Andrew Murray McGregor

in Wikipedia, die vrye ensiklopedie
Jump to navigation Jump to search
Mimie en Andrew Murray McGregor. Sy was 'n dogter van ds. Arend Hofmeyr van die NG gemeente Hanover.

Andrew Murray McGregor (1873 - 20 September 1943) was predikant van die Nederduitse Gereformeerde Kerk, waarvan 'n kwarteeu in Drieankerbaai, Kaapstad.

Andrew Murray McGregor was die tweede seun van Andrew McGregor (1829 - 1918), wat in 1860 deur dr. William Robertson in Skotland gewerf is om as predikant in Suid-Afrika te kom arbei en in 1862 as stamvader van die McGregors na die land toe kom. Sy eerste en enigste gemeente was Robertson, waarvan die standplaas eers Hoopsrivier genoem is tot dit in 1853 ter ere van dr. Robertson hernoem is.

Herkoms[wysig | wysig bron]

Drie maande ná sy aankoms in die Kaapkolonie trou Andrew McGregor met Elizabeth Augusta, die oudste dogter van dr. Robertson, wie se vriende en familie haar "Lily" genoem het. Hulle het op Robertson gewoon tot ds. McGregor in 1902 afgetree en die egpaar hulle in Kaapstad gaan vestig het. Omdat hy so aktief op die dorpie Lady Grey, naby Robertson, gewerk het, is dit in die jaar van sy aftrede herdoop tot McGregor.

Andrew en Lily het tien kinders gehad, waarvan vier jonk dood is. Andrew Murray was hulle vierde kind wat volwassenheid bereik het. Hy is genoem na die beroemde ds. Andrew Murray, destyds van die NG gemeente Wellington, wat ook sy peetpa was.

Opleding en bediening[wysig | wysig bron]

Die Holy Brigade, in 1896 die Victoria-kollege se heel eerste rugbytoerspan, so genoem omdat hulle nooit 'n druppel drank oor hul lippe laat gaan het nie. Agter: D. Kloppers, C.V. Nel, P.A. Bergh, H.D. van Broekhuizen, Paul de Waal, P.K. Albertyn, A.L. Hofmeyr, Ebbe Dommisse, C.A. Neethling, H.R. Kemsley. Middel: M.S. Daneel, H.J. Bergh, J.M. Hofmeyr (kaptein), D. Morkel, G. Chapman. Voor: A. McGregor (na alle waarskynlikheid ds. McGregor), Piet de Vos, C. Gonin, P.A.M. de Vos.

Andrew Murray McGregor behaal sy B.A. aan die South African College en studeer daarna aan die Teologiese Seminarium op Stellenbosch. Nadat hy in Kaapstad in die bediening gestaan het in die Nieuwe Kerk, word hy predikant vir die konsentrasiekamp in Oos-Londen tydens die Tweede Vryheidsoorlog, waar hy ook as eerste leraar van die NG gemeente Oos-Londen op 9 September 1905 bevestig is. Van daar vertrek hy in 1909 na Oudtshoorn en op 14 Januarie 1914 word hy in die NG gemeente Drieankerbaai bevestig.

Die regering vra ds. Murray in 1915 om vir drie maande as kapelaan van die Unie-troepe in Duitswes-Afrika (Namibië) op te tree. Die kerkraad verleen verlof daartoe en verleng dit later vir 'n verdere drie maande.

Sy gesondheid was die laaste jare van sy bediening nie na wense nie en in 1934 moes hy ses maande lank siekteverlof neem. Hy ontvang sy demissie op 28 Julie 1939 en tree terselfdertyd af, maar dien daarna as leraar van die Presbiteriaanse gemeente op Oudtshoorn tot sy dood in September 1943. Jare vantevore, op 16 Mei 1910, het hy daar naby op Volmoed saam met ds. George Murray die hoeksteen gelê van die NG kerkgebou wat later die middelpunt sou word van die NG gemeente Volmoed, eers Armoed genoem.

Waardering[wysig | wysig bron]

Na sy dood skryf die Kerkbode oor hom: "Hy was manlik en beslis in sy optrede, maar daarby minsaam en hartlik van aard. In sy oortuigings het hy 'n broederlike gees gehandhaaf, dat dit geen bitterheid veroorsaak het nie."

Bronne[wysig | wysig bron]