Protea Boekhuis

in Wikipedia, die vrye ensiklopedie
Jump to navigation Jump to search
Dr. Nicol Stassen, stigter en besturende direkteur, het Protea Boekhuis sedert 1992 uitgebou tot een van die grootste drie Afrikaanse uitgewerye en die grootste wat nie aan 'n mediagroep of organisasie behoort nie.
Kristèl de Weerd werk sedert Junie 2008 as Afrikaanse redakteur by Protea Boekhuis.
Die skrywer Deborah Steinmair het in 2019 as redakteur by Protea Boekhuis aangesluit.

Protea Boekhuis is ’n onafhanklike Suid-Afrikaanse uitgewer van hoofsaaklik Afrikaanse maar ook Engelse boeke, onder meer fiksie, niefiksie, naslaanwerke en kinderlektuur.

Die skrywer, navorser en sakeman dr. Nicol Stassen het Protea Boekhuis in Oktober 1992 as ’n klein tweedehandseboekwinkeltjie in Hatfield, Pretoria, begin. Die onderneming het mettertyd gegroei tot 15 akademiese boekwinkels landwyd in Suid-Afrika. Teen 2019 was Protea Boekhuis die tweede grootste akademiese boekhandelgroep in die land. Die Hatfield-tak het al verskeie pryse as die beste akademiese boekwinkel in Suid-Afrika ontvang. ’n Hele paar takke spesialiseer in algemene, antikwariese en Afrikaanse boeke. Protea Boekhuis in Hatfield is die grootste Afrikaanse boekwinkel in die wêreld en die grootste akademiese boekwinkel in Suid-Afrika.

In 1998 het Protea Boekhuis begin om per geleentheid boeke te publiseer. Die uitgewery het mettertyd ’n sakeondernming uit eie reg geword en teen 2019 was dit een van die grootste drie Afrikaanse uitgewers en die grootste Afrikaanse uitgewer wat nie aan ’n mediagroep (Media24 in die geval van die grootste uitgewery) of groot organisasie (Lapa is ’n afdeling van die ATKV) behoort nie. Dit is ook een van die 15 grootste uitgewers van algemene boeke in Suid-Afrika. Protea Boekhuis hou ’n omvangryke internasionale uitgewersnetwerk in stand deur jaarliks die Frankfurtse Boekebeurs en die Bologna Kinderboekebeurs te besoek.

Die uitgewer se boeke is met die jare meermale bekroon, onder andere met die Hertzogprys, die mees prestigeryke boekprys in Suid-Afrika, wat drie keer aan Protea-publikasies toegeken is. Protea Boekhuis se vertalings het reeds amper elke vertaalprys in die land gewen. In 2016 is Protea Boekhuis se duisendste boek, The Thirstland Trek, 1874–1881 (deur die stigter, dr. Nicol Stassen), gepubliseer. Die Genealogiese Genootskap van Suid-Afrika het die Afrikaanse weergawe van dié werk in 2019 met ’n trofee bekroon as ’n uitmuntende genealogiepublikasie.

Protea Boekhuis spesialiseer in die publikasie van Afrikaanse poësie en dramas, vertalings van die beste kinderboeke ter wêreld in Afrikaans, toonaangewende niefiksie en die Suid-Afrikaanse geskiedenis. Vele bestaande titels word ook by Protea Boekhuis heruitgegee.

Bronne[wysig | wysig bron]