Kazbek

in Wikipedia, die vrye ensiklopedie
Jump to navigation Jump to search
Kazbek
  • Mqinvartsveri
  • Basjlam
Die berg Kazbek. Die berg Kazbek.
Ligging Rusland, Georgië
Hoogte 5 034[1] meter bo seevlak
Prominensie 2 353
Reeks Kaukasus
Koördinate 42°41′57″N 44°31′06″O / 42.69917°N 44.51833°O / 42.69917; 44.51833Koördinate: 42°41′57″N 44°31′06″O / 42.69917°N 44.51833°O / 42.69917; 44.51833[1]
Bergtipe Rustende stratovulkaan
Laaste uitbarsting ~750 v.C.
Ligging van Kazbek op 'n kaart (Georgië)
Kazbek
Kazbek
Die ligging van Kazbek op die grens van Rusland en Georgië.

Die berg Kazbek of Kazbegi is 'n rustende stratovulkaan en een van die hoogste berge van die Kaukasusgebergte. Dit lê op die grens tussen Rusland en Georgië – in Rusland se streek Noord-Ossetië en Georgië se Kazbegi-distrik.[2]

Die Kazbek is een van die 10 hoogste pieke in Rusland, die derde hoogste piek in Georgië en die sewende hoogste kruin in die Kaukasusberge. Dit is die tweede hoogste vulkaniese kruin in die Kaukasus, naas die berg Elbroes.

Die Kazbek is Russies en was die naam van 'n plaaslike Ossetiese prins. Die berg se naam in Georgies is მყინვარწვერი, Mqinvartsveri, "Gletserspits" of "Ysspits".[3] ('n Ander Georgiese naam is ყაზბეგი, Kazbegi.) Die Wainachse naam, Bashlam, beteken "Gesmelte Berg".

Ligging[wysig | wysig bron]

'n 19de-eeuse poskaart van die Georgiese Militêre Pad naby Kazbek.

Aan die oostelike voetheuwels van die Kazbek loop die Georgiese Militêre Pad deur die Darialpas van 2 378 m.[4] Die streek is tektonies baie aktief, met verskeie klein aardbewings wat gereeld voorkom. 'n Aktiewe warmwaterbron kom ook voor. Kazbek is 'n potensieel aktiewe vulkaan met die vorm van 'n dubbele keël, waarvan die basis op 'n hoogte van 1 770 m lê.[4]

Vanweë sy steil hange is die Kazbek se gletsers nie baie groot nie.[4] Die totale gekombineerde oppervlakte van die gletsers is 135 km2. 'n Groot instorting van 'n gletser aan die berg se noordoostelike hang op 20 Augustus 2014 het tot sewe mense se dood gelei. Die gletser se instorting het die Terekrivier laat opdam en dit het die Georgiese Militêre Pad laat oorstroom.

Van 24 tot 28 Mei 2019 het die Kaukasiese Skitoernetwerk 'n ekspedisie georganiseer om die Kazbek se hoogte te herbepaal. Op 27 Mei 2019 is 'n GPS-ontvanger vir die eerste keer op die Kazbek se spits geplaas. Die nuwe hoogte is met 'n akkuraatheid van 5 mm bepaal op 5 053,927 m.

Legende[wysig | wysig bron]

Die berg Kazbek (Kazbegi) word in Georgiese folklore verbind met Amirani, die Georgiese weergawe van die Griekse Prometeus, wat aan 'n berg vasgeketting is as straf omdat hy vuur van die gode gesteel en dit vir mense gegee het. Die ligging van dié toneel het later die terrein geword van 'n Ortodokse kluisenaarshut in 'n grot met die naam "Betlemi" (Betlehem) op 'n hoogte van sowat 4 000 m. Volgens legendes het dié grot baie heilige relieke gehuisves, soos Abraham se tent en die kind Jesus se krip.[5]

Verwysings[wysig | wysig bron]

  1. 1,0 1,1 "European Russia and the Caucasian States: Ultra-Prominence Page". Peaklist.org. Besoek op 2014-05-25.
  2. "Kazbek". Global Volcanism Program. Smithsonian Institution. Besoek op 2021-06-24.
  3. "მყინვარი", Donald Rayfield et al., A Comprehensive Georgian-English Dictionary (2006)
  4. 4,0 4,1 4,2 Chisholm, Hugh, red. (1911). "Kasbek". Encyclopædia Britannica. 15 (11de uitg.). Cambridge University Press.
  5. Georgia: A Sovereign Country of the Caucasus. Odyssey Publications: Hong Kong. 1999. ISBN 962-217-748-4.

Eksterne skakels[wysig | wysig bron]