Barbara Cartland

in Wikipedia, die vrye ensiklopedie
Spring na: navigasie, soek
Barbara Cartland
’n Beeld van die betrokke persoonlikheid.
Barbara Cartland by die joernalis Randy Bryan Bigham tydens haar laaste lewensjaar.

Geboortenaam Mary Barbara Hamilton Cartland
Geboorte 9 Julie 1901
Edgbaston, Birmingham
Sterfte 21 Mei 2000
Hatfield, Hertfordshire
Nasionaliteit Verenigde Koninkryk
Beroep Skrywer
Genre Romanse
Termyn in amp 1925–2000
Huweliksmaat Alexander McCorquodale (get. 1927–1933)
Hugh McCorquodale (get. 1936–1963)
Kind(ers) Raine McCorquodale
Ian Hamilton McCorquodale
Glen McCorquodale

Dame Barbara Cartland (1904–2000) was ’n Britse skryfster van 'n magdom romantiese verhale in 'n taamlik oudmodiese styl. Sy was een van die mees produktiewe en kommersieel suksesvolle skrywers van die twintigste eeu. Cartland was bekend vir haar liefde vir pienk klere, baie grimering en gesonde kos.[1]

Lewensloop[wysig | wysig bron]

Mary Barbara Hamilton Cartland is op 9 Julie 1901 in Edgbaston, Birmingham gebore. Sy was die enigste dogter en oudste kind van 'n Britse leëroffisier, majoor Bertram (Bertie) Cartland en sy vrou Mary (Polly) Hamilton-Scobell. Die familie is op die proef gestel toe haar oupa, James Cartland, ná 'n bankrotskap selfmoord gepleeg het.

Haar pa sneuwel in 1918 tydens die Eerste Wêreldoorlog in Vlaandere. Haar ma begin 'n klerebedryf in Londen om haar en haar boeties, Ronald (1907) en Anthony (1913), groot te kry. Beide haar broers is tydens die Tweede Wêreldoorlog by Duinkerken, een dag na mekaar, op 29 en 30 Mei 1940, oorlede.

Barbara Cartland in 1925.

Haar eerste roman, Jigsaw, is in 1923 uitgegee. Van 1927 tot 1932 was sy met Alexander George McCorquodale, 'n voormalige leëroffisier, getroud. Hy was die erfgenaam van 'n drukkery wat in 1964 (lank na hul egskeiding) oorlede is. Hul dogter Raine (1929), gravin Spencer, word in 1947 "Debutant van die Jaar" en in 1976 die stiefmoeder van Diana, Prinses van Wallis. Raine was daarnaas die ma van die Euro-parlementariër, William Legge (1949) gewees.

In 1936, na haar egskeiding, waartydens beide mekaar van ontrou beskuldig het, trou Cartland met 'n neef van haar later oorlede man, Hugh McCorquodale (1898–1964). Met haar tweede eggenoot, wat ook 'n voormalige leëroffisier was, het Cartland twee seuns gehad, Ian (11 Oktober 1937) en Glen (31 Desember 1939).

Cartland is op 21 Mei 2000, sewe weke voor haar 99ste verjaarsdag, vreedsaam in haar slaap oorlede. Sy is in 'n kis van karton begrawe, omdat sy altyd oor die omgewing bekommerd was. Sy is op haar privaatlandgoed in Hatfield, Hertfordshire, onder 'n eik wat deur koningin Elizabeth I geplant is, begrawe.[2]

Sy het self die omslae van haar boeke geskilder. Haar uitgewers skat dat sy in totaal 724 boeke geskryf het. In 2004 is 'n verdere 160 van haar ongepubliseerde romans ontdek. Sy is die Guinness World Records gelys vir die meeste romans wat in een jaar, in 1976, gepubliseer is.[3] Wêreldwyd het sy meer as een miljard boeke verkoop.

Sien ook[wysig | wysig bron]

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. "Dame Barbara Cartland". London: The Daily Telegraph. 22 Mei 2000. Verkry op 22 April 2013. 
  3. Severo, Richard (22 Mei 2000). "Barbara Cartland, 98, Best-Selling Author Who Prized Old-Fashioned Romance, Dies". New York Times. 

Eksterne skakels[wysig | wysig bron]