Pia Dijkstra

Pia Dijkstra

Pietje Aafke (Pia) Dijkstra (gebore op 9 Desember 1954 in Franeker) is 'n Nederlandse politikus van die Demokrate 66 (D66). Sy het van 17 Junie 2010 tot 31 Maart 2021 as lid van die Tweede Kamer gedien. Sedert 2 Februarie 2024 is sy die minister vir Mediese Sorg in die Rutte IV-kabinet. Vroeër was sy aktief as televisievervaardiger, joernalis en televisie-aanbieder.

Studie

Ná die gymnasium aan die Stedelijk Gymnasium Leeuwarden vertrek Dijkstra na Amsterdam om teologie te studeer aan die Gemeentelijke Universiteit. Dié studie het sy nie voltooi nie.

Radio en televisie

In 1978 had Dijkstra 'n toevallige ontmoeting met IKON-medewerker Jan Stroes, wat vir haar die begin inlui van 'n loopbaan in die omroepwereld. Sy tree by IKON in diens as voorligster, radiomedewerkster en regisseur van kerkdienste en werk daar vir ses jaar.

In 1984 maak sy die oorgang na Radio Nederland Wereldomroep waar sy as televisievervaardiger en televisie-aanbieder aan die slag gaan. Twee jaar later vertrek sy na Hier & Nou Radio van die NCRV en in 1988 word sy een van die vaste gesigte van NOS Journaal. Op 14 Julie 2000 bied sy vir die laaste keer NOS Journaal aan. In Oktober van daardieselfde jaar stap sy oor na AVRO. Sy bied daar Hoe Bevalt Nederland, Tien Lastige Vragen, Studio 2 ('n gesamentlike program van die omroepers wat op Nederland 2 uitsaai), Vinger aan de Pols en EénVandaag aan.

Politiek

Dijkstra het op die 13de plek van die kandidatelys van die D66 vir die Tweede Kamerverkiesings van 2010 gestaan en sou daardeur geen Kamerlid word nie (D66 behaal tien setels), maar verower danksy 15 705 voorkeurstemme - elf stemme bo die kiesdrempel - tog 'n Kamersetel. In 2012 staan sy op die negende plek van die kandidatelys en word sy weer gekies, hierdie keer met 24 886 voorkeurstemme. In 2017 staan sy op die vierde plek van die kandidatelys en word sy weer gekies, hierdie keer met 120 557 voorkeurstemme.

Dijkstra is woordvoerder van Volksgezondheid, Welzijn, Sport en Emancipatie. Sy red onder meer 'n fonds wat die aanvaarding van homoseksualiteit onder bejaardes in versorgingstehuise bevorder. Ook dien sy saam met Boris van der Ham 'n mosie in om verpligte voorligting oor homoseksualiteit op alle skole te gee. Op 8 April 2008 word Dijkstra voorsitter van die Taskforce DeeltijdPlus, wat in opdrag van werkgewers, werknemers en owerheid vroue met deeltydse loopbane aanmoedig om meer ure te werk. Sedert Desember 2012 word hierdie mosie uitgevoer. Op 11 Junie 2013 word haar inisiatiefwetsvoorstel met kollega-Kamerlid Gerard Schouw van D66 om geen nuwe "gewetensbeswaarde trouamptenare" aan te neem, aangeneem. Dijkstra bepleit as Kamerlid outomatiese donorregistrasie (die "geen beswaar"-sisteem) en die toestaan van die kweek van menslike embrio's vir wetenskaplike doeleindes en spesifiek vir mediese eksperimente. Op 13 September 2016 stem die Tweede Kamer met die kleinste moontlike meerderheid in met 'n plan van Dijkstra vir outomatiese registrasie van orgaandonors, tensy mense beswaar aanteken. By die hoofrolstem stem 75 Kamerlede vir en 74 teen hierdie inisiatiefwet.

Persoonlike lewe

Dijkstra woon in Utrecht en is getroud met voormalige Schiphol-direkteur Gerlach Cerfontaine. Die egpaar het drie seuns.

Eksterne skakels

• Wikimedia Commons het meer media in die kategorie Pia Dijkstra.
• Pia Dijkstra, webwerf van die Tweede Kamer der State-Generaal
• Pia Dijkstra, profiel en Tweede Kamer aktiwiteite op Oop Kamer