Pieter Jacobs

in Wikipedia, die vrye ensiklopedie

Pieter Jacobs is ’n Suid-Afrikaanse akteur en dramaturg. Hy is reeds van skooldae af betrokke in die dramawêreld, en na skool maak hy dit sy voltydse beroep. In 2015 word hy deur die Mail & Guardian aangewys as een van die top 200 nuuswaardige jong Suid-Afrikaners

Lewe en werk[wysig | wysig bron]

Pieter Jacobs is in Bloemfontein gebore en matrikuleer in 1998 aan die Hoërskool Kroonstad. Sedert graad ses neem hy ekstra dramaklasse en hy is ’n deeltydse student van die bekroonde eenbedryfskrywer Kobus Strydom. Op hoërskool neem hy deel aan die produksie van die drama “Gruwelhuis” wat in 1998 die nasionale ATKV-Tienertoneelkompetisie wen. Hy word deur die ATKV as die land se beste skole-akteur bekroon en verower die Dalro-dramabeurs vir skoletoneel, wat vir sy eerste jaar se dramastudies betaal. Vanaf 1999 tot 2001 studeer hy verder aan die Technikon Pretoria (later die Tshwane Universiteit vir Tegnologie) se Dramadepartement.[1] Aan die einde van sy eerste jaar se studie in 1999 verower hy ’n beurs by die Association for Amateur Performing Arts, wat die res van sy studie betaal. Na afloop van sy studies is hy vanaf die begin van 2002 voltyds in Johannesburg verbonde aan die ATKV-toneelgroep, wat kinderteaterproduksies landwyd op die planke bring. Tussenin doen hy ook vryskutwerk met poppeteaterproduksies by preprimêre skole met Bubblegum Productions, die teaterproduksiemaatskappy wat hy en sy vriende stig. As akteur tree hy onder andere op die verhoog op in A midsummer night’s dream, “Happy endings are extra” van Ashraf Johaardien en in “Die kabaret” van Chris Vorster. Op televisie speel hy in die televisiereeks “Song vir Katryn”.

Later sluit hy as projekbestuurder aan by die Arts and Culture Trust, waar hy ook op die bestuurskomitee dien, waarna hy in Julie 2009 Bemarkings- en bedryfsbestuurder word van Business and Arts South Africa. In April 2010 neem hy oor as hoof uitvoerende beampte van die Arts and Culture Trust (ACT), wat ten doel het om kuns- en kultuurprojekte oor alle dissiplines te borg. Hy is ’n lid van ACT se projek- en fondsinsamelingkomitee, asook die Risiko en Ouditkomitees. By die Performing Arts Network of South Africa (PANSA) dien hy op die Gauteng-streek komitee en hy is ook as tesourier lid van die Uitvoerende Komitee van  Arterial Network South Africa. In 2015 word hy deur die Mail & Guardian gelys as een van die top 200 nuuswaardige jong Suid-Afrikaners.[2]

Skryfwerk[wysig | wysig bron]

Met sy drama “Plofstof” wen hy in 2003 die Nagtegaal-debuutprys vir toneelskrywers jonger as 35 jaar. Hierdie drama behandel die sosiale omstandighede in Suid-Afrika, waar jeugdiges gekonfronteer word met dwelms, geweld, vigs en hulle seksuele identiteit. Dominic en Lizel deel ’n woonstel in ’n gevaarlike buurt in Johannesburg. Wanneer albei hulle werk verloor en die opsigter hulle uit die woonstel wil sit, maak hulle planne om die huur te probeer betaal. Jacobs se tweede drama, die Engelse “Dalliances”, word in 2007 en 2008 in die Kunstekaap Teater in Kaapstad opgevoer en in Mei 2008 by die International Gay Theatre Festival in Dublin in Ierland. By laasgenoemde fees word die drama bekroon met die Hilton Edwards-toekenning vir direksie en ontwerp en word dit ook genomineer vir die Oscar Wilde-toekenning vir beste nuwe drama. In 2012 word die drama ook by die Thatsogay-fees by die Universiteit van Johannesburg opgevoer. “Dalliance” beteken ’n speelse flirtasie, waarin die aksie in ’n stedelike milieu afspeel. Die gemeenskap word uitgedaag om te dink oor hulle aksies en keuses en die gevolge van veelvuldige seksmaats in ’n klein en geïntegreerde gemeenskap word ondersoek. Die drama vra ook die vraag hoeveel van ons werklikheid deur ons eie keuses bepaal word. Janet is bevriend met Leo en is op soek na liefde. Ken is in ’n verhouding met Andy, maar ontmoet vir Leo in ’n supermark. Die karakters is op soek na romanse, seks en tydelike opwinding om die leegheid in hulle lewens te probeer vul. Hulle flankeer om te voel dat hulle lewe, om te voel dat iemand hulle liefhet, om vir ’n rukkie gelukkig te wees, sonder oorweging van die gevolge van hulle dade en leefstyl. Saam met Zelda Langeveldt skryf hy die tienerdrama “Bagasie Box Laan” en op sy eie die eenbedryf “Lokomotief”, ook vir tieners. Sy eenmanvertoning “F.A.T.” debuteer in 2012 by die Grahamstad Nasionale Kunstefees.

Verwysings[wysig | wysig bron]

Tydskrifte en koerante[wysig | wysig bron]

  • Bouwer, Anna-Retha “Heel eerste Thatsogay-fees in Johannesburg by U.J.” “Beeld” 13 Augustus 2012
  • Burger, Kobus “‘Plofstof’ ’n jong ‘Trainspotting’” “Beeld” 20 November 2003
  • Grobler, Cobus “Vrystater wen gesogte prys in dramawedstryd” “Die Volksblad” 14 Desember 1999

Ander verwysings[wysig | wysig bron]

  1. http://esat.sun.ac.za/index.php/Pieter_Jacobs
  2. "argiefkopie". Geargiveer vanaf die oorspronklike op 28 Desember 2016. Besoek op 15 September 2016.