Gys de Villiers

in Wikipedia, die vrye ensiklopedie
Jump to navigation Jump to search
Gys de Villiers
Geboortenaam Dirk Gysbert de Villiers
Geboorte 4 November 1960
Roodepoort
Nasionaliteit Suid-Afrika
Beroep(e) Akteur, beeldhouer
Internet-rolprentdatabasis-profiel

Gys de Villiers (*4 November 1960, Roodepoort-) is 'n Suid-Afrikaanse akteur en beeldhouer. Hy is veral bekend vir sy rol as Zieg Combrink in M-Net se sepie Binnelanders vanaf 2005 tot 2006.

Lewe en werk[wysig | wysig bron]

Gysbert Dirk de Villiers is op 4 November 1960 in Roodepoort gebore as die jongste van vyf kinders van Dirk de Villiers, die bekende filmregisseur,[1] en die aktrise Addy de Villiers. Sy oudste broer Valken is in ’n vliegtuigongeluk oorlede. Hy matrikuleer aan Hoërskool Linden in Johannesburg, waar hy lid is van twee musiekgroepe, Die drie slaptjips en Bronco. Sy verpligte militêre diensplig ondergaan hy vanaf 1978 eers in Kimberley en daarna in 1979 in Windhoek, waar hy vir die eerste keer met die teater kennis maak wanneer hy ’n klein rol in Die drie Van der Walts vertolk. Hierna studeer hy in 1980 vir ’n jaar drama aan die Universiteit van Kaapstad, waarna hy sy studies opskop en eers vryskut akteur en dan in 1983 en 1984 voltydse akteur is by die Transvaalse Raad vir Uitvoerende Kunste (TRUK). Hy speel in hierdie tyd in verhoogdramas soos Die spinner, Diepe grond en Sing jy van bomme. Hoewel hy veral naam maak as akteur, is hy ook musikant, beeldhouer en skrywer. In die jare tagtig is hy lid van die progressiewe rockgroep Koos, vir wie hy baskitaar speel, en hy het al ’n uitstalling van sy beeldhouwerk gehou.

Nadat hy vir tien jaar meesal op die verhoog optree, speel hy vanaf 1993 in verskeie televisiedramas, hoewel die verhoog sy eerste liefde bly. Hy speel onder andere in die televisiereekse Triptiek, Arende, Die vierde kabinet, Donkerland, Malan en Kie en vir ’n rukkie in die sepies Sewende Laan en Binnelanders. Van sy filmrolle sluit in City of blood, The stick, On the wire, Dangerous ground, Tarzan and the lost city, Desert diners, Inside out, Kaalgat tussen die daisies, Boetie gaan border toe, Paljas, Zoop in Afrika, Durban poison, Bidsprinkaan, F.W. de Klerk in Long walk to freedom, Jimmy in pienk en Verraaiers, laasgenoemde sy eerste hoofrol in ’n rolprent. Hy tree verder as akteur op in verskeie ander opvoerings, soos Die sakeman van Venesië (waarvoor hy die Johannesburg Stadskouburg-toekenning kry as beste akteur in ’n ondersteunende rol), Psychedelic Cowboy and Sister Nun, Imbumba / Samesyn, Siener in die suburbs, Wood for the trees en Uit die bloute.[1]

Hy is een van die glanspersoonlikhede wat in 2009 aan die realiteitsprogram op televisie, Survivor S.A.: Santa Carolina, deelneem. Op 1 Julie 2006 trou hy met Jaci Smith.[2] Hulle bly eers in Linden en daarna Westdene in Johannesburg, waarna hulle na Knysna verhuis. Na sewe jaar verhuis hulle terug na Johannesburg.[3] Vir sy vyftigste verjaarsdag hou hulle vakansie in Amerika, waarna hulle besluit om aansoek te doen vir verblyfregte en werkspermitte om in New York te werk.[4] Op 29 Maart 2015 vlieg hulle na New York, nadat hulle groen kaarte bekom het, waar hy stukwerk doen deur in kortfilms op te tree.[5][6]

Sy drama Elsie se nommers voer hy in Engels op as Fafi by die New York Fringe Festival en kry ’n goeie resensie daarvoor in die New York Theatre Guide.[7][5]

Skryfwerk[wysig | wysig bron]

Hy skryf die kabarette Suig en Die Afrikaner, wat veral op kunstefeeste opgevoer word. Suig wen in 2003 die Anglogold Smeltkroesprys vir Beste Nuwe Afrikaanse verhoogteks en die Beeld Plus Aartvarkprys vir innoverende werk op die Aardklopfees en word ook genomineer vir twee Naledi-pryse in 2005. Die aksie hierin speel deels af in ’n simboliese tronk, waar die uitgesuigdes aangehou word. Die vrou wat hulle gedreineer het, is die muse wat elkeen uitdaag om weer die bronne van kreatiwiteit binne hulle te ontdek.[8]

In Die Afrikaner neem hy in ’n musiekteaterstuk die gehoor deur meer as 350 jaar van die Afrikaner se geskiedenis. Hy maak gebruik van verskillende grepe en gebeurtenisse uit die geskiedenis wat hy dan telkens vanuit ’n ander perspektief uitbeeld, om te probeer uitpluis wie en wat die Afrikaner werklik is.[9]

Elsie se nommers is gebaseer op voorvalle in sy eie verlede en debuteer in 2015 by die Innibosfees. Die hoofkarakter, Elsie, is ’n swart huishulp wat help met die kinders grootmaak, maar vakansies nie in dieselfde see as die wit kinders mag swem nie. Die “nommers” van die titel verwys na die onwettige dobbelspel Fafi wat in die townships gespeel is.

