Charlize Theron

in Wikipedia, die vrye ensiklopedie
Spring na: navigasie, soek
Charlize Theron
Charlize Theron in 2012
Charlize Theron in 2012

Geboorte 7 Augustus 1975
Benoni, Transvaal, Suid-Afrika
Nasionaliteit Vlag van Suid-Afrika Suid-Afrika[1] (1975–hede)
Vlag van Verenigde State Verenigde State (2007–hede)
Beroep(e) aktrise, produsent, mode-model
Aktiewe jare 1995–hede
Amptelike
webwerf
www.charlizeafricaoutreach.org
Toekennings Golden Globe, Oscar
Internet-rolprentdatabasis-profiel

Charlize Theron (gebore op 7 Augustus 1975) is 'n Suid-Afrikaans-Amerikaanse aktrise, produsent en mode-model asook Golden Globe/Oscar-wenner.

Kinderjare[wysig | wysig bron]

Charlize Theron is op 7 Augustus 1975 in Benoni in die destydse provinsie Transvaal as enigste kind van Gerda Jacoba Aletta (née Maritz)[2] en Charles Jacobus Theron[3] gebore. Sy het grootgeword op 'n hoewe in Benoni naby Johannesburg[4][5], waar sy die Laerskool Putfontein van 1982 tot 1988 bygewoon het. Aan die Hoërskool Die Kruin vir Kuns, Musiek, Ballet en Drama in Parktown, Johannesburg, waar sy van 1989 tot 1993 onder meer ballet geneem het, was sy volgens haar oud-balletonderwyseres baie gewild onder die meisies. Hoewel Theron vlot Engels kan praat, is haar moedertaal Afrikaans.[6][7]

Haar ma, Gerda, het in 1991 haar pa, Charles, met sy eie wapen doodgeskiet uit selfverdediging nadat dronkenskap en huishoudelike geweld 'n breekpunt in hul huis bereik het. (Charlize was toe 15 jaar oud.) Gerda is nie aangekla weens sy dood nie.[8]

Hollywood[wysig | wysig bron]

Die ster van Charlize Theron op die Hollywood Walk of Fame

Die jong Charlize is Amerika toe om naam in Hollywood te maak en is uiteindelik deur 'n talentsoeker raakgesien. Haar eerste rol op die internasionale silwerdoek was in 1995 in Children of the Corn III.

Daarna het rolle gevolg in lokettreffers soos The Italian Job (2004) en The Life and Death of Peter Sellers (2004), Waking up in Reno, Trapped en Reindeer Games (2000), The Cider House Rules en The Astronaut's Wife (1999), Mighty Joe Young (1998) en The Devil's Advocate (1997). Haar lys van rolprente sluit verder in Two Days in the Valley en That Thing You Do (1996), Trial and Error (1997), Celebrity (1998), The Yards, Men of Honor en The Legend of Bagger Vance (2000), 15 Minutes, Sweet November en When I was a Girl (2001). Sy het ook in 1997 in die TV-treffer Hollywood Confidential opgetree.

Theron se ondervinding in dié uiteenlopende rolle het haar uiteindelik in staat gestel het om die veeleisende rol in die skrywer-regisseur Patty Jenkins se Monster los te slaan. Daar is aanvanklik verwag dat die rolprent nie groot aftrek by die algemene publiek sou kry nie, maar toe die toekennings begin inrol, is dié verwagting verkeerd bewys. Theron het ook gespeel in Head in the Clouds (2004), Aeon Flux Class Action (2005), The Ice at the Bottom of the World (2006). Sy en die akteur Stuart Townsend was tussen 2001 en 2010 'n paartjie.[9]

Belangrike prestasies[wysig | wysig bron]

Theron by die 2013 Kristal-Toekenningseremonie vir verkenning van kuns in die gemeenskap

Charlize Theron, het in 2004 op 28-jarige leeftyd die eerste Suid-Afrikaanse silwerdoekaktrise geword wat die gesogte Oscar-toekenning inpalm. Daarmee het sy die kroon gespan op 'n loopbaan wat reeds verskeie Hollywood-treffers en toekennings insluit.

Sy het die Oscar gewen vir haar rol in Monster, wat handel oor die lewe van Aileen Wuornos (sien inligtingkassie), 'n lesbiese reeksmoordenares wat op 9 Oktober 2002 in die VSA tereggestel is vir die moord op sewe manskliënte. Terwyl Wuornos se lewensverhaal van teistering wat geweld, verkragting, bloedskande, tienerswangerskap en prostitusie ingesluit het, geweldige eise aan Theron as aktrise gestel het, moes sy ook haar uiterlike radikaal aanpas (insluitende gewig aansit) om die verwaarloosde en hawelose prostituut se harde lewe te kon weergee.

Theron het naas die Oscar ook 'n Golden Globe-toekenning ontvang vir dié rol en is in 2004 saam met Sandino Moreno aangewys as die Beste Aktrise by die Berlynse Rolprentfees. (Moreno het die toekenning gedeel vir haar rol in Maria Full of Grace.) Theron het ook 'n Screen Actor’s Guild-toekenning en verskeie pryse wat deur kritici uitgeloof word, ingepalm. Boonop het sy in Monster nie net voor die kameras gewerk nie, maar ook as vervaardiger opgetree.

Ná haar oorwinning by die Oscar-aand het Theron ’n kort besoek aan haar tuisland gebring, waar sy onderhoude met onder meer president Thabo Mbeki en oud-president Nelson Mandela gehad het, 'n liefdadigheidsbal bygewoon het en aangekondig het dat sy gaan help om 'n laboratorium in te rig waar DNS-toetse gedoen word om verkragtingsake vinniger af te handel. Sy het voorheen in 'n omstrede advertensieveldtog teen die verkragting van vroue in Suid-Afrika opgetree.

Verwysings[wysig | wysig bron]

  1. (en) Farber, Tanya, "Charlize defends her 'unique' American accent", IOL News.
  2. (en) Karsten, Chris (2009). Charlize: Life's One Helluva Ride. Human & Rousseau, 18. 
  3. (en) [1]
  4. (en) Charlize Theron Biography”. Hello Magazine. URL besoek op 9 Augustus 2012.
  5. (en) Benoni, East Rand”. www.sa-venues.com. URL besoek op 9 Augustus 2012.
  6. (en) Charlize Theron”. AccessHollywood.com. URL besoek op 24 Oktober 2009.
  7. (en) Charlize Theron”. People. URL besoek op 24 Oktober 2009.
  8. (en) Charlize Theron”. BiographyChannel.co.uk. URL besoek op 30 November 2011.
  9. (en) Graham, Caroline, "Charlize Theron 'rings off' after secret split with Stuart Townsend", Daily Mail, 31 January 2010. URL besoek op 1 Februarie 2010.

Eksterne skakels[wysig | wysig bron]

Commons-logo.svg
Wikimedia Commons het meer media verwant aan: