Carina Diedericks-Hugo

in Wikipedia, die vrye ensiklopedie
Jump to navigation Jump to search

Carina Diedericks-Hugo is ’n bekroonde Afrikaanse skrywer van jeugverhale. Sy was getroud met die digter Daniel Hugo.

Lewe en werk[wysig | wysig bron]

Carina Diedericks is op 11 Maart 1977 in Johannesburg gebore as die jongste van drie kinders. Sy het twee ouer broers, Christiaan en Gerhard. Sy word groot in Johannesburg, Pretoria en Kaapstad. Haar skoolopleiding begin sy in Roodepoort by die Laerskool Horison en in Pretoria bly die gesin vir vier jaar in Waterkloofrif en gaan sy na die Laerskool Anton van Wouw. Aan die begin van graad ses trek hulle na Kaapstad, waar hulle eers by die see bly en later Constantia toe trek. Sy gaan na die Laerskool Groote Schuur en matrikuleer dan in 1995 aan die private Herschel Girls School in Claremont. In haar matriekjaar is sy onderhoofmeisie. Sy besoek Boston in Amerika in graad elf as uitruilstudent, waar sy skoolgaan aan Brooks School. Hierdie geleentheid gebruik sy om vir ses weke deur Amerika te reis en gaan van Boston via Cape Cod, Washington, Atlanta en Orlando na Miami. Daarvandaan gaan sy na New Orleans, oor die breedte van Amerika na die Grand Canyon, Dallas en Las Vegas en dan na Los Angeles, San Diego en San Francisco. Hiervandaan gaan sy noord na Seattle, maak ’n draai by die Niagara-waterval en spandeer geruime tyd in New York voordat sy na Suid-Afrika terugkeer om te matrikuleer.

Aan die Universiteit van Stellenbosch behaal sy in 1999 ’n B.A.-graad met lof in Internasionale Studies, in 2000 ’n B.A. Honneurs-graad met lof in Afrikaans-Nederlands en in 2005 ’n M.Phil.-graad met lof in Joernalistiek. In Maart 2003 word sy aangestel as kinderboekredakteur by Human & Rousseau Uitgewers, waarna sy in Maart 2008 ’n betrekking aanvaar as redakteur by Protea Boekhuis. In hierdie tyd dien sy ook as ondervoorsitter van die Stigting vir Bemagtiging deur Afrikaans. Daarna is sy skrywer, resensent en onafhanklike uitgewerskonsultant, waar sy onder andere reis-artikels skryf vir Great Guide. In 2015 is sy vir ’n ruk assistent-bestuurder van Bartinney Wine and Champagne Bar, waarna sy optree as kommunikasie-bestuurder van Longridge Wine Estate. Sy is getroud met die digter Daniel Hugo en hulle bly eers in Observatory in Kaapstad en daarna op Stellenbosch. Hierdie huwelik beland egter in 2012 op die rotse en in 2014 raak sy verloof aan Bertus van Niekerk.

Skryfwerk[wysig | wysig bron]

