Leonore Annenberg

in Wikipedia, die vrye ensiklopedie
Jump to navigation Jump to search
Leonore Annenberg
Leonore Annenberg
Leonore Annenberg in 2003

Hoof van Protokol van die Verenigde State
Ampstermyn
20 Maart 1981 – 6 Januarie 1982
Voorafgegaan deur Abelardo L. Valdez
Opgevolg deur Selwa Roosevelt

Persoonlike besonderhede
Gebore 20 Februarie 1918
New York Stad, New York, VSA
Sterf 12 Maart 2009
Rancho Mirage, Kalifornië, VSA
Eggenoot/eggenote Beldon Ketleman (geskei, een kind)
Lewis Rosensteil (geskei, een kind)
Walter Annenberg (1951-2002)
Alma mater Stanford-universiteit
Religie Christian Science

Leonore Cohn Annenberg (* 20 Februarie 1918, † 12 Maart 2009), ook bekend as Lee Annenberg, was 'n Amerikaanse sakevrou, staatsamptenaar en filantroop wat tussen 1981 en 1982 as Hoof van Protokol van die Verenigde State gedien het.

Sy was getrou met die mediamagnaat en filantroop Walter Annenberg wat in 1969 deur president Richard Nixon as Amerikaanse ambassadeur in die Verenigde Koninkryk benoem is en dié pos vyf jaar lank beklee het. Leonore Annenberg het daarnaas vanaf 2002 tot haar afsterwe in 2009 as die Annenbergstigting se voorsitter van die raad en president gedien.

Leonore Annenberg, 'n boorling van New York wat in Los Angeles grootgemaak is, het haar akademiese opleiding by die Stanford-universiteit ontvang. Nadat haar eerste twee huwelike verbrokkel het, het sy in 1951 met die bekende sakeman Walter Annenberg getrou. Gedurende sy ampstermyn as ambassadeur in Londen was sy verantwoordelik vir die omvattende opknappingswerk in sy ampswoning.

Die Annenbergs het met hul skenkings finansieel bygedra tot Ronald Reagan se presidensiële verkiesingsveldtog in 1980. Leonore is ná Reagan se inswering as Hoof van Protokol benoem en het sodoende as die president, vise-president en buitelandse minister se raadgewer oor diplomatieke protokolsake gedien.

Die Annenbergs het met hul ruim filantropiese skenkings grootliks bygedra tot die befondsing van opvoedkundige instellings en kunsgalerye en was ook betrokke by liefdadigheidsaktiwiteite. Leonore het daarnaas funksies in 'n verskeidenheid komitees en rade waargeneem. Sy het ook ná die afsterwe van haar eggenoot in 2002 voortgegaan om skenkings te maak en hom opgevolg as die Annenbergstigting se voorsitter van die raad en president.