Barmen

Die nywerheidstad Barmen in 1870. Skildery deur August von Wille. Dié stad het in 1929 met vier ander dorpe saamgesmelt om die stad Wuppertal te vorm, 'n eeu ná die stigting van die sendingstasie Wupperthal in die Kaapkolonie.

Barmen was tot die samesmelting van vier nedersettings, onder meer Elberfeld, op 1 Augustus 1929 as die huidige stad Wuppertal, 'n nywerheidstad in die ooste van die Rynland, Duitsland. Sedertdien beslaan Barmen die distrikte Barmen, Heckinghausen en Oberbarmen binne die stedelike gebied van Wuppertal. Die Wesfaliese nedersetting Langerfeld, 'n eerstydse gemeente in die distrik Schwelm, nou die oostelike deel van die Wuppertalse stadsdistrik Langerfeld-Beyenburg, is reeds in 1922 by die stad Barmen ingelyf; so ook verspreide dele van die Wesfaliese dorp Nächstebreck, eens deel van die stad Sprockhövel.

Barmen is van belang vir Suider-Afrika omdat dit die hoofkantoor was van die Rynse Sendinggenootskap waar sendelinge vir Suid- en Suidwes-Afrika aan die Rynse Sendinginstituut opgelei en vanhier uitgestuur is na die Kaapkolonie, Namaland en Hereroland.