Hugenote-kollege

Hugenote-kollege
Die Hugenote-Kollege. Dis ontwerp deur die vennootskap John Parker en Alexander Forsyth.
Gestig:	1951
Ligging:	Wellington, Suid-Afrika 33°38′17″S 19°0′39″O
Webtuiste:	hugenote.com

Die Hugenote-kollege (1896–1950) op Wellington in die Wes-Kaap was die opvolger van die Hugenote-seminarie wat in 1874 gestig is deur die Amerikanse opvoedkundiges mes. Anna Bliss en Abbie Park Ferguson, die eerste inrigting in Suid-Afrika waar vroue opleiding in hoër onderwys kon ontvang. Dit het groot aanmoediging van die NG Kerk en ds. Andrew Murray geniet en is besoek deur dogters van gesiene families uit die hele Kaapkolonie en elders in Suider-Afrika. Dit het later graadprogramme aangebied onder die beskerming van die Universiteit van Suid-Afrika, maar het vanaf 2010 ingeskakel onder die akademiese beskerming van die Universiteit van Stellenbosch.

Dit bied tans grade aan in maatskaplike werk, jeugwerk en gemeenskapsontwikkeling. Die kampus met sy geskiedkundige geboue is ook die tuiste van kerklike uitgewers soos Bybel Media en die Tydskrifte-Maatskappy.

Agtergrond

Ou foto van die Hugenote-Kollege uit die Wellington Museum se argief

Ds. Andrew Murray, die stigter van die Hugenote-seminarie, by die graduandi van 1912 en die twee prinsipale, drr. Ferguson en Bliss.

Die laaste personeel van die Hugenote-universiteitskollege, 1950. Dr. Anna de Villiers, die prinsipale, sit voor in die middel.

Die Hugenote-universiteitskollege het ontstaan uit die Hugenote-seminarie, ’n meisieskool wat ds. Andrew Murray in 1874 gestig het geskoei op Mount Holyoke in Massachusetts in die VSA, ’n instelling met ’n bepaald godsdienstige karakter. Twee onderwyseres, mejj. Anna Bliss en Abbie Park Ferguson, het van Mount Holyoke af gekom om die skool te help begin. Die instelling het goed gevorder en kort voor lank was daar ’n vraag na meer gevorderde onderrig vir vroue. Dit het in 1896 gelei tot die registrasie van twee vroue vir ’n B.A.-graad aan die Universiteit van die Kaap die Goeie Hoop. Hulle het hul graad in 1898 voltooi. Daarna is die Hugenote-seminarie as ’n kollege erken met dr. A.P. Ferguson as prinsipale.

In 1907 is die kollege geïnkorporeer as ’n universitêre instelling ingevolge parlementêre wet en in 1918 het dit ’n samestellende kollege van die Universiteit van Suid-Afrika geword met die naam Hugenote-universiteitskollege. Destyds het dit naskoolse opleiding aan vroue gebied, maar ook ’n beperkte aantal mans aanvaar. Ten spyte van die inkorporasie, is die Hugenote-tradisies gehandhaaf, veral die godsdienstiges. Kursusse is aangebied vir die baccalaureus-, honneurs- en magistergrade in die lettere en wetenskap (insluitend huishoudkunde), verskeie onderwyssertifikate, inbegrepe die B.Ed.-graad.

In 1950 is die Hugenote-universiteitskollege gesluit op aanbeveling van ’n staatskommissie wat beslis het sy ontwikkeling het nie die vlak bereik waarop universiteitstatus aan hom toegeken kon word nie, soos gebeur het met ander universiteitskolleges soos Potchefstroom, die Vrystaat en Rhodes. Maar die Hugenote-kollege onder beskerming van die NG Kerk het voortbestaan. Vroeg in die 1970's het die kollege 'n akademiese venootskap met Unisa gesluit, maar dis einde 2012 beëindig.

Noemenswaardige alumni

• Mabel Jansen
• Wouter de Vos Malan
• Elsie Chubb
• A.V. Duthie
• A.I. Malan
• Karl Bremer
• Charlie Hofmeyr
• Ds. M.L. de Villiers
• D.I.C. de Villiers
• Alba Bouwer
• Elizabeth Conradie

Bronne

• (af) Oberholster, mev. J.A.S. 1940. Gedenkboek van die Nederduitse Gereformeerde Gereformeerde te Wellington. Wellington, Wes-Kaap

Eksterne skakels

• Die Wellington Hugenote Kollege
• Hugenote-Kollege voor groot uitdagings^{[dooie skakel]} 16 Mei 2012, Kerkbode
• Die Kollege slaan 'n nuwe rigting in, Augustus 2012 Geargiveer 28 Oktober 2016 op Wayback Machine