Brokeback Mountain

in Wikipedia, die vrye ensiklopedie
Jump to navigation Jump to search
Brokeback Mountain
Regisseur Ang Lee
Vervaardiger Diana Ossana
James Schamus
Draaiboek Larry McMurtry
Diana Ossana
Met Heath Ledger
Jake Gyllenhaal
Anne Hathaway
Michelle Williams
Musiek deur Gustavo Santaolalla
Kinematografie Rodrigo Prieto
Redigeerder Geraldine Peroni
Dylan Tichenor
Ateljee River Road Entertainment
Verspreider Focus Features
Uitgereik 2005
Speeltyd 134 min.
Land VSA, Kanada
Taal Engels
IMDb-profiel

Brokeback Mountain is ’n Amerikaanse romantiese dramarolprent van 2005 wat deur Ang Lee geregisseer is. Dit is geskoei op die 1997-kortverhaal met dieselfde naam deur Annie Proulx. Heath Ledger, Jake Gyllenhaal, Anne Hathaway en Michelle Williams is van die akteurs. Die verhaal gaan oor ’n ingewikkelde emosionele en seksuele verhouding tussen Ledger en Gyllenhaal se karakters in die Weste van 1963 tot 1983.[1]

Brokeback Mountain het goeie resensies gekry en was ’n kommersiële sukses. Dit het verskeie pryse gewen, onder meer die Goue Leeu op die Venesiese Rolprentfees en ’n paar Golden Globes. Dit is vir agt Oscars benoem, die meeste op die 78ste Oscar-toekenningsaand, en het drie gewen.

Storielyn[wysig | wysig bron]

Heath Ledger (Berlin Film Festival 2006) revised.jpg
Jake Gyllenhaal (22373266462) (cropped).jpg
Heath Ledger en Jake Gyllenhaal, die hoofkarakters van Brokeback Mountain.

In 1963 word Ennis Del Mar (Heath Ledger) en Jack Twist (Jake Gyllenhaal) deur Joe Aguirre (Randy Quaid) gehuur om sy skape in die somer in die Wyoming-berge op te pas. Nadat hulle ’n aand lank kwaai gedrink het, soek Jack seksuele toenadering by Ennis – dié is eers onwillig, maar reageer eindelik daarop. Hoewel hy Jack verseker dit was ’n eenmalige gebeurtenis, ontwikkel ’n emosionele en seksuele verhouding tussen hulle. Kort nadat hulle gehoor het hul somer saam is kortgeknip, baklei hulle en die bloed loop.

Nadat hul weë geskei het, trou Ennis met sy verloofde, Alma Beers (Michelle Williams) en het twee dogters by haar. Jack keer die volgende somer terug, maar Aguirre, wat Jack en Ennis op die berg gesien het, huur hom nie weer nie.

Jack trek na Texas, waar hy Lureen Newsome (Anne Hathaway) ontmoet. Hy trou met haar en het ’n seun by haar. Ná vier jaar besoek Jack vir Ennis. Toe hulle mekaar sien, soen hulle passievol en Alma sien dit per ongeluk. Jack roer die onderwerp aan van ’n lewe saam op ’n klein plaas, maar Ennis, by wie ’n beeld uit sy kinderdae spook van ’n man wat gemartel en vermoor is omdat vermoed is hy was homoseksueel, weier. Hy wil ook nie sy gesin verlaat nie. Ennis en Jack ontmoet mekaar daarna vir ongereelde hengeluitstappies.

Albei huwelike gaan agteruit. Lureen wil hê Jack moet saam met haar en haar pa werk, en Alma en Ennis skei in 1975. Toe Jack hoor Ennis is geskei, ry hy na Wyoming. Hy stel weer voor dat hulle saam bly, maar Ennis wil nie wegtrek van sy kinders nie. Jack vind troos by manlike prostitute in Mexiko. Ennis sien sy gesin gereeld, totdat Alma hom eindelik konfronteer oor sy ware verhouding met Jack. Dit loop uit op ’n gewelddadige argument en Ennis verbreek bande met haar. Hy ontmoet ’n kelnerin en het ’n kort verhouding met haar.