In 2013 vertaal hy Greig Coetzee se drama oor militêre diensplig, White men with weapons, en voer dit as Wit manne se wapens by kunstefeeste en elders op.[10]

Eerbewyse[wysig | wysig bron]

In 1985 wen hy twee Beste Akteur-toekennings, van AA Vita en Dalro, vir sy rol in Die spinner.

Vir die dansproduksie The double room is hy in 2001 bekroon as beste eietydse manlike danser, ten spyte van die feit dat hy geen formele dansopleiding ontvang het nie.

Hy word ook in 2007 genomineer vir ’n Fleur du Cap-prys vir Beste Vertoning in ’n Kabaret vir sy rol in Imbumba/Samesyn.

Filmografie[11][wysig | wysig bron]

  • Verraaiers, 2013 as Kommandant van Aswegen
  • Mandela: Long Walk to Freedom, 2013 as FW de Klerk
  • Jimmy in pienk, 2013 as Buks/Frederique
  • Vehicle 19, 2012
  • Eternity, 2010 as Constantine
  • Die Ongelooflike Avonture van Hanna Hoekom, 2010 as Beyers
  • Malan en Kie (TV-reeks), 2008 as Malan
  • Binnelanders (TV-reeks), 2005 as Zieg Combrink
  • Zoop in Afrika, 2005 as Cornelis de Groot
  • 7de Laan (TV-reeks), 2000–2001 as Dr SP de Wet Malan
  • Inside Out, 2000 as Professor
  • Desert Diners (TV-fliek), 2000 as Bennie
  • Tarzan and the Lost City, 1998 as Schiller
  • Paljas, 1998 as Sirkusbaas
  • Dangerous Ground, 1997
  • Kaalgat tussen die Daisies, 1997 as polisieman
  • Kalahari Harry, 1994 as vlieënier
  • Arende III (TV-reeks), 1993 as ambagsman
  • Triptiek (TV-reeks), 1993
  • On the Wire, 1990 as Piet
  • Jobman, 1989 as polisieman
  • The Stick, 1988 as Visser
  • Boetie Gaan Border Toe!, 1984 as Korporaal Smit
  • City of Blood, 1983 as Stoltz

Verwysings[wysig | wysig bron]

Tydskrifte en koerante[wysig | wysig bron]

  • Burger, Kobus “Hy suig die lewe droog” “Plus” 27 April 2004
  • Burger, Kobus “Gys delf diep in land se psige” “Plus” 8 September 2006
  • Coetzee, Terésa “Gys gooi anker” “Rapport” 25 September 2005
  • De Lange, Amanda “Akteur wees leer Gys om te kan oorleef” “Beeld” 26 Maart 2010
  • Eckard, Lourensa “Gys kry genesing ná diensplig-sterfte” “Beeld” 15 Julie 2013
  • Engelbrecht, Theunis “Revolusionêr” “By” 9 Mei 2009
  • La Vita, Murray “Gys wil groot rolle pak” “Beeld” 13 April 2013
  • Retief, Hanlie “Die soete suig aan sukses” “Rapport” 5 Oktober 2003
  • Schoombie, Schalk “Gys se nuwe lewe” “Beeld” 30 Augustus 2003
  • Schoombie, Schalk “Die nuwe avonture van Gys” “Rapport My Tyd” 14 Julie 2013
  • Sieberhagen, Charlea “Gys vertel van VSA-avontuur” “Beeld” 2 Julie 2015
  • Stehle, Rudolf “De Villiers tas na katarsis in solostuk” “Beeld” 11 Junie 2013

Ander verwysings[wysig | wysig bron]

  1. 1,0 1,1 Esat: http://esat.sun.ac.za/index.php/Gys_de_Villiers
  2. Roos, Martjie “’Dr. Zieg’ vat regtig vrou” “Rapport” 18 Junie 2006
  3. Sarie: http://www.sarie.com/bekendes/ons-praat-met-bekendes/die-vrou-aan-gys-se-sy/
  4. Van der Merwe, Gys “In New York wil ek werk” “By” 15 Junie 2013
  5. 5,0 5,1 Fourie, Paula LitNet: http://www.litnet.co.za/gys-de-villiers-n-afrikaner-alien-of-extraordinary-ability/
  6. Eckard, Lourensa “Gys verhuis na New York” “Beeld” 7 Junie 2013
  7. Pople, Laetitia “Lof vir Gys de Villiers in NY” “Beeld” 25 Augustus 2015
  8. Hough, Barrie “Rapport” 28 September 2003
  9. Floris, Jo-Ann “Beeld” 29 September 2006
  10. Bouwer, Anna-Retha “Beeld” 28 Junie 2013
  11. Imdb: http://www.imdb.com/name/nm0212170/