O / -29.95500; 30.97056

Hierdie artikel is in sy geheel of gedeeltelik vanuit die Engelse Wikipedia vertaal.