Groot Lawra (Athos)

in Wikipedia, die vrye ensiklopedie

Koördinate: 40°10′16″N 24°22′58″E / 40.17111°N 24.38278°O / 40.17111; 24.38278

Die Groot Lawra.
Die klooster se hoofkerk.

Die Groot Lawra (Grieks: Μεγίστη Λαύρα, Megísti Lávra) is die eerste klooster wat op Berg Athos in Griekeland gebou is. Dit is aan die suidoostelike voet van die berg, sowat 160 meter bo die seevlak.

Die stigting van die klooster in 963 n.C. deur Athanasius van Athos was die begin van ’n georganiseerde monnikelewe op Berg Athos. Dit is gebou op een van die antieke stede van die skiereiland, miskien Akrothoön. Die geskiedenis van die klooster is die volledigste van die 20 kloosters op Athos omdat die historiese argiewe feitlik ongeskonde behoue gebly het. Dit is moontlik dat die bestudering van dié argiewe lig kan werp op die geskiedenis van die ander kloosters, waarvan die argiewe gedeeltelik of heeltemal verlore gegaan het.

Stigting[wysig | wysig bron]

Athanasius het die klooster in 963 n.C. begin bou met die steun en geldelike hulp van sy vriend keiser Nikephoros II Phokas van die Bisantynse Ryk. ’n Keiserlike dekreet, wat bekragtig is deur Johannes I Tzimiskes, het gesorg vir die afronding van die geboue. Die keisers het ook baie grond aan die klooster gegee en dit het gelei tot die toeneem van monnikegetalle van 80 tot 120.

Die hoofkerk, die Katolikon, is gestig deur Athanasius, maar hy en ses werkers het gesterf toe een van die koepels tydens die konstruksie op hulle val. Die styl van die kerk is later deur ander kloosters gevolg. Die muurskilderings is in 1535 deur Theophanis geskep.

Letterkundige skatte[wysig | wysig bron]

Die klooster se biblioteek bevat 2 116 waardevolle Griekse manuskripte en kodekse. Daar is ook meer as 20 000 gedrukte boeke en sowat 100 manuskripte in ander tale. Dit is een van die waardevolste versamelings van Griekse manuskripte in die wêreld.

Verwysings[wysig | wysig bron]

  • Papyrus Larousse Britannica 2006

Eksterne skakels[wysig | wysig bron]