Dirk Laufs

in Wikipedia, die vrye ensiklopedie
Ds. Dirk Laufs
Ds. Dirk Laufs
Ds. Dirk Laufs

Naam Dirk Laufs
Geboorte 12 Februarie 1947 (1947-02-12) (77 jaar oud)
Potchefstroom, Suid-Afrika
Kerkverband Gereformeerd
Gemeente(s) Bethulie 1972–'75
Die Moot 1975–'76
Voortrekkerhoogte 1976–'77
Olifantshoek 1977–'82
Durban-Wes 1982–'89
Alberton-Wes 1989–2004
Jare aktief 1972–2004
Kweekskool Potchefstroom

Ds. Dirk Laufs (gebore Potchefstroom, 12 Februarie 1947) was tussen 1972 en sy emeritaat in 2004 predikant in ses gemeentes van die Gereformeerde Kerke in Suid-Afrika

Herkoms en opleiding[wysig | wysig bron]

Dirk Laufs en sy tweelingsuster, Maria (oorlede op 3 Mei 2017), was die enigste kinders van Gerhardus Hendrik (Gert) Laufs (gebore 13 Desember 1919) en sy vrou, Maria Catharina Elizabeth Brits (gebore 3 Oktober 1921). Hy het sy skoolloopbaan begin aan die Laerskool De Beer op Welverdiend en is daarna na die Hoërskool Carletonville, waar hy lid was van die eerste spanne in rugby, tennis, atletiek en krieket. Hy het ’n rol vertolk in die skool se operette-opvoering en was vanaf 1963 leerlingraadslid en die jaar daarna hoofseun.

Aan die PU vir CHO het hy in 1967 sy B.A. verwerf en in 1971 die graad Th.B, waarna ook die Th.M. aan die PUK. Op universiteit het hy in 1966 en 1967 in die studenteraad gedien, terwyl hy in 1968 koshuisprimarius was.

Ds. G.P. Scheeprs het Laufs op 25 Januarie 1969 in die Gereformeerde kerk Thabazimbi met Petronella Jacoba (Ronél) Coetzee in die eg verbind. Sy is op 10 Augustus 1946 as ‘n dogter van Tjaart Andries Coetzee (26 Julie 1921) en Petronella Jacoba Venter (11 September 1924) gebore. Uit hul huwelik is drie kinders gebore: Petronella Jacoba (3 September 1973), Gerhardus Hendrik (26 November 1974) en Maria Elizabeth (11 April 1978).

Gemeentebediening[wysig | wysig bron]

Ds. Laufs se gemeentebediening het in 1972 begin toe hy bevestig is in sy eerste gemeente, Bethulie. Vyf jaar later het die gesin na Die Moot (nou Hartbeespoort) verhuis, maar net sowat ’n jaar daar gebly toe ds. Laufs die beroep aanneem na Voortrekkerhoogte vir nog ’n sowat jaar lange bediening. Hierna is hulle in 1977 na Noord-Kaapland waar ds. Laufs die gemeente Olifantshoek tot 1982 bedien het, toe hy die beroep aanvaar na Durban-Wes. In 1989, die jaar voor die gemeente ontbind het, het ds. Laufs ’n beroep aangeneem na sy laaste werkkring, Alberton-Wes, waar hy die volgende 15 sou bly tot sy emeritaat in 2004.

Ds. Laufs se persoonlike roepingsbewuswording het hom op jeugdige ouderdom reeds laat besluit om vir predikant te leer. Hy beskryf die deurlopende ervaring van Gods genade as die hoogtepunt van sy bediening, ten spyte van die geestelike, emosionele en liggaamlike eise wat die bediening aan hom gestel het. Vir hom was die groot uitdaging om die kerk steeds “semper reformanda” te bly hou te midde van ongeregverdigde en ongegronde sogenaamde konserwatisme. Hy som sy lewensfilosofie kortliks op as: Soli Deo Gloria.

Belangstellings en skryfwerk[wysig | wysig bron]

Sy stokperdjies is leerlooiery en houtwerk, terwyl hy veral belangstel in “enigiets wat entrepreneurend die koninkryk kan en wil uitbou”. Benewens sy Th.M.-verhandeling, Die Teologiese Skool en die Tweede Vryheidsoorlog 1899–1902, het uit sy pen ook verskeie preke en artikels in kerklike en teologiese tydskrifte verskyn.

Gesinslewe[wysig | wysig bron]

Ds. Laufs is op Saterdag 19 Junie 2021 met sy tweede vrou, Eline, getroud nadat sy eerste vrou, Ronel, op 29 April 2021 oorlede is.

Bronne[wysig | wysig bron]

  • (af) Vogel, ds. Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.