Mrs Dalloway

in Wikipedia, die vrye ensiklopedie
Jump to navigation Jump to search
Mrs Dalloway
OuteurVirginia Woolf
LandVlag van Verenigde Koninkryk Verenigde Koninkryk
TaalEngels
GenreRoman
UitgewerHogarth Press
Uitgegee14 Mei 1925
MediumDruk (gebind & sagteband)
ISBN0-15-662870-8
Letterkunde-portaal

Mrs Dalloway is 'n roman deur Virginia Woolf geskryf wat die eerste keer in 1925 gepubliseer is. Saam met James Joyce se Ulysses is hierdie roman deurslaggewend vir wat in Engels bekend staan as die "stream of consciousness" narratiewe styl. Dit is saamgestel uit twee kortverhale wat Woolf voorheen geskryf het, naamlik "Mrs Dalloway in Bond Street" en die onvoltooide "The Prime Minister".

Woolf gebruik die roman om in-diepte ondersoek in te stel op 'n enkele dag in die lewe van 'n vroulike protagonis, Clarissa Dalloway, wat omgaan in hoë Londense sosiale kringe in die tydperk direk na die Eerste Wêreldoorlog. Deur die loop van hierdie enkele dag voer Clarissa al die planne uit wat nodig is vir haar om gasvrou by 'n partytjie te wees daardie aand. Soos wat die roman se enkele dag ontvou, gebruik Woolf terugflitse en narratiewe insigte by al haar karakters se gedagtes om Clarissa se sentrale storie te ontwikkel en verruim. Een ander karakter wat baie baat by hierdie narratiewe ontwikkeling is Septimus Warren Smith, wat lei aan post-traumatiese spanningsindroom (toe nog nuut bekend as "shell-shock"), en wat geposisioneer word as 'n meer angstige manlike teenpool van die roman se vroulike protagonis.

Onder die temas wat in hierdie roman voorkom is geestesongesteldheid (spesifiek oormatige probleme met angs, hallusinering en post-traumatiese spanning), feminisme en homoseksualiteit.

Daar is 'n gelyknamige rolprentverwerking van die roman wat in 1997 vrygestel is, met 'n draaiboek deur die Woolf-spesialis Eileen Atkins geskryf, en met Vanessa Redgrave, Natascha McElhone, Lena Heady en Rupert Graves in die rolverdeling. Die Amerikaanse skrywer Michael Cunningham het dit verwerk en opgedateer vir sy eie roman The Hours, waarvoor hy in 1999 die Pulitzerprys vir Fiksie gewen het.