Olivetti

in Wikipedia, die vrye ensiklopedie
Jump to navigation Jump to search
Olivetti S.p.A.
Olivetti Logo.svg
Olivetti logo 2006.png
Tipe Società per azioni (SpA)
Gestig 29 Oktober 1908
Hoofkantoor Ivrea, PiëmontItalië
SleutelpersoneCamillo Olivetti (stigter)
Federico Maurizio d'Andrea (voorsitter)
Gebied bedienWêreldwyd
IndustrieInligtingstegnologie
ProdukteTikmasjiene, rekenaars, tabletrekenaars, slimfone, drukkers, 3D-drukkers, sakrekenaars, reken- en telefaksmasjiene; Internet van Dinge en Big Data, wolkdienste
Inkomste€227 miljoen (2017)[1]
Werknemers479 (2017)
Slagspreuk«Turns dreams into solutions»
Webwerfolivetti.com

Olivetti S.p.A. is 'n Italiaanse vervaardiger van tikmasjiene, rekenaars, tabletrekenaars, slimfone, drukkers en ander elektroniese toestelle soos sakrekenaars, rekenmasjiene en telefaksmasjiene. Die onderneming, wat sy hoofkwartier in Ivrea naby Turyn, Piëmont het, maak sedert 2003 deel uit van die Telecom Italia-groep (TIM S.p.A.).

Adriano Olivetti in 1957 in Venesië
Olivetti-tikmasjien Studio 42 van 1936, ontwerp deur die Bauhaus-alumnus Alexander Schawinsky

Olivetti is in 1908 oorspronklik as 'n vervaardiger van tikmasjiene gestig. Die onderneming het vervolgens steeds gereageer op veranderende markbehoeftes in die inligtings- en kommunikasiebedryf en nuwe ontwikkelinge op tegnologiese gebied. So het die onderneming oorgeskakel van meganiese tot elektroniese toestelle en sy portefeulje van kantoortoerusting uitgebrei met rekenaars, IT-stelsels en telekommunikasie.

In 1964 het Olivetti 'n noemenswaardige deurbraak behaal met die bekendstelling van die wêreld se eerste programmeerbare tafelrekenaar, Programma 101, wat veral in die Verenigde State 'n kommersiële sukses was.

Ewe belangrik en uniek was die bydraes van Adriano Olivetti (1901−1960), die seun van die Olivetti-stigter, tot die ontwikkeling van moderne fabrieke en vervaardigingsaanlegte en werkverhoudings. Sy oortuiging was dat die winste, wat hy as nyweraar gemaak het, herbelê sou word tot voordeel van die hele samelewing. Binne en buite die Olivetti-nywerheidskompleks in Ivrea het hy die utopiese visie en ideaal van 'n gemeenskapsbeweging nagestreef. Die Piëmontese nywerheidstad Ivrea, wat hy tussen 1930 en 1960 beplan en opgerig het, is as industriële modelstad van die 20ste eeu in 2008 tot Unesco-wêrelderfenis verklaar[2], onder meer danksy die tegnologies innoverende mylpale wat in die Olivetti-kompleks met navorsing in verband met moderne staalstrukture volgens die Bauhaus-ideale behaal is en rigtingwysend sou wees vir industriële argitektuur in Italië.[3]

Die Movimento Communità of «Gemeenskapsbeweging», 'n politieke beweging wat in 1947 gestig is en waarin Adriano Olivetti liberale en sosialistiese gedagtes probeer versmelt het, het goed gevaar in die algemene verkiesing van 1958 (waartydens Olivetti as afgevaardigde vir die Piëmontese parlement verkies is), maar het ná sy afsterwe in 1960 uit die politieke lewe verdwyn. Die party se gedagtes het later herleef as stroming binne die Lega Nord (tans Lega) se jeugorganisasie Movimento Giovani Padani.[4]

Verwysings[wysig | wysig bron]

  1. Olivetti.com: About us. Besoek op 3 April 2019
  2. ivreacittaindustriale.it: Ivrea, industrial city of the 20th century. Besoek op 3 April 2019
  3. Danilo Di Donato, R. Morganti, A. Tosone & M. Abita: Steel heritage: Olivetti’s factories in Ivrea in the fifties and sixties. In: Ine Wouters, Stephanie van de Voorde, Inge Bertels, Bernard Espion, Krista de Jonge, Denis Zastavni: Building Knowledge, Constructing Histories: Proceedings of the 6th International Congress on Construction History (6ICCH 2018), July 9-13, 2018, Brussels, Belgium. 2 boekdele. CRC Press 2018, bl. 555−562
  4. Movimento Giovani Padani: Adriano Olivetti - L'ordine politico della Communità. Besoek op 4 November 2019 (Webargief)

Eksterne skakels[wysig | wysig bron]

Geskiedenis

Ivrea