Babilonstoring

in Wikipedia, die vrye ensiklopedie
Jump to navigation Jump to search

Babilonstoring (Babylonstoren, Babylons Toren) is 'n alleenstaande kegelvormige koppie in die Drakensteinvallei. Aan die voet van die heuwel lê Babylonstoren, een van die oudste plase in die Boland. Teenswoordig huisves die plaas 'n vakansieoord bestaande uit 'n hotel, verskeie restaurante, 'n spa en 'n gimnasium, maar ook 'n mooi tuin, 'n vrugteboord, 'n groentetuin, 'n wingerd en 'n wynkelder.

Ligging[wysig | wysig bron]

Hierdie plaas lê 6 km van Klapmuts en 4 km van Simondium aan die hellings van Simonsberg. Die kop is 253 m bo seevlak en is nagenoeg by 33° 49' suid en 18° 56' oos.

Ontwikkeling[wysig | wysig bron]

Na bewering het die Hugenote hul eerste kerkie êrens op hierdie plaas gebou. In 1692 het Simon van der Stel 33 morg grond hier aan Pieter van der Byl toegeken en 6 jaar later nog 28 morg daaraan toegevoeg. Van der Byl het die eerste wingerd hier aangeplant. Petrus Johannes de Villiers het die plaas waarskynlik in 1777 gekoop. Hy bou 'n huis rondom die aanvanklike huis van Van der Byl. Aan die einde van die 19de eeu is die oorspronklike gewels afgebreek om by die heersende Victoriaanse styl aan te pas. Vanaf 1878 tot 2007 was die plaas in besit van die Louw-familie. Tydens die Tweede Vryheidsoorlog was die Louws openlik pro-Boergesind. Daarom is hulle deur die Kaapkolonie se regering hier onder “plaasarres” geplaas. In 1931 het verdere restourasiewerk plaasgevind en is die gewels weer opgebou. Nou bestaan die ou opstal uit 'n H-vormige huis, mooi buitegeboue met gewels, 'n tipiese klokkestoel en mooi toegangspoorte tot die plaaswerf. Sedert 2007 is die plaas die eiendom van die joernalis Karen Roos, tot 'n plesieroord ontwikkel en het dit groter bekendheid verwerf.

Naam[wysig | wysig bron]

Die plaas se naam is ontleen aan Genesis 11. Babel beteken verwarring. Babilon lê aan die Eufraatrivier in Irak. Noord van Hermanus is ook 'n piek met dieselfde naam en dit bereik 'n hoogte van 1167 m bo seespieël. Ook in die omgewing van Nieu-Bethesda en Cradock in die Oos-Kaap is daar 'n Babilonstoring.

Bibliografie[wysig | wysig bron]

  • Fransen, Hans: A guide to the old buildings of the Cape. A survey of extant architecture from before c1910 in the area of Cape Town, Calvinia, Colesberg, Uitenhage. Kaapstad: Jonathan Ball, 2004. ISBN 1-86842-191-0
  • McGregor, Lindsaye en Erica Moodie: Wineries of the Cape. The essential companion to touring the winelands. Kaapstad: Sunbird, 2013. ISBN 978-1-920289-70-6
  • Standard Encyclopaedia of Southern Africa, deel 1. Kaapstad: Nasou, 1970.
  • Vertue, Eric: Op reis met Eric Vertue. Nuweland: Ou Mutual, 1976.
  • www.babylonstoren.com