Die Dood (tarotkaart)
Die Dood is die 13de troefkaart in tarotkaartspeletjies en die 13de Groot Arcana-kaart in pakke vir waarsêery. Dit word in albei gebruik. Die kaart beeld gewoonlik die Skoppensboer uit en word dikwels in waarsêery vertolk as 'n groot verandering in iemand se lewe.
Beskrywing[wysig | wysig bron]
Sommige pakke, soos die Tarot van Marseille en die Visconti-Sforza-tarot, laat die naam van die kaart weg en noem dit "die kaart sonder naam", wat gewoonlik dui op 'n breër betekenis as die letterlike dood. In sommige ander pakke word dit "Hergeboorte" of "Dood-Hergeboorte" genoem.
Die kaart beeld dikwels die Skoppensboer, die personifikasie van die dood, uit. In sommige pakke ry die Skoppensboer op 'n wit perd (soos een van die vier ruiters van die Apokalips[1] en hy hou dikwels 'n sekel of sens vas. Om die Skoppensboer lê dooie en sterwende mense van alle klasse, insluitende konings, biskoppe en gewone mense. Die Rider-Waite-tarotkaart wys 'n geraamte wat 'n banier met die Wit Roos van York vashou. Op die agtergrond is twee torings en die opkomende son.
Vertolking[wysig | wysig bron]
Volgens Eden Gray, wat die esoteriese betekenis van tarotkaarte beskryf het, en ander skrywers is dit ongewoon dat die kaart werklik die dood verteenwoordig. Dit dui eerder op 'n einde, soos van 'n verhouding of belangstelling, en dus 'n toenemende sin van selfbewussyn.[2][3] Gray vertolk eintlik die kaart as 'n verandering van denke, van 'n ou na 'n nuwe manier. Die perd Dood trap bo-oor 'n uitgestrekte koning, wat beteken nie eens koninklikes kan verandering keer nie.[4] Die omgekeerde kaart kan vertolk word as stagnasie en die onvermoë om te kan beweeg of verander, volgens Gray.[5]
A.E. Waite skryf in sy boek van 1910 Pictorial Key to the Tarot die doodskaart het verskeie verbintenisse in waarsêery:[6]
13 DIE DOOD – einde, sterflikheid, verwoesting, korrupsie; ook, vir 'n man, die verlies van 'n weldoener; vir 'n vrou, die verlies van 'n diensmaagd, of van huweliksprojekte. Omgekeer – traagheid, slaap, lusteloosheid, verstarring, slaaploosheid; verydelde hoop.
In astrologie word die kaart verbind met die diereriemteken Skerpioen en sy heersende planeet, Pluto.[7]
Ander weergawes[wysig | wysig bron]
- In die Mitiese tarotpak word Die Dood deur Hades uitgebeeld.
- In die Son-en-Maanpak word dit uitgebeeld as 'n vrou in 'n vuur met vlerke. Die titel is "Dood-Hergeboorte".
- In die Star Spinner-pak word dit uitgebeeld as Nyx wat haar kind, Tanatos, vashou.
Voorbeelde[wysig | wysig bron]
-
Charles VI (15de eeu) -
Visconti-Sforza-tarot (15de eeu) -
Visconti-Sforza-tarot (15de eeu) -
Tarot van Marseille (1701-'15) -
Rauch Troccas (1831-'38) -
Florence Minchiate (1860-'90) -
Solesio Piedmontese (1865) -
Lequart Tarot van Marseille (1890) -
Grimaud Etteilla (1890) -
Papus (die kaart sonder naam, 1909)
Sien ook[wysig | wysig bron]
Verwysings[wysig | wysig bron]
- ↑ Openbaring 6:1-2
- ↑ Gray, Eden. The Complete Guide to the Tarot.
- ↑ Bunning, Joan. Learning the Tarot.
- ↑ Gray, Eden. Complete Guide to the Tarot (1970). New York: Crown Publishers.
- ↑ Gray, Eden. The Tarot Revealed (1960). New York: Bell Publishing Company.
- ↑ Waite, Arthur Edward (1979). The Pictorial Key to the Tarot. New York: Samuel Weiser. p. 285. ISBN 0-87728-218-8.
- ↑ "The Death Tarot Card". askAstrology.
Skakels[wysig | wysig bron]
Wikimedia Commons het meer media in die kategorie Die Dood (tarotkaart).
Hierdie artikel is in sy geheel of gedeeltelik uit die Engelse Wikipedia vertaal.
