Alan Stern

in Wikipedia, die vrye ensiklopedie
Jump to navigation Jump to search
S. Alan Stern
’n Beeld van die betrokke persoonlikheid.
Gebore 22 November 1957 (1957-11-22) (61 jaar oud)
New Orleans, Louisiana, VSA
Nasionaliteit Amerikaans
Alma mater Universiteit van Texas, Austin
Universiteit van Colorado, Boulder
Beroep Astrofisikus
Planetêre wetenskaplike

S. Alan Stern (geb. 22 November 1957) is ’n Amerikaanse planetêre wetenskaplike. Hy is die hoofondersoekbeampte van die New Horizons-sending na die Pluto-stelsel en die hoofwetenskaplike van die privaat maatskappy Moon Express.[1][2]

Biografie[wysig | wysig bron]

Stern het in 1975 aan die St. Mark's School of Texas gematrikuleer. Hy het daarna ’n B-graad aan die Universiteit van Texas in Austin behaal en in 1989 ’n doktorsgraad in astrofisika en planetêre wetenskap aan die Universiteit van Colorado in Boulder, Colorado.[3]

In die 1990's het hy aan verskeie navorsingsprojekte gewerk. Sy navorsing het gefokus op die bestudering van ons Sonnestelsel se Kuiper-gordel en Oort-wolk, komete, die natuurlike satelliete van die buiteplanete soos Pluto en die soeke na bewyse vir die bestaan van eksoplanete.

In 2007 is Stern deur Time Magazine aangewys as een van die wêreld se 100 invloedrykste mense. In 2008 het hy ’n direksielid van die Challenger-sentrum vir ruimtewetenskap-navorsing geword.[4]

Stern was al betrokke by 24 ruimtesendings, waarvan hy agt keer die hoofondersoekbeampte was. Een van sy projekte was die Southwest Ultraviolet Imaging System, ’n instrument wat op twee sendings die ruimte ingestuur is, in 1997 en 1999.[3][5] Hy het ook ’n paar wetenskapinstrumente ontwikkel vir planetêre en ander ruimtesendings.

Stern is tans die hoofondersoekbeampte van die New Horzons-sending om Pluto en sy mane te bestudeer. Hy is ’n groot teenstander van die Internasionale Sterrekundevereniging se opstelling van ’n definisie vir planete, veral die kriterium dat ’n planeet noodwendig sy wentelbaan moes "skoongevee" het – ’n besluit wat gelei het tot die degradering van Pluto van planeet tot dwergplaneet. Hy is van mening dat nie die Aarde, Mars, Jupiter of Neptunus hul wentelbane skoongevee het nie en het as hoof van die New Horizons-sending gesê: "Die New Horizons-projek […] sal nie die IAU se planeetdefinisie-besluit van 24 Augustus 2006 aanvaar nie."[6][7]

Verwysings[wysig | wysig bron]

  1. http://lunarscience.nasa.gov/articles/dr-alan-stern-named-chief-scientist-moon-express/
  2. http://www.googlelunarxprize.org/teams/moon-express/blog/moon-express-announces-dr-alan-stern-as-chief-scientist
  3. 3,0 3,1 http://www.nasa.gov/about/highlights/stern_bio.html
  4. http://www.challenger.org
  5. http://www.plutoportal.net/alanstern.htm
  6. Rincon, Paul (25 Augustus 2006). "Pluto vote 'hijacked' in revolt". BBC News. Geargiveer vanaf die oorspronklike op 29 Augustus 2006. Besoek op 3 September 2006.
  7. Stern, Alan (6 September 2006). "Unabashedly Onward to the Ninth Planet". The PI's Perspective. New Horizons Web Site. Besoek op 21 Desember 2006.