Igor Girkin
Igor Vsevolodovich Girkin (Russies: Игорь Всеволодович Гиркин) (gebore 17 Desember 1970 in Moskou) is 'n Russiese militaris en politikus. Hy is ook bekend onder die skuilnaam Igor Strelkov (Russies: Игорь Стрелков).
Igor Girkin was ’n kolonel van die Russiese militêre intelligensiediens (GRU) en was een van die militêre leiers van die separatistiese Volksrepubliek Donetsk in die 2014-oorlog in die ooste van die Oekraïne.
Girkin is deur 'n Nederlandse regsbank in Den Haag tot lewenslange tronkstraf gevonnis en ’n internasionale arrestasiebevel is uitgereik vir sy betrokkenheid by die afskiet van Malaysia Airlines-vlug 17.
Biografie[wysig | wysig bron]
In 1992 het Girkin as vrywilliger na die oorlog in Transnistrië gegaan. Hy het toe in die oorloë in Bosnië en Tsjetsjnië geveg. Volgens die Russiese menseregte-organisasie Memorial was hy moontlik betrokke by die verdwyning van vier Tsjetsjniese burgers in 2001.[1] Hy was ook betrokke by die besetting van die Oekraïense skiereiland Krim in Maart 2014.[2]
Ná die opstand teen die Oekraïense president Wiktor Janoekowitsj, het Girkin op 12 April 2014 die stad Slowiansk met 54 gewapende mans beset, wat die oorlog in die Donbass laat ontstaan het. Tydens die besetting van Slowiansk het hy beveel dat twee Oekraïense burgers, insluitend die 19-jarige student Yuri Popravka, geskiet word. Girkin het eiehandig 'n verlate separatis tereggestel wat 'n kollega vermoor het.[1]
Ná drie maande moes Girkin en sy troepe Slowiansk prysgee onder druk van die Oekraïense weermag. Die pro-Russiese separatiste is toenemend onder druk geplaas omdat die Oekraïners vegvliegtuie tot hul beskikking gehad het. Girkin het dus die Kremlin versoek om lugafweertoerusting te verskaf.[2]
Hy was Minister van Verdediging van die selfverklaarde Volksrepubliek Donetsk van 16 Mei 2014 tot 14 Augustus 2014. Op 17 Julie 2014 is vlug MH17 afgeskiet. Girkin het met opgewondenheid gereageer na die val van die vliegtuig en glo dit is 'n Oekraïense militêre vliegtuig. “Ons het sopas 'n Antonov-26 by Torez afgeskiet. Ons het hulle gewaarsku: moenie in ons lugruim vlieg nie!’, het hy getwiet. Toe dit duidelik word dat dit 'n burgerlike vliegtuig was, het hy enige betrokkenheid van die separatiste by die ramp ontken. Die vernietiging van MH17 was die einde van Girkin se rol as Minister van Verdediging.[2]
Op 17 November 2022 is Girkin en twee ander in absentia deur die hof in Den Haag tot lewenslange tronkstraf gevonnis vir die afskiet van vlug MH17 met 'n Buk-missiel. Girkin ontken betrokkenheid en verantwoordelikheid hiervoor. Die Oekraïense Ministerie van Verdediging het 'n beloning van $100 000 op Girkin se uitlesering geplaas.[3]
In 2022 was Girkin na bewering aan die hoof van 'n vrywillige bataljon betrokke by die oorlog in die Oekraïne en ondersteun deur die Wagner-groep se stigter Jewgeni Prigozjin.[1] In Desember 2022 is aangekondig dat Girkin terug is in Moskou nadat hy van die Oekraïense front weggestuur is. Moskou wil nie hê dat Girkin aan die front moet keer dat hy in die hande van die Oekraïners val en aan Nederland uitgelewer word nie.
Girkin is sedert Julie 2023 in aanhouding. Hy het president Wladimir Poetin gekritiseer oor die optrede van die Russiese inval in die Oekraïne. Hy het ook minister van verdediging Sergei Sjoigoe gekritiseer en gesê dat die “spesiale militêre operasie” in die Oekraïne nie behoorlik bestuur word nie. In 2024 is tronkstraf van vier jaar en elf maande teen hom geëis. Hy is beskuldig van "aanhitsing tot ekstremisme".[4] Die hof het hom aan die einde van Januarie 2024 tot 4 jaar tronkstraf gevonnis.[5]
Trivia[wysig | wysig bron]
As 'n historikus het Girkin die Wit Leër bestudeer wat teen die Bolsjewiste beveg het. Sy stokperdjie is om historiese gevegte weer op te stel.
Verwysings[wysig | wysig bron]
- ↑ 1,0 1,1 1,2 Het conflict dat hij ontketende, ontaardde in de Oekraïne-oorlog. Weer vecht MH17-verdachte Igor Girkin mee, NRC, 16 November 2022. Geargiveer op 21 Maart 2023.
- ↑ 2,0 2,1 2,2 Wordt dit de man die de aanslag op MH17 op z’n geweten heeft?, de Volkskrant, 17 November 2022. Geargiveer op 22 November 2022.
- ↑ Drie keer levenslang en een vrijspraak voor verdachten neerschieten vlucht MH17, Het Nieuwsblad, 17 November 2022. Gearchiveerd op 21 November 2022.
- ↑ Bijna 5 jaar cel geëist tegen Poetin-criticus die is veroordeeld voor MH17-ramp Nos.nl, 18 Januarie 2024
- ↑ MH17-veroordeelde Girkin krijgt in Rusland vier jaar cel voor extremisme Nos.nl, 25 Januarie 2024
