Makkabiese Spele

in Wikipedia, die vrye ensiklopedie
Kenteken van die Makkabiese Spele
Lande wat al aan Makkabiese Spele deelgeneem het:

   Lande wat aan die mees onlangse Makkabiese Spele deelgeneem het

   Vorige deelnemers

Die Makkabiese Spele is op twee na die grootste internasionale sportfees in die wêreld.

Doel[wysig | wysig bron]

Hierdie spele vind altyd in Israel plaas in die jaar na die Olimpiese Somerspele, dus ook elke vierde jaar. Deelname is beperk tot lede van die wêreldwye Joodse gemeenskap en alle inwoners van Israel. Die doel daarmee is om die Jode se bande met die land Israel te versterk.

Sportsoorte[wysig | wysig bron]

Alle sportsoorte waarin meegeding word by die Olimpiese Spele vind ook hier plaas. Maar die groot verskil is dat hierdie spele ook oopstaan vir mededinging in allerlei kleiner, onbekender en moderne sportsoorte soos oriëntasieloop, Lacrosse, futsal, 3x3-basketbal, skaak, judo, karate, skerm, tafeltennis, stoei, vlugbal, dans, rugby, yshokkie, muurbal, perdesport, en selfs die kaartspel duplikaatbrug. Die opening- en afsluitingseremonies is uitstalvensters vir die Joodse kultuur in Israel. Dit word gekenmerk deur musiek, sang, dans en teatervoorstellings.

Suid-Afrika[wysig | wysig bron]

Tussen 1935 en 1973 het Suid-Afrika 114 goue medaljes verower. In 1961 het die gimnas Edna Fisher drie goue medaljes ingepalm en by die volgende fees in 1965 wen die atleet Lorraine Lotzoff ook drie goues. 'n Kontingent van 295 lede het die land by die 20ste Makkabiese Spele verteenwoordig deur aan 18 sportsoorte deel te neem. Hierdie sportsoorte was tennis, muurbal, rugby, rolbal, netbal, futsal, sokker, fietsry, driekamp, swem, damesvoetbal, waterpolo, gholf, atletiek, tafeltennis en maraton. Die span wen 19 goue, 11 silwer en 6 brons medaljes. Die 21ste Makkabiese Spele vind waarskynlik van 12 tot 26 Julie 2022 plaas, nadat dit weens die wêreldwye Covid-19-pandemie uitgestel moes word.[1][2]

Geskiedenis[wysig | wysig bron]

Die eerste spele was in 1932 en het aanvanklik eenmaal in die drie jaar plaasgevind. Vanaf 1957 vind dit elke vierde jaar plaas en Suid-Afrika neem sedert 1935 gereeld deel.

Etimologie[wysig | wysig bron]

Die naam van die sportfees herdenk die Joodse held Judas Maccabeus wat in 168 v.C. 'n Siriese invalsmag verslaan het. Sy boodskap dat fiksheid en karaktervastheid belangrik is vir die voortbestaan van die Joodse volk, is die grondslag vir die sportfees.

Verwysings[wysig | wysig bron]

  1. (en) "Path to the 2022 Maccabiah Games reopens". Australian Jewish News. 27 Julie 2020. Besoek op 27 Julie 2020.
  2. (en) "2021 Maccabiah Games postponed by a year amid coronavirus pandemic". Times of Israel. 2 April 2020. Besoek op 27 Julie 2020.

Bibliografie[wysig | wysig bron]

  • maccabi.co.za
  • www.maccabi.org