Carl George Klibbe

in Wikipedia, die vrye ensiklopedie
Jump to navigation Jump to search

Carl George Klibbe (24 Desember 1852 - 21 Mei 1931) was die stigter en apostel van die Nuwe Apostoliese Kerk in Suid-Afrika en later die Ou Apostoliese Kerk.[1]

Klibbe word op 24 Desember 1852 in Ossecken, Pomerania gebore. Hy tree in die huwelik met Christina Henriette Krause. Vier seuns (Friedrich, Herman George, Charles en John) en twee dogters (Amalie Hermine en Anne Wilhermine) is uit die huwelik gebore.

Hy word 'n Lutherse geestelike, waarna hy vanaf Duitsland na Skotland en toe na Australië verhuis. In Australië kom hy in kontak met apostel H.F. Niemeyer van die Apostoliese Kerk. Hy sluit by Niemeyer se kerk aan. In 1889 word hy deur Niemeyer na Suid-Afrika as 'n evangelis gestuur. [2]

Klibbe se eerste poging om 'n gemeente te stig in Bellville en Worcester was onsuksesvol. Hy stig wel die eerste Apostoliese gemeente in Southernwood, Oos-Londen.

Op 8 Julie 1893 word Klibbe deur Niemeyer verordineer as apostel vir die Apostoliese Kerk vir Afrika.

Klibbe neem die eerste verseëlingsdiens in Suid-Afrika in Woodstock waar.

Na 1908 begin Klibbe homself meer en meer onttrek van die kerk se leierskap in Duitsland wat die naam van die Nuwe Apostoliese Kerk dra. In 1913 word Wilhelm Schlaphoff in sy plek as apostel aangestel en hy van sy pligte onthef deur die Hoofapostel van die Nuwe Apostoliese Kerk. [3]

In 1915 verklaar die Suid-Afrikaanse tak van die Nuwe Apostoliese Kerk onder Klibbe onafhanklikheid van die Duitse Kerk. Die redes vir die onafhanklikheidsverklaring is die persoonlikheidskultus wat ontstaan het rondom Hermann Niehaus en die Hoofapostel-amp. Klibbe was ook ontevrede omdat die profete-amp in Duitsland afgestel is.

Vanaf 1915 is daar in Suid-Afrika twee groepe met die naam Nuwe Apostoliese Kerk en dit lui tot 'n hofgeding wat later buite die hof geskik is.

As deel van die ooreenkoms het Klibbe besluit dat sy groep die naam Ou Apostoliese Kerk van Afrika sal gebruik en Schlaphoff se groep sal die Nuwe Apostoliese Kerk wees.

Klibbe sterf op 21 Mei 1931 en word vanuit die Regents Park gemeente van die Ou Apostoliese Kerk begrawe. Hy word opgevolg deur C.F.W. Ninow, W. Campbell en E.F.W. Ninow.

Verwysings[wysig | wysig bron]