Juana María de los Dolores de León Smith

Juana Smith op ouderdom 17.
Portret deur onbekende kunstenaar.
1815 in Parys.

Juana María de los Dolores de León Smith, Lady Smith (27 Maart 1798 – 12 Oktober 1872) was die vrou van Generaal Sir Harry Smith, Goewerneur van die Kaapkolonie.

Lewensskets

Sy is gebore in 'n ou Spaanse adellike familie, en was 'n afstammeling van Juan Ponce de León.

In 1812, op die ouderdom van veertien, is sy wees gelaat met slegs 'n suster, toe haar tuisdorp Badajoz vir die vierde keer tydens die Skiereilandse Oorlog beleër is. Nadat die beleg in 'n suksesvolle maar bloedige bestorming deur die Britse en Portugese magte geëindig het, het die susters beskerming teen die chaos van die beleg gesoek, en toevallig 'n paar Britse leëroffisiere ontmoet wat buite die stadsmure gekampeer het. Een van hulle was kaptein Harry Smith, van die 95ste Rifles Regiment, met wie sy 'n paar dae later getroud is.

In plaas daarvan om na haar man se familie huis toe te gaan, het sy verkies om hom saam met die weermag te vergesel. Sy het die res van die oorlog by hom gebly, die bagasietrein vergesel, in die oopte op die slagveld geslaap, vrylik tussen die troepe gery en al die ontberings van die veldtog deurstaan. Haar skoonheid, moed, gesonde oordeel en gemoedelike karakter het haar bekoorlik gemaak by die offisiere, insluitend die Hertog van Wellington, wat haar Juanita genoem het; en sy is deur die soldate verafgod.

Met die uitsondering van die Oorlog van 1812 het sy haar man in al sy ontplooiings vergesel, veral in twee poste in Suid-Afrika, waar sir Harry (hy is intussen tot ridder geslaan) as Goewerneur van Kaapkolonie en Hoë Kommissaris gedien het.

Juana Smith is op 5 Desember 1848 deur die Parlement 'n pensioen van £500 gegee ter erkenning van haar man se dienste aan die land.

Juana Smith, bekend as Lady Smith in haar latere jare, word direk herdenk in die naam van Ladysmith, KwaZulu-Natal, en Ladismith, Wes-Kaap, (beide in Suid-Afrika), sowel as indirek in die naam van Ladysmith, Brits-Columbië, Kanada.

Verdere leeswerk

• Smith, Harry. Autobiography, J. Murray, Londen, 1901.
• Kincaid, Sir John, Adventures in the rifle brigade in the Peninsula, France and the Netherlands from 1809-1815, London, 1830.
• Lehmann, Joseph H. "Remember you are an Englishman": 'n Biografie van Sir Harry Smith, 1787–1860, Jonathan Cape, Londen, 1977.
• Heyer, Georgette. The Spanish Bride, Heinemann, Londen, 1940.

Eksterne skakels

• Harry Smith, Outobiografie, van die University of Pennsylvania Digital Library Project, (die aanlyn uitgawe is direk opgedra aan Juana De Leon Smith)