Jack en Lureen ontmoet ’n ander paartjie, Randall en Lashawn Malone, en raak met hulle bevriend. Daar word op gesinspeel dat Jack en Randall ’n affair agter hul vroue se rug begin.

Aan die einde van ’n hengeluitstappie met Jack, probeer Ennis hul volgende ontmoeting uitstel. Jack is gefrustreerd en woedend, en Ennis blameer hom vir sy eie botsende aksies.

’n Ruk later kry Ennis ’n poskaart wat hy vir Jack gestuur het, terug met ’n stempel "oorlede" daarop. Hy bel Lureen, wat sê Jack het in ’n ongeluk gesterf toe ’n band wat hy omgeruil het, ontplof het. Terwyl hy luister, verbeel Ennis hom dat Jack deur ’n bende aangeval word. Jack se lot word "met opset dubbelsinnig" gelos.[2] Lureen vertel Ennis dat Jack sy as op Brokeback Mountain gestrooi wou hê, maar sy weet nie waar dit is nie.

Ang Lee, die regisseur.

Ennis gaan ontmoet Jack se ouers en bied aan om sy as na die berg te neem. Die pa wys die aanbod van die hand omdat hy wil hê dit moet eerder by die res van die familie begrawe word. Ennis word toegelaat om Jack se slaapkamer uit sy kinderdae te sien en kry die bloedbevlekte hemp wat hy gedink het hy op Brokeback Mountain verloor het. Hy besef Jack het dit ná hul geveg op die berg saam met sy eie bloedbevlekte hemp gehou. Ennis hou dit teen sy gesig en huil. Jack se ma laat hom toe om die hemde te hou.

Rolverdeling[wysig | wysig bron]

Loketsukses[wysig | wysig bron]

Brokeback Mountain het sowat $14 miljoen gekos om te vervaardig, uitsluitend sy beweerde advertensiebegroting van $5 miljoen. Die prent het op 9 Desember 2005 ’n beperkte uitreiking gehad in New York, Los Angeles en San Francisco, en het in sy eerste naweek $547 425 in vyf teaters verdien.

Oor die Kersnaweek het die prent die meeste geld per teater verdien en was dit ’n lokettreffer nie net in stedelike gebiede nie, maar ook in voorstedelike teaters naby Portland, Houston, Chicago, Dallas, Denver en Atlanta. Op 6 Januarie 2006 is dit in 483 Noord-Amerikaanse teaters uitgereik, op 13 Januarie in byna 700 teaters, op 20 Januarie in 1 194 teaters, op 27 Januarie in 1 652 teaters en op 3 Februarie in 2 089 teaters.

Brokeback Mountain is 133 dae lank vertoon en het $83 043 761 in Noord-Amerika en $95 018 998 in ander lande gemaak. Dit het die meeste geld van al Focus Features se prente gemaak, die vyfde meeste van alle westerns sedert 1979 en die agtste meeste van alle romantiese flieks sedert 1980.

Dit was in Londen drie weke lank die no. 1-fliek, volgens die tydskrif Time Out London.[3] In die eerste drie maande van 2006 is dit ook in baie ander lande, onder meer Suid-Afrika, uitgereik.[4]

Pryse[wysig | wysig bron]

Oscars
1. Beste regisseur, Ang Lee
2. Beste oorspronklike musiek, Gustavo Santaolalla
3. Beste aangepaste draaiboek, Larry McMurtry, Diana Ossana
Golden Globes
1. Beste regisseur, Ang Lee
2. Beste prent – drama
3. Beste oorspronklike liedjie, Gustavo Santaolalla, Bernie Taupin
4. Beste draaiboek, Larry McMurtry, Diana Ossana
Baftas
1. Beste regisseur, Ang Lee
2. Beste rolprent, Diana Ossana, James Schamus
3. Beste manlike byspeler, Jake Gyllenhaal
4. Beste aangepaste draaiboek, Larry McMurtry, Diana Ossana

Brokeback Mountain het 71 pryse gewen en is vir nog 52 benoem.[5] Dit het onder meer drie Oscars gewen (vir beste regisseur, beste aangepaste draaiboek en beste musiek), asook vier Golden Globes (vir beste dramaprent, beste regisseur, beste liedjie en beste draaiboek) en vier Baftas (vir beste prent, beste regisseur, beste aangepaste draaiboek en beste manlike byspeler: Jake Gyllenhaal). Dit is op Thebacklot.com deur lesers aangewys as die topfliek oor homoseksuele verhoudings.[6]

Van die pryse wat Brokeback Mountain gewen het, benewens dié in die kassie regs, is:

  • 62ste Venesiese Rolprentfees: Goue Leeu vir beste prent (Ang Lee)
  • 11de Critics' Choice Awards: Beste prent (Diana Ossana, James Schamus), beste regisseur (Ang Lee), beste vroulike byspeler (Michelle Williams), beste oorspronklike liedjie (Emmylou Harris, Gustavo Santaolalla en Bernie Taupin, "A Love That Will Never Grow Old")
  • Directors Guild of America Award: Regisseur van die jaar – teaterrolprent (Ang Lee)
  • Europese Rolprentprys: Beste regisseur (Ang Lee)
  • GLAAD-mediaprys: Uitmuntende rolprent — wyedoek (Ang Lee, Diana Ossana, James Schamus)
  • Independent Spirit Awards: Beste prent (Diana Ossana, James Schamus), beste regisseur (Ang Lee)[7]
  • MTV-rolprentpryse: Beste spel (Jake Gyllenhaal), beste soen (Heath Ledger & Jake Gyllenhaal)
  • Time: TIME 100: The People Who Shape Our World (2006) (Ang Lee)[8]
  • Writers Guild of America Award: Beste aangepaste draaiboek (Larry McMurtry, Diana Ossana)
  • National Gay Pride Association: Beste rolprent (Diana Ossana, James Schamus)
  • Australiese Rolprentinstituut: Best internasionale akteur (Heath Ledger)

Verwysings[wysig | wysig bron]

  1. Proulx, Annie; McMurtry, Larry; Ossana, Diana (2005, 2006). Brokeback Mountain: Story to Screenplay. Londen, New York, Toronto en Sydney: Harper Perennial. ISBN 978-0-00-723430-1.
  2. Gorton, Don (Mei–Junie 2006). “The Hate Crime13 (3): 13–14. Besoek op 10 September 2013.
  3. Tilly, Chris. "Spielberg finally topples 'Brokeback Mountain'". Time Out London. Besoek op 11 Mei 2006. 
  4. "Release dates for Brokeback Mountain". Internet Movie Database. Besoek op 27 Mei 2006. 
  5. "Awards for 'Brokeback Mountain'". Internet Movie Database. Besoek op 23 Julie 2007. 
  6. http://www.thebacklot.com/top-100-greatest-gay-movies-2/01/2015/13/
  7. Germain, David (4 Maart 2006). "'Brokeback' named best independent film". Associated Press (via USA Today). Besoek op 19 April 2012. 
  8. "2006 TIME 100: The People Who Shape Our World". Time. Besoek op 23 Julie 2007. 

Verdere leesstof[wysig | wysig bron]

  • Proulx, Annie (1997, 1999, 2006). Close Range: Wyoming Stories.
  • Proulx, Annie; McMurtry, Larry; Ossana, Diana (2005, 2006). Brokeback Mountain: Story to Screenplay. Londen, New York, Toronto en Sydney: Harper Perennial. ISBN 978-0-00-723430-1.
  • Packard, Chris (2006) Queer Cowboys: And Other Erotic Male Friendships in Nineteenth-Century American Literature. New York: Palgrave Macmillan. ISBN 1-4039-7597-3.
  • Cante, Richard C. (Maart 2008). "Introduction"; "Chapter 3". Gay Men and the Forms of Contemporary US Culture. Londen: Ashgate Publishing. ISBN 0-7546-7230-1.

Eksterne skakels[wysig | wysig bron]