Kadıköy

in Wikipedia, die vrye ensiklopedie
Die ligging van Kadıköy in Istanboel.
'n Collage van foto's uit Kadıköy.

Kadıköy (die antieke en Bisantynse Chalcedon) is ’n groot, dig bevolkte en kosmopolitiese distrik van Istanboel, Turkye, aan die Asiatiese kant van die See van Marmara.

Kadıköy is ook die naam van die mees prominente buurt van die distrik, ’n woon- en kommersiële gebied wat met sy talle kroeë, bioskope en boekwinkels die kulturele middelpunt van die Anatoliese kant is. Kadıköy het in 1928 ’n distrik geword toe dit van die Üsküdar-distrik afgestig het. Die bevolking van die distrik volgens die 2007-sensus is 509 282.

Geskiedenis[wysig | wysig bron]

Kadıköy is ’n ouer nedersetting as dié aan die Europese kant van Istanboel. Artefakte wat van 5500-3500 v.C. dateer, is by die Fikirtepe-heuwel gevind – en artikels van klip, been, keramiek en brons wys dat mense sedert die prehistoriese tye aaneenlopend hier gebly het. ’n Hawe-nedersetting uit die tyd van die Fenesiërs is ook ontdek.

Chalcedon was die eerste nedersetting van die Grieke aan die Bosporus, in 685 v.C., ’n paar jaar voordat hulle Bisantium in 667 v.C. aan die ander kant van die seestraat gestig het. Chalcedon het verskeie kere van hande verwissel terwyl Perse, Bisantyne, antieke Romeine, Arabiere, Kruisvaarders en die Ottomaanse Turke deur die gebied getrek het.

Dit is tydens die Vierde Kruistog erg beskadig en het in 1353 in die hande van die Ottomaanse Ryk geval, ’n hele eeu voor Konstantinopel (Istanboel). Kadıköy het dus die oudste moskee in Istanboel wat gebou is ’n eeu voor die verowering van Konstantinopel in 1453.

Toe dit verower is, was Chalcedon ’n plattelandse nedersetting buite die stad se beskerming. Dit is gou onder die jurisdiksie van die Istanboelse howe geplaas, vandaar die naam Kadıköy, wat beteken "Dorp van die regter". In die Ottomaanse tydperk het Kadıköy ’n gewilde mark vir landbougoedere geword en het mettertyd ontwikkel in ’n woongebied vir mense wat per boot na die stad gependel het. Die bevolking was die tipiese Ottomaanse mengsel van Armeniërs, Grieke, Jode en Turke.

Argitektuur[wysig | wysig bron]

Kadıköy het baie interessante huise uit die Ottomaanse tydperk wat in systraatjies versteek is. Baie van hulle is omskep in kafees, kroeë en restaurante, veral seekoseetplekke.

Inkopies[wysig | wysig bron]

Kadıköy is ’n besige inkopiedistrik met ’n groot verskeidenheid van atmosfere en argitektuurstyle. Sommige strate is smal en ander soos Bahariye Caddesi is breë voetgangersones. Turkye se grootste kosmark is daar, asook moderne winkelsentrums en straatverkopers. In die strate agter die hoofposkantoor is daar talle bekende boekwinkels wat nuwe en tweedehandse boeke verkoop, daar is ook kunsvlytwinkels, prenteramers en musiekwinkels. Omdat dit so ’n besige inkopiedistrik is, is daar volop smouse, skoenpoetsers, gomsnuiwers en skoolkinders wat blomme, kougom, sneesdoekies en nog wat verkoop.

Die hoofpad by die veerboot-terminaal is besig en lawaaierig, en daar is talle bedelaars en mense wat buitelandse geld op die swartmark of roofkopieë van sagteware en ander multimedia-produkte verkoop.

Vermaak[wysig | wysig bron]

Kadıköy het baie strate vol kafees, restaurante, kroeë en bioskope. Die markgebied is vir verkeer gesluit en het talle kitskos-eetplekke. Baie studente koop hier groot toebroodjies bekend as "maniac" en "psychopath". Agter die sentrum lê ’n groot winkel- en woongebied wat opdraand loop na die Bahariye Caddesi-voetgangersone. Kadıköy se vermaak is nie vir die hoër klasse nie, dis eerder ’n werkersklas-omgewing. Dit het nie so ’n goeie naglewe soos Beyoğlu of sulke hoëgehalte-produkte soos die gebied om die Bosporus nie.

Woongebiede[wysig | wysig bron]

Langs die kus, weg van die sentrum, is daar duurder winkels en hoërklas-buurte soos Moda en Fenerbahçe. Moda is ’n ou, stil en kosmopolitiese buurt. Baie historiese huise is gesloop en vervang deur woonstelblokke. Dit word egter beskou as een van die meer aangename woondistrikte van die stad. Daar is talle kerke en bekende skole. Nog ’n mooi nuwe buurt is Acıbadem met sy goeie private hospitaal en lang strate vol goeie kafees, restaurante en roomysplekke.

Die lang inkopiestraat Bağdat Caddesi loop oos en daar is baie goeie woonbuurte tussen die pad en die kus. Tot die 1950's was hierdie gebiede vol somerhuise van die rykes. Sedert die Bosporus-brug gebou is en toegang makliker is, is die meeste van die huise gesloop en deur woonstelblokke vervang. Daar is baie seekus-parke en seiljagmarinas.

Eksterne skakels[wysig | wysig bron]

Koördinate: 40°59′24″N 29°01′30″O / 40.990°N 29.025°O / 40.990; 29.025

Hierdie artikel is merendeels vertaal vanaf die Engelse Wikipedia-artikel en:Kadıköy