Sy skryf jeugboeke en is veral bekend vir die “Thomas@”-reeks. Thomas Steyn is saam met sy vriende Hannes en Thabo en vriendin Alex betrokke in avonture wat in die hedendaagse wêreld van Internet-kafees, rekenaarspeletjies en multikulturele woonbuurte afspeel. Die reeks spreek nie sosiale probleme nie en is eerder daarop gemik om goeie gehalte leesplesier te verskaf. Hierdie boeke is uniek in sy aanwending van elektroniese platforms wat die skrywer gebruik om die storie te help vertel. “[Thomas@skerpioen.net]” vertel hoe die maats die nuwe rekenaarspeletjie toets wat Harry van die Cyber Tiger internet-kafee vir hulle gee. Skielik verskyn ’n skerpioen en rye en rye syfers op die rekenaarskerm. Thomas is oortuig dat dit ’n rekenaarvirus is, maar hy het ander belangrike dinge by die skool wat hom besig hou. Dan breek iemand in die middel van die nag by sy kamer in en krap tussen sy CD’s rond. Dit wil lyk asof iemand desperaat is om die CD met die rekenaarspeletjie in die hande te kry. In “[Thomas@aqua.net]”[1] gaan Thomas en sy maats vir die langnaweek see toe.[2] Hier ontdek hy ’n deurtjie in die vloer van hulle strandhuis en in hulle speurtog moet hulle ’n hele spul raaisels oplos. Die hooftema is perlemoendiefstal en smokkelary. “[Thomas@sms.net]” word in 2005 bekroon met die ATKV Kinderboektoekenning vir Graad 6-7. In “[Thomas@nagmerrie.net]”[1] word die sepie-ster Fleur Vermaak ’n klasmaat van Thomas-hulle. Hannes is onmiddellik verlief op haar, maar sy het net oë vir Thomas, wat getrou bly aan Alex. Thomas sien egter ’n geheimsinnige man wat agter Fleur aan is. In 2006 verower “[Thomas@nagmerrie.net]” die ATKV Kinderboektoekennings vir Graad 6-7. “Thomas@aksie.net[3] verower in 2008 die ATKV Kinderboektoekennings vir Graad 6-7. Thomas-hulle se skooltoer na Namibië is die onderwerp van [1]“[Thomas@geraamte.net]”. Tydens hulle besoek aan die geheimsinnige spookdorp Kolmanskop sien Thomas ’n verdagte man wat naby sy kar op ’n selfoon praat. Thomas en Alex hoor toevallig ’n deel van die gesprek, waarna Thomas gewaarsku word dat Alex sal seerkry as hy iets daaroor sou sê.[4] “[Thomas@rockstar.net]” is ’n geïntegreerde leeservaring omdat dit kom saam met ekstras soos QR-kodes wat die leser lei na ’n foto, klankgreep en video; ’n spesiale MXit-kanaal en die webwerf van die Radikale Rockfees waar die leser sy eie musiek kan meng.[5] Thomas se vriende Lukas, Thabo en Hannes begin die Hectic Hamburgers rockorkes sonder hom en hulle gaan aan ’n groot rockfees deelneem. Sy meisie Alex bring hopeloos te veel tyd saam met Hannes deur en hy beland in die moeilikheid by die skool. Al die mededinging lei eindelik tot gewelddadige optrede. Hierdie boek word in November 2011 vir sy multimedia aanslag met ’n silwer Pendoring-toekenning vir reklame bekroon as wenner in die Kategorie Geïntegreerde Veldtogte. In “Thomas@vrees.net” luister Thomas laat een aand ’n geheimsinnige gesprek af, waarna hy oortuig is sy pa is bang vir iets of iemand. In die gesprek word verwys na ’n geheimsinnige Rus en dat Thomas en sy gesin ekstra beskerming nodig het. Hierna probeer Thomas uitvind wat agter alles sit in ’n spannende speurverhaal. Die “Thomas@”-reeks word vir die televisie verfilm en vanaf April 2013 op KykNet gebeeldsaai. Henriëtta Gryffenberg is die hoofskrywer van die eerste reeks, met Carina wat self ’n paar episodes skryf, waarna Carina vir die tweede reeks oorneem as hoofskrywer.

