Louis L'Amour

in Wikipedia, die vrye ensiklopedie
Louis L'Amour
Gebore
Louis Dearborn LaMoore

22 Maart 1908
Jamestown, Noord-Dakota
Sterf10 Junie 1988 (op 80)
NasionaliteitVlag van Verenigde State van Amerika Verenigde State
BeroepRomanskrywer, kortverhaalskrywer
Ouer(s)Louis Charles L'amour en Emily Dearborn L'amour
Louis L’Amour & Ronald Reagan, 1983

Louis L'Amour (22 Maart 190810 Junie 1988) was 'n Amerikaanse skrywer wat hoofsaaklik fiksie oor die Wilde Weste geskryf het.

Hy is op 22 Maart 1908 in Jamestown, Noord-Dakota gebore met die naam Louis Dearborn LaMoore, die seun van dr. L.C. LaMoore, 'n veearts. Hy is van Franse en Ierse afkoms, die nasaat van François Renê, 'n Franse skrywer en staatsman. Indiane van die Sioux-stam het sy oupa gevang en sy kopvel afgeslag. Hy weet dus van die plekke en gebeurtenisse waarvan hy in sy boeke skryf, want sy familie was pioniers van die Weste. Baie van sy famililede (meer as 33 sedert 1816) was ook skrywers.

Hy was vyftien jaar oud toe hy uit die huis is en as swerfwerker begin werk het, onder andere as dokwerker, houtkapper, olifantoppasser, hooibaler, slagter, mynwerker en vrugteplukker. Hy het per trein deur Amerika gereis, feitlik as 'n boemelaar en het vir 'n ruk lank op die strand gewoon. As 'n handelsmatroos het hy op verskeie skepe gewerk en het so om die wêreld gereis. Gedurende die Tweede Wêreldoorlog was hy 'n vlootoffisier. Baie van die idees vir stories en karakters van die boeke wat hy later geskryf het, kom van waarnemings wat hy gedurende hierdie swerfjare gemaak het.

Van kindsbeen af het hy graag gelees en het 'n persoonlike biblioteek van 2000 boeke opgebou.

Hy het op aandrang van sy vriende, wat van sy storievertellery oor die Wilde Weste gehou het, begin skryf. Hy het ook argeologie bestudeer en lesings aangebied. Afgesien van die meer as 100 boeke en 400 kortverhale wat hy geskryf het, het hy biografieë geskryf oor meer as 1000 skietvegters. Daar is films gemaak van meer as 30 van sy boeke. Meer as 225 miljoen van sy boeke is verkoop en talle is in verskeie tale vertaal.

As professionele kaalvuisbokser het hy 51 van sy 59 gevegte gewen. Die grafiese beskrywing van die vuisgevegte in baie van sy boeke spruit dus uit eerstehandse ervaring.

In 1982 is die Goue Medalje van die Amerikaanse Kongres aan hom toegeken, en in 1984 die Vryheidsmedalje. Het het ook Noord-Dakota se Roughrider-toekenning ontvang.

Louis L'Amour is op 10 Junie 1988 oorlede en is in die Forest Lawn Memorial Park Cemetery in Glendale, Kalifornië begrawe. In sy outobiografie, met die titel Education of a Wandering Man, wat in 1989 na sy dood verskyn het, vertel hy meer oor die jare toe hy 'n swerfwerker was.

Eksterne skakels[wysig | wysig bron]