Milan Murray

	Milan Murray
Geboorte	30 Oktober 1974
Nasionaliteit	Suid-Afrika
Beroep(e)	Aktrise
Webwerf	https://murrayandme.co.za/
Internet-rolprentdatabasis-profiel

Margaretha Murray (verhoognaam Milan Murray) (gebore 30 Oktober 1974, Kaapstad) is Suid-Afrikaanse aktrise. Sy het in verskeie films en verhoogproduksies rolle vertolk en was ook 'n aanbieder op Ontbytsake, 'n Saterdagontbytprogram op kykNET. Murray woon in Johannesburg saam met haar man, Schalk van der Merwe en haar twee kinders Steph en Lua.

Murray het Drama studeer aan die Tshwane-Universiteit vir Tegnologie en het ook korter kursusse in hierdie veld geloop in New York, VSA.

In 1999 het Murray haar debuut op televisie gemaak in die sepie, Isidingo: The Need. Sy het die rol van ŉ rebelse tiener vertolk genaamd Dusty da Silva van 1998 tot 2001. Hierna is sy uit die storie geskryf en het 'n terugkeer gemaak in 2003 toe haar karakter as ŉ universiteit student ŉ verskyning in die sepie kom maak. Milan het ook in twee gruwel films gespeel, Splash (die film handel oor ŉ musiekgroep met die naam Splash, waarin sy die rol van Karen vertolk) en Snake Island (sy vertolk die rol van Carrie). Murray het die hoofrol van die romantiese M-Net film, Murmer, vertolk as die karakter Sage.

In beide die twee films het sy Engelse rolle vertolk, alhoewel haar moedertaal Afrikaans is. Haar eerste Afrikaanse rol op televisie was in die dramareeks, Song vir Katryn, waarin sy die rol van ŉ verslaggewer vertolk het. Ander rolle sluit ook in Binnelanders in, waar sy die rol van Frankie van Niekerk vertolk het en die reeks, Dit Wat Stom Is, in die rol as Melanie van den Berg.

Murray het haar eie eenvrouvertoning gelewer in die produksie: ŉ Pers hoed vir Mrs. Brown. In 2005 het sy die rol vertolk van ŉ Hollywood-aktrise, Christel Humanin, in die verhoogproduksie: Kom terug, Saartjie, wat by die Klein Karoo Nasionale Kunstefees vertoon het. Die produksie was deels gebaseer op dele van die Suid-Afrikaanse aktrise, Charlize Theron, se agtergrond. In 2010 het sy in twee produksies deelgeneem: Taraboemdery en Vergenoeg, saam met Sandra Prinsloo. In 2008 het Murray die hoofrol van die kykNET aksiereeks, Transito, Patrys le Roux, vertolk, geskryf deur Deon Meyer.

Tans is Milan ŉ mede-aanbieder op die kykNET ontbytprogram, Ontbytsake, en was ook onlangs te sien in die M-Net dramareeks, The Wild, waarin sy die rol van Kate vertolk. Murray het die reeks verlaat en het teruggekeer vir ŉ paar tonele asook die finale episode in Maart 2013. In 2018 het Murray die regie van die kort film, Kromkieriefontein, behartig, asook die skryf van die draaiboek en die vervaardiging van die film. In 2016 het sy 'n gasrol in die dramareeks, Die Boekklub, gehad en later in 2016 'n prominente rol as Nicky van As, die staatsaanklaer in die dramareeks, Die Byl.

Murray het haar eerste boek geskryf, Koemelaat: 'n Sanity-joernaal van 'n Nuwe Ma – ŉ boek wat die daaglikse uitdagings van moederskap uitbeeld. In 2015 was Murray die medestigter saam met Charmaine Nolte van die uitgewery, Murray & Me, wat daarop gemik is om Afrikaans as taal te bevorder, om kinders lief te maak vir lees en om lewenslesse te kweek.

Film

Somerkersfees; vertolk die rol van Hester (2019)
Liewe Kersfeesvader; vertolk die rol van Mari (2017)
Venster; kort film; vertolk die rol van Michelle (2017)
Die Muse; kort film; vertolk die rol van Channel (2016)
Van lyn af; kort film; vertolk die rol van Ciska Slabbert (2015)
Mooirivier; vertolk die rol van Amelia Malan (2015)
Beskermhere; kort film; vertolk die rol van Frieda (2013)
Murmur; vertolk die rol van Sage (2004)
Snake Island; vertolk die rol van Carrie (2002)
Slash; vertolk die rol van Karen (2002)

Televisie

Fynskrif; vertolk die rol van Sandra (2018)
Onder die Suiderkruis; vertolk die rol van Miss Blake (2018
Waterfront; vertolk die rol van Julia Myburgh (2017)
Die Boekklub; vertolk die rol van Helen (2016)
Die Byl; vertolk die rol van Advokaat Nicky van As (2016)
Dit Wat Stom Is; vertolk die rol van Melanie van den Berg (2005)
The Wild; vertolk die rol van Kate van Reenen (2011)
Transito; vertolk die rol van Patrys le Roux (2008)
Binnelanders; vertolk die rol van Frankie van Niekerk (2005)
Song vir Katryn; Seisoen 2; vertolk die rol van Jo Retief (2005)
Isidingo: The Need; vertolk die rol van Dusty da Silva (2005)

Eksterne skakel

(af) murrayandme

Bronnelys