Bruce Chatwin

in Wikipedia, die vrye ensiklopedie
Jump to navigation Jump to search
In Patagonia (1977) word as 'n meesterwerk binne die genre van reisliteratuur beskou

Charles Bruce Chatwin (* 13 Mei 1940 in Sheffield, † 18 Januarie 1989 in Nice, Frankryk) was 'n Engelse joernalis wat veral bekendheid verwerf het met sy reisverhale en romans. Sy eerste boek, In Patagonia (1977), 'n meesterlike beskrywing van die uiterste suide van die Suid-Amerikaanse vasteland, het Chatwin se reputasie as 'n eersterangse reisskrywer gevestig, alhoewel Chatwin homself eerder as 'n storieverteller beskou het wat daarin belang gestel het om ongewone verhale die lig te laat sien.

Sy roman On the Black Hill (1982) is met die James Tait Memorial Prize bekroon, terwyl Utz (1988) vir die Man Booker Prize aangewys is. Die Britse dagblad The Times het Chatwin as nommer 46 op sy lys van die 50 Greatest British Writers Since 1945 geplaas.

Bruce Chatwin is in Sheffield in 'n middelklasgesin gebore.[1] Sy vader was 'n advokaat. Op die ouderdom van 18 het hy by Sotheby's in Londen begin werk en uitgebreide kennis oor kuns verwerf - genoeg om uiteindelik die veilinghuis se afdeling Antikwiteite en Impressionistiese Kuns te bestuur. In 1966 het hy uit sy pos bedank om argeologie aan die Universiteit van Edinburg te studeer. Ná twee jaar het hy sy studies laat vaar om 'n loopbaan as skrywer te begin.

In 1972 is Chatwin deur die The Sunday Times Magazine aangestel. Hy het deur die hele wêreld gereis om onderhoude met bekende persoonlikhede soos Indira Gandhi en André Malraux te voer. In 1974 het hy uit die pos by die tydskrif bedank om deur Patagonië te reis. Hieruit het sy eerste boek voortgespruit. Dit is opgevolg deur vyf ander werke, insluitende The Songlines (1987), wat 'n blitsverkoper sou word. Sy skryfwerk het nuwe lewe in die genre van reisverhale ingeblaas en sterk invloed uitgeoefen op ander skrywers soos William Dalrymple, Claudio Magris, Philip Marsden, Luis Sepúlveda en Rory Stewart.

As 'n getroude biseksuele man, was Chatwin een van die eerste bekende persoonlikhede in die Verenigde Koninkryk wat met die Verworwe Immuniteitsgebreksindroom (Vigs) besmet is en aan 'n Vigs-verwante siekte beswyk het.

Verwysings[wysig | wysig bron]

  1. Nicholas Shakespeare: Bruce Chatwin. London: Vintage 2000, bl. 13

Eksterne skakels[wysig | wysig bron]