Sy skryf ook ’n aantal ander jeug- en kinderboeke. “Koning Henry[6] is die ironiese bynaam van die hoofkarakter Henry de Vries, wat oorgewig is, ongewild by sy klasmaats en ’n treurige sportman. Deur sy toevlug te neem tot die rekenaar ontdek hy gaandeweg homself en leer om sy probleme te oorkom. In 2004 verower “Koning Henry” ’n ATKV Kinderboektoekenning vir Graad 8-10 en hierdie boek is in dieselfde jaar ook op die kortlys vir die toekenning van die M.E.R.-prys vir jeuglektuur.[7]Operasie M.I.A.A.U.[8] (wat staan vir Die Magtige Internasionale Anti-Aapskeloerders-Unie) is vir jonger kinders en het die elfjarige seun Felix as hoofkarakter. Teen sy sin word hy by die geheime organisasie M.I.A.A.U. betrek, wat deur katte bedryf word en wat bullebakke met bose magte vastrek. Die katte sien neer op mense en verwerdig hulle slegs om met Felix te praat omdat hy hulle kan help om ’n bose plan, wat kinders en katte se lewens kan versuur, te fnuik. In 2006 word “Operasie M.I.A.A.U” met ’n ATKV Kinderboektoekenning vir graad 4-5 bekroon.[9]Die verdrinking van Josua van Eeden” begin die dag wanneer Josua deur weerlig getref word. Wanneer hy sy oë oopmaak, is die eerste ding wat hy sien ’n engel met ’n skootrekenaar onder die arm en bevind hy hom in die wêreld van gevaarlike en komplekse tegnologiese speletjies, terwyl verhoudings met die teenoorgestelde geslag nie uitbly nie. Dinge raak meer ingewikkeld wanneer hy ontdek alles is meer as net ’n speletjie en alles word deur ’n meester beheer. Die manuskrip van[3]Permanente ink” is in 2011 ’n gesamentlike naaswenner in Lapa se jeugromankompetisie en wen in 2012 die ATKV-kinderboektoekenning vir graad 8-10. Hierdie roman handel oor ’n reeksmoordenaar wat in Kaapstad doenig is en tienerpaartjies teiken as sy slagoffers. Die paartjies se lyke word elke keer langs mekaar gevind, die meisies met ’n steekwond in die bors en die seuns vergiftig. Vier van Hoërskool Duiwelspiek se graad 11-leerlinge kry dan die opdrag om die ou koshuis te renoveer as deel van hulle detensie-straf en hulle raak toenemend betrokke by geheimsinnige mense en gebeure.

In 2000 wen sy die Insig-MTN-Woordfees Skrywerskompetisie en die Bloemfonteinse Skrywersvereniging se Skrywerskompetisie. Sy is ’n finalis vir die Sanlamprys vir Jeuglektuur in 2002.

Publikasies[wysig | wysig bron]

Jaar Publikasies
2000 Oogkontak
2001 thomas@moord.net
2002 [[1]]
thomas@virus.net
2003 Koning Henry
thomas@aqua.net
2004 thomas@sms.net
2005 Operasie M.I.A.A.U.
thomas@nagmerrie.net
2007 [[2]]
2008 Die verdrinking van Josua van Eeden
2009 thomas@skerpioen.net
thomas@geraamte.net
2011 Permanente ink
2013 thomas@vrees.net
Vertalings
2013 Bokveld binnekort – Charlie Human

Bronnelys[wysig | wysig bron]

Boeke[wysig | wysig bron]

  • Wybenga, Gretel en Snyman, Maritha (reds.) “Van Patrys-hulle tot Hanna Hoekom” Lapa-Uitgewers Eerste uitgawe Tweede druk 2005

Tydskrifte en koerante[wysig | wysig bron]

  • Anoniem “Gewilde skrywer nuwe SBA-ondervoorsitter” “Die Burger” 1 Oktober 2004
  • Beeton, Marisa “Carina laat Thomas leef” “Rapport” 20 Januarie 2008
  • Jacobs, Jaco “Die vrou agter Thomas” “Die Burger” 6 Februarie 2006
  • Oosthuizen, Mia “Die wonder van die reeksboek” “Rapport” 2 Februarie 2014

Internet[wysig | wysig bron]

Ongepubliseerde dokumente[wysig | wysig bron]

  • Diedericks-Hugo, Carina “ Diedericks-Hugo – Biografiese skets” Nasionale Afrikaanse
  • Letterkundige Museum en Navorsingsentrum (NALN) Bloemfontein

Resensies[wysig | wysig bron]

  1. 1,0 1,1 1,2 Duminy, Aldu “Jip” 14 Maart 2011
  2. Vorster, Magdel “Beeld” 28 Junie 2004
  3. 3,0 3,1 Stander, Solette “Rapport” 19 Augustus 2012
  4. Duminy, Aldu “Jip” 29 Augustus 2011
  5. Hambidge, Joan “Rapport” 28 Augustus 2011
  6. Van der Walt, Thomas “Beeld” 22 September 2003
  7. Snyman, Maritha “Beeld” 1 Augustus 2005
  8. Snyman, Maritha “Kakkerlak” Uitgawe 7, 2007
  9. Nieuwoudt, Stephanie “Boeke Insig” No. 6, Somer 2009