NG gemeente Kriel

in Wikipedia, die vrye ensiklopedie
Spring na: navigasie, soek
Die kerkgebou (regs) en saal (links), einde 2017.

Die NG gemeente Kriel was ’n gemeente van die Nederduitse Gereformeerde Kerk in Maraisburg, Roodepoort. Dit is laat in die negentigerjare by haar een moedergemeente, Florida, ingelyf.

Agtergrond[wysig | wysig bron]

Ds. T.A. Theron is in September 1944 as Kriel se eerste leraar bevestig en het hier gebly tot Augustus 1946.
Ds. J.Z. Eloff was van 1952 af Kriel se derde leraar.

Die gemeente is saamgestel uit dele van die gemeente van Florida, wat afgestig het van Langlaagte, en die gemeente van Waterval. Hoewel die beskikbare bron dit nie uitstippel nie, kan afgelei word die gemeente is so genoem ter ere van die vader van die Langlaagte-kinderhuis, ds. Abraham Kriel, en dat dit nie die naam Maraisburg gekry het nie om dit te onderskei van die gemeente Maraisburg op die Oos-Kaapse dorpie Hofmeyr, wat in 1873 aangelê is, maar waarvan die naam in 1911 verander is om verwarring met die voorstad Maraisburg te voorkom. Die naam van die gemeente Maraisburg is eers in die middel sewentigerjare van die 20ste eeu ook na Hofmeyr verander.

Stigting[wysig | wysig bron]

Op 15 April 1944 is die gemeente Kriel gestig en reeds op 1 Mei 1944 het hy sy eerste kerkraadsvergadering gehou. Ds. T.A. Theron van die Njassa-sending is in September 1944 as eerste leraar en herder van die nuwe gemeente bevestig. Presies twee jaar later, op 7 September 1946, het ds. Theron die sierlike kerksaal se hoeksteen gelê. Hierdie saal is op 19 April 1947 ingewy, en het as kerk gedoen tot die gemeente jare later sy kappiekerk en soortgelyke saal by Tweede Straat 46, Maraisburg, in gebruik geneem het. Uit die buiteland het ds. Theron na die gemeente gekom en aan die buiteland moes die gemeente hom afstaan toe hy middel 1946 na die NG gemeente Mufulira in Noord-Rhodesië vertrek.

Van 26 Augustus 1946 tot 26 April 1947 was die gemeente dus vakant, waarna sy bedien is deur prop. B.J. Odendaal, wat op 26 April georden is. In die drie jaar waarin ds. Odendaal hier gearbei het, het die gemeente met rasse skrede vooruitgegaan. 'n Pastorie van oor die £6 000 is gebou, en ook die ledetal van die gemeente het geweldig gegroei. Op 15 April 1950, die gemeente se sesde verjaardag, ontvang ds. B.J. Odendaal egter sy demissie en vertrek na Bloemfontein-Wes as studenteleraar waar hy bly tot hy in 1960 uit die bediening tree. Net sowat ses maande later, en wel op 30 Oktober 1950, kon die kerkraad aan die gemeente bekendmaak dat ds. J.Z. Eloff van die gemeente Kenhardt die beroep na hierdie gemeente aangeneem het. Op 13 Januarie 1951 is ds. Eloff hier bevestig deur ds. Stofberg, algemene sendingsekretaris.

Groei[wysig | wysig bron]

Destyds het die gemeente se lidmate meer as duisend getel en vanaf 1 Julie 1951 is die kerkraad uitgebrei tot 20 ouderlinge en 23 diakens. In 1952 het Ons gemeentelike feesalbum berig: "Alles dui daarop dat die gemeente nou op 'n baie gesonde basis is, dat die samewerking goed is en dat beide leraar en gemeente baie gelukkig voel en dankbaar is teenoor die Heer vir wat ons reeds kon doen. Ons gaan volhou en volhard in die wingerd van Hom, die gewer van al die goeie gawes."

Die gemeente se kerkgebou is ontwerp deur Koos Reyneke, wat vir meer as 70 kerkontwerpe verantwoordelik is.

Enkele leraars[wysig | wysig bron]

  • Thomas Arnoldus Theron, 1944 – 1946
  • Bernardus Johannes Odendaal, 1947 – 1950
  • Johannes Zacharias Eloff, 1952 – 1962
  • Frans Willem Conradie, 18 Januarie 1986 – ?

Bronne[wysig | wysig bron]

Eksterne skakels[wysig | wysig